ଥିରୁଭାନନ୍ତପୁରମ୍, ୧୬।୫: କେରଳର କସାରାଗୋଡରେ ଏକ ଅଜବ କ୍ରିକେଟ ମ୍ୟାଚ୍ ଦେଖିବାକୁ ମିଳିଛି। ଏଠାରେ ଆନ୍ତଃଜିଲା ଅଣ୍ଡର-୧୯ ମହିଳା କ୍ରିକେଟ ଦଳ ମଧ୍ୟରେ ଚାଲିଥିବା ଏକ ମ୍ୟାଚ୍ରେ ଗୋଟିଏ ଦଳର ୧୦ଜଣ ବ୍ୟାଟ୍ସମ୍ୟାନ ଶୂନରେ ଆଉଟ ହୋଇ ଅଜବ ରେକର୍ଡ କରିଛନ୍ତି। ବୁଧବାର କସାରାଗୋଡ ଏବଂ ବାୟନାଡ ଟିମ୍ ମଧ୍ୟରେ ମଲ୍ଲାପୁରମ ପେରିନଥଏମନ୍ନା ଷ୍ଟାଡିୟମରେ ଖେଳାଯାଇଥିବା ଏକ ମ୍ୟାଚରେ କସାରାଗୋଡ ଦଳର ୧୦ଜଣ ବ୍ୟାଟ୍ସମ୍ୟାନ୍ କ୍ଲିନ୍ ବୋଲ୍ଡରେ ଆଉଟ୍ ହୋଇଥିଲେ। ଏକମାତ୍ର ବ୍ୟାଟ୍ସମ୍ୟାନ୍ କୌଣସି ରନ୍ ନ କରି ନଟ୍ଆଉଟ୍ ରହିଥିଲେ। ଫଳରେ ଦଳ ମାତ୍ର ୪ରନ୍ କରିବାକୁ ସକ୍ଷମ ହୋଇପାରିଥିଲା। ଏହି ୪ରନ୍ ଅତିରିକ୍ତ ରନ୍ ଭାବେ ଆସିଥିଲା। ୫ ରନ୍ର ବିଜୟ ଲକ୍ଷକୁ ବାୟନାଡ ଟିମ୍ ଗୋଟିଏ ଓଭର ଖେଳି ଜିତି ନେଇଥିଲା।
