ଖ୍ରୀଷ୍ଟଚର୍ଚ୍ଚ,୨୪।୧୦:ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଟି-୨୦ ସିରିଜ୍ର ଦ୍ୱିତୀୟ ମ୍ୟାଚ ଖ୍ରୀଷ୍ଟଚର୍ଚ୍ଚର ହାଗ୍ଲି ଓଭାଲ ଷ୍ଟାଡିୟମ୍ରେ ଖେଳାଯାଉଛି। ଏହି ମ୍ୟାଚ୍ରେ ଭାରତୀୟ ଦଳର ଉପଅଧିନାୟକ ତିଳକ ବର୍ମା ଦୁଇଟି କ୍ୟାଚ ଧରି ଏକ ବିଶ୍ୱ ରେକର୍ଡ ନିଜ ନାମରେ କରିଛନ୍ତି। ଟି-୨୦ ଅନ୍ତର୍ଜାତୀୟ କ୍ରିକେଟ୍ରେ ଗୋଟିଏ କ୍ୟାଲେଣ୍ଡର ବର୍ଷରେ ସର୍ବାଧିକ କ୍ୟାଚ ଧରିବାର ରେକର୍ଡ ଏବେ ତାଙ୍କ ନାମରେ ରହିଛି।
ଏହି ମ୍ୟାଚ୍ରେ ପ୍ରଥମେ ଅର୍ଶଦୀପ ସିଂହଙ୍କ ଦ୍ୱିତୀୟ ଓଭରରେ ତିଳକ ଏକ କ୍ୟାଚ ଧରିଥିଲେ। ପରେ ଭୁବନେଶ୍ୱର କୁମାରଙ୍କ ତୃତୀୟ ଓଭରରେ ଡାରିଲ ମିଚେଲଙ୍କ କ୍ୟାଚ ଧରି ସେ ଏହି ମ୍ୟାଚ୍ରେ ନିଜର ଦ୍ୱିତୀୟ କ୍ୟାଚ ପୂରଣ କରିଥିଲେ। ଏହା ସହ ସେ ଇଣ୍ଡୋନେସିଆର ଖେଳାଳିଙ୍କ ରେକର୍ଡ ଭାଙ୍ଗିଛନ୍ତି।
ତିଳକ ବର୍ମା ୨୦୨୬ରେ ଏପର୍ଯ୍ୟନ୍ତ ୨୬ଟି କ୍ୟାଚ ଧରିଛନ୍ତି। ଏହା ସହ ସେ ଗୋଟିଏ କ୍ୟାଲେଣ୍ଡର ବର୍ଷରେ ଅନ୍ତର୍ଜାତୀୟ ଟି-୨୦ରେ ଜଣେ ଫିଲ୍ଡର ଭାବେ ସର୍ବାଧିକ କ୍ୟାଚ ଧରିବାର ନୂଆ ବିଶ୍ୱ ରେକର୍ଡ ସ୍ଥାପନ କରିଛନ୍ତି।
ଏହା ପୂର୍ବରୁ ଏହି ରେକର୍ଡ ଇଣ୍ଡୋନେସିଆର ଡାନିଲସନ ହାଭୋଙ୍କ ନାମରେ ଥିଲା। ସେ ୨୦୨୫ରେ ୨୫ଟି କ୍ୟାଚ ଧରିଥିଲେ। ସେହିପରି ୟୁଏଇର ମହମ୍ମଦ ୱାସିମ ୨୦୨୪ରେ ୨୪ଟି କ୍ୟାଚ ଧରିଥିବା ବେଳେ ମାଲେସିଆର ଶର୍ଭିନ ମୁନିଆଣ୍ଡି ୨୦୨୫ରେ ୨୧ଟି କ୍ୟାଚ ନେଇଥିଲେ। ଉଗାଣ୍ଡାର ବ୍ରାଏନ ମାସାବା ୨୦୨୩ରେ ୨୦ଟି ଏବଂ ବାଂଲାଦେଶର ତଞ୍ଜିଦ ହସନ ୨୦୨୫ରେ ୨୦ଟି କ୍ୟାଚ ଧରିଥିଲେ।
ଗୋଟିଏ ବର୍ଷରେ ସର୍ବାଧିକ କ୍ୟାଚ ଧରିଥିବା ଫିଲ୍ଡର
– ୨୬ କ୍ୟାଚ ତିଳକ ବର୍ମା (ଭାରତ), ୨୦୨୬
– ୨୫ କ୍ୟାଚ ଡାନିଲସନ ହାଭୋ (ଇଣ୍ଡୋନେସିଆ), ୨୦୨୫
– ୨୪ କ୍ୟାଚ ମହମ୍ମଦ ୱାସିମ (ୟୁଏଇ), ୨୦୨୪
– ୨୧ କ୍ୟାଚ ଶର୍ଭିନ ମୁନିଆଣ୍ଡି (ମାଲେସିଆ), ୨୦୨୫
– ୨୦ କ୍ୟାଚ ବ୍ରାଏନ ମାସାବା (ଉଗାଣ୍ଡା), ୨୦୨୩
– ୨୦ କ୍ୟାଚ ତଞ୍ଜିଦ ହସନ (ବାଂଲାଦେଶ), ୨୦୨୫
ମ୍ୟାଚ୍ରେ ଭାରତ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଆରମ୍ଭରୁ ଭାରତୀୟ ବୋଲରମାନେ ଏହି ନିଷ୍ପତ୍ତିକୁ ଠିକ ପ୍ରମାଣିତ କରିଥିଲେ। ଅର୍ଶଦୀପ ସିଂହ ନିଜର ପ୍ରଥମ ଓଭରରେ ଟିମ ସିଫର୍ଟଙ୍କୁ ଆଉଟ କରି ଭାରତକୁ ପ୍ରଥମ ସଫଳତା ଦେଇଥିଲେ। ଏହା ପରେ ଭୁବନେଶ୍ୱର କୁମାର ଡାରିଲ ମିଚେଲଙ୍କ ଉଇକେଟ ନେଇଥିଲେ।
ଦୀର୍ଘ ଚାରି ବର୍ଷ ପରେ ଭାରତୀୟ ଦଳକୁ ଫେରିଥିବା ଅଭିଜ୍ଞ ବୋଲର ଭୁବନେଶ୍ୱର କୁମାରଙ୍କୁ ଅନ୍ତର୍ଜାତୀୟ କ୍ରିକେଟ୍ରେ ପ୍ରଥମ ଉଇକେଟ ପାଇଁ ଦୀର୍ଘ ସମୟ ଅପେକ୍ଷା କରିବାକୁ ପଡ଼ିଥିଲା। ୱେଷ୍ଟଇଣ୍ଡିଜ ବିପକ୍ଷରେ ଭୁବନେଶ୍ୱରଙ୍କ ପ୍ରତ୍ୟାବର୍ତ୍ତନ ହୋଇଥିଲେ ମଧ୍ୟ ବର୍ଷା ଯୋଗୁ ମ୍ୟାଚ ବାତିଲ ହେବାରୁ ତାଙ୍କୁ ବୋଲିଂ କରିବାର ସୁଯୋଗ ମିଳି ନ ଥିଲା। ଏହା ପରେ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟି-୨୦ରେ ସେ ୪ ଓଭରରେ ୪୯ ରନ ବ୍ୟୟ କରିଥିଲେ, କିନ୍ତୁ କୌଣସି ଉଇକେଟ ପାଇ ନ ଥିଲେ।
ଶେଷରେ ଦ୍ୱିତୀୟ ଟି-୨୦ରେ ଡାରିଲ ମିଚେଲଙ୍କ ଉଇକେଟ ନେଇ ଭୁବନେଶ୍ୱର ଅନ୍ତର୍ଜାତୀୟ କ୍ରିକେଟ୍ରେ ୧୪୩୪ ଦିନ ପରେ ଉଇକେଟ ହାସଲ କରିଛନ୍ତି। ଏହି ସଫଳତା ତାଙ୍କ ପ୍ରତ୍ୟାବର୍ତ୍ତନକୁ ଆହୁରି ସ୍ମରଣୀୟ କରିଛି।
Dharitri – Odisha’s No.1 Odia Daily
