ଭୁବନ, ୯।୮(ଡି.ଏନ.ଏ.)-ଭୁବନ ହେଉଛି ସଂଗ୍ରାମୀଙ୍କ ମାଟି। ସର୍ବକନିଷ୍ଠ ଶହୀଦ ବାଜି ରାଉତଙ୍କ ବଳିଦାନ ସ୍ବାଧୀନତା ସଂଗ୍ରାମ ଇତିହାସରେ ଲିପିବଦ୍ଧ। ଏହି ମାଟିର ସନ୍ତାନ ହୋଇ ଆମେ ଇତିହାସକୁ ଭୁଲିଯିବା ଅନୁଚିତ। ଦେଶମାତୃକାର ସେବାରେ ପ୍ରାଣବଳି ଦେଇଥିବା ବୀର ସଂଗ୍ରାମୀଙ୍କ ପଥ ଅନୁସରଣ କଲେ ଏହା ହିଁ ସେମାନଙ୍କ ପ୍ରତି ଯଥାର୍ଥ ସମ୍ମାନ ହେବ ବୋଲି କହିଛନ୍ତି ଅବସରପ୍ରାପ୍ତ ବାୟୁସେନା କର୍ମଚାରୀ ପ୍ରଫୁଲ୍ଲ କୁମାର ଦାସ। ସ୍ଥାନୀୟ ବାଜି ରାଉତ ସ୍ମୃତି ମହାବିଦ୍ୟାଳୟରେ ଶୁକ୍ରବାର ଅନୁଷ୍ଠିତ ଅଗଷ୍ଟ କ୍ରାନ୍ତି ଦିବସ ଆଲୋଚନାଚକ୍ରରେ ଅତିଥିଭାବେ ଯୋଗଦେଇ ସେ ଯୁବପିଢ଼ିଙ୍କ ଉଦ୍ଦେଶ୍ୟରେ ଏହା କହିଛନ୍ତି।
କଲେଜ ଅଧ୍ୟକ୍ଷ କିଶୋର ଚନ୍ଦ୍ର ଦାସଙ୍କ ସଭାପତିତ୍ୱରେ ଆୟୋଜିତ କାର୍ଯ୍ୟକ୍ରମରେ ବାଜି ରାଉତଙ୍କ ପୁତୁରା କୁଳମଣି ରାଉତ, ସଂଗ୍ରାମୀ ରଘୁ ନାୟକଙ୍କ ଦାୟାଦ ତରଣୀ ସେନ ନାୟକ, ଅବସରପାପ୍ତ ସେନା କର୍ମଚାରୀ ସୋମନାଥ ଦାସ, ରବିନାରାୟଣ ନାୟକ ଅନ୍ୟତମ ଅତିଥି ଭାବେ ମଞ୍ଚାସୀନ ଥିଲେ। ସୀମାନ୍ତରେ ମୁତୟନ ବୀର ଯବାନଙ୍କ ଦେଶସେବାର ପଟାନ୍ତର ନାହିଁ। ସେମାନେ ଅଛନ୍ତି ବୋଲି ଆମେ ଶାନ୍ତିରେ ଶୋଇପାରୁଛେ। ସେମାନଙ୍କ ନୀତିଆଦର୍ଶକୁ ଅନୁସରଣ କଲେ ଦେଶ ବିକାଶର ଶିଖର ଛୁଇଁବ ବୋଲି ଅତିଥିମାନେ ମତବ୍ୟକ୍ତ କରିଥିଲେ।
ଏହି ଅବସରରେ କଲେଜ ପରିସରରେ ଥିବା ବାଜି ରାଉତ, ସୁବାସ ଚନ୍ଦ୍ର ବୋଷ, ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା। କଲେଜର ବହୁ ଛାତ୍ରୀଛାତ୍ର, କର୍ମଚାରୀ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ। ବାଜିସେନାର ସଭାପତି କମଳଲୋଚନ ମହାରଣା ସ୍ବାଗତ ଭାଷଣ ଏବଂ ଲାଇବ୍ରେରିଆନ ନନ୍ଦକିଶୋର ସାହୁ ଧନ୍ୟବାଦ ଦେଇଥିଲେ।
