କଟକ ସଦର,୨୧।୧୨(ଡି.ଏନ୍.ଏ.): ଆସନ୍ତା ୨୨ରେ କଟକ ଜିଲାପରିଷଦ ୭ନଂ. ଜୋନ୍ ଉପନିର୍ବାଚନ କୋଭିଡ୍ ଗାଇଡ୍ଲାଇନ୍ ଅନୁଯାୟୀ ଅନୁଷ୍ଠିତ ହେବ। ବୁଥ୍ରେ ସାମାଜିକ ଦୂରତା ସହ ଭୋଟରମାନଙ୍କ ଥର୍ମାଲ ସ୍କାନିଂ ଓ ସାନିଟାଇଜର ଦ୍ୱାରା ହାତ ସଫାର ବ୍ୟବସ୍ଥା ରହିଛି। ବିଧାନସଭା ନିର୍ବାଚନରେ ଭୋଟରଙ୍କୁ ଗ୍ଲୋବ୍ସ (କେବଳ ଡାହାଣ ହାତ) ଓ ମାସ୍କ ଦିଆଯିବା ବ୍ୟବସ୍ଥା ଥିବାବେଳେ ଏହି ଉପନିର୍ବାଚନ ପାଇଁ ଏଭଳି ବ୍ୟବସ୍ଥା ନାହିଁ। ଏ ସମ୍ପର୍କରେ କଟକ ଜିଲା ପଞ୍ଚାୟତ ଅଧିକାରୀ ଚକ୍ରଧର ମାହାଳି କହିଛନ୍ତି, ରାଜ୍ୟ ନିର୍ବାଚନ ଆୟୁକ୍ତଙ୍କ ଗାଇଡ୍ଲାଇନ୍ରେ ଏହି ସବୁ ଜିନିଷ ଯୋଗାଇ ଦେବା ବ୍ୟବସ୍ଥା ନାହିଁ। ପ୍ରତି ବୁଥ୍ରେ ଭୋଟରଙ୍କ ତାପମାତ୍ରା ମାପିବା ସହ ସାନିଟାଇଜର ଦେବା ପାଇଁ ସ୍ଥାନୀୟ ଅଙ୍ଗନଓ୍ବାଡି ଓ ଆଶାକର୍ମୀମାନଙ୍କୁ ୩୦୦ ଟଙ୍କା ଲେଖାଏ ପାରିଶ୍ରମିକ ଦିଆଯିବା ବ୍ୟବସ୍ଥା ରହିଛି। ମୋଟ୍ ୧୨୪ଟି ବୁଥ ମଧ୍ୟରୁ ୫୪ଟି ବୁଥ୍ ବିଭିନ୍ନ ଗୋଷ୍ଠୀକେନ୍ଦ୍ରରେ ହେଉଥିବାରୁ ଚେୟାର, ଟେବୁଲ ନିକଟତମ ହାଇସ୍କୁଲରୁ ଆଣିବା ବ୍ୟବସ୍ଥା ରହିଛି। ସାଧାରଣ ନିର୍ବାଚନରେ ବୁଥ୍ରେ ବିଦ୍ୟୁତ୍ ଆଲୋକ ବ୍ୟବସ୍ଥା ରହିଥିବାବେଳେ ଏହି ଜିଲାପରିଷଦ ଉପନିର୍ବାଚନରେ ଲଣ୍ଠନ ବ୍ୟବସ୍ଥା କରାଯାଇ ମତଦାନ କେନ୍ଦ୍ରକୁ ଆଲୋକିତ କରାଯିବ। ବିଦ୍ୟାଳୟରେ ଶୌଚ ପାଇଁ ପାଇଖାନା ଥିବାବେଳେ ଗୋଷ୍ଠୀକେନ୍ଦ୍ରରେ ଏହି ସୁବିଧା ନାହିଁ। ତେଣୁ ପୋଲିଂ ପାର୍ଟିଙ୍କ ପାଖ ବିଦ୍ୟାଳୟରେ ରାତ୍ରିଯାପନ ବ୍ୟବସ୍ଥା କରାଯାଇଛି ବୋଲି ବ୍ଲକ କାର୍ଯ୍ୟାଳୟ ସୂତ୍ରରୁ ଜଣାପଡିଛି।
