ରାୟଗଡା, ୧୭।୧୧ (ଆଶିଷ ରଞ୍ଜନ ପଣ୍ଡା): ରାଜ୍ୟରେ ପୋଲିସ ପକ୍ଷରୁ ସାଇବର ଅପରାଧରୁ ସୁରକ୍ଷା ପାଇଁ ମାସବ୍ୟାପୀ ସଚେତନତା ଚାଲିଛି। ହେଲେ ଅନ୍ୟପଟେ ଗ୍ରାମାଞ୍ଚଳର ଲୋକେ ସାଇବର ଅପରାଧୀଙ୍କ ଶିକାର ପାଲଟିଛନ୍ତି । ନିକଟରେ ଭୁବନେଶ୍ୱରର ଜଣେ ବୃଦ୍ଧ ଦମ୍ପତିଙ୍କୁ ଡିଜିଟାଲ ଆରେଷ୍ଟ ନାଁରେ କୋଟି କୋଟି ଟଙ୍କା ସାଇବର ଅପରାଧୀମାନେ ଲୁଟି ନେଇଥିଲେ। ତାଙ୍କ ପରିସ୍ଥିତି ଏହିଭଳି ରହିଥିଲା ଯେ, ଧମକ ଯୋଗୁ ସେମାନେ ଘରୁ ବାହାରିବାକୁ ଭୟଭୀତ ହୋଇଯାଇଥିଲେ । ପରବର୍ତ୍ତୀ ସମୟରେ ସାହିପଡିଶା ପୋଲିସକୁ ସୂଚନା ଦେବା ପରେ ପୋଲିସ ଆସି ବହୁ ଅନୁରୋଧ ପରେ କବାଟ ଖୋଲି ଘରୁ ବାହାରିବା ସହିତ ପୋଲିସକୁ ସମସ୍ତ ସୂଚନା ଦେଇ ଥାନାରେ ଲିଖିତ ଅଭିଯୋଗ କରିଥିଲେ । ବର୍ତ୍ତମାନ ରାୟଗଡା ଜିଲାରେ ମଧ୍ୟ ଦେଖାଦେଇଛି ଏକ ସାଇବର ଅପରାଧ । ରାୟଗଡା ଜିଲାର ଜଣେ ଯୁବକ ତାଙ୍କ ଗାଁରେ ଥିବା ସମୟରେ ଗତ ୧୬ ତାରିଖରେ ତାଙ୍କ ବ୍ୟାଙ୍କ ଆକାଉଣ୍ଟରୁ ୟୁପିଆଇ ମାଧ୍ୟମରେ କେହି ୬ଟି କାରବାରରେ ୫୬ହଜାର ୩୪୬ଟଙ୍କା ଗାଏବ କରିଦେଇଥିବା ନେଇ ଅଭିଯୋଗ ଆସିଛି। ଅଭିଯୋଗକାରୀ ଯୁବକ ଜଣକ ହେଲେ କଳାହାଣ୍ଡି ଜିଲାର ଘାସିରାମ ନାଏକ । ଘାସିରାମଙ୍କ କହିବାନୁସାରେ ସେ ଗାଁକୁ ଯାଇଥିଲେ । ସେଠାରେ ତ ମୋବାଇଲ ନେଟୱର୍କ ସମସ୍ୟା ରହିଛି। ଏହି ଭିତରେ କେହି ଦୁର୍ବୃତ୍ତ ୟୁପିଆଇ ଟେକ୍ନୋଲୋଜି ବ୍ୟବହାର କରି ତାଙ୍କ ଆକ୍ସିସ ବ୍ୟାଙ୍କ ଆକାଉଣ୍ଟରୁ ୫ଥର ୧୦ହଜାର ଟଙ୍କା ଲେଖାଏ ଏବଂ ଶେଷ ଥର ୫ ହଜାର ୩୪୬ଟଙ୍କା ଅନ୍ୟ ଏକ ବ୍ୟାଙ୍କ ଆକାଉଣ୍ଟକୁ ଉଠାଇ ନେଇଛି । ସେଥିରୁ ୩ଥର ୧୦ହଜାର ଟଙ୍କା ଆଦେଶ କୁମାର ଯାଦବ ନାମକ ବ୍ୟକ୍ତିଙ୍କ ଆକାଉଣ୍ଟକୁ ଯାଇଥିବା ବେଳେ ଦୁଇ ଥର ୧୦ହଜାର ଟଙ୍କା ଓ ୫୩୪୬ଟଙ୍କା ଅନନ୍ତ କୁମାର ନାମକ ବ୍ୟକ୍ତିଙ୍କ ଆକାଉଣ୍ଟକୁ ଯାଇଥିବା ବ୍ୟାଙ୍କ ଷ୍ଟେଟମେଣ୍ଟରୁ ଜଣାପଡିଛି। ତେବେ ବ୍ୟାଙ୍କ ଆକାଉଣ୍ଟରୁ ଟଙ୍କା କଟିବା ନେଇ ଜାଣିବା ପରେ ଘାସିରାମ ରାୟଗଡା ସ୍ଥିତ ଆକ୍ସିସ ବ୍ୟାଙ୍କରେ ଲିଖିତ ଅଭିଯୋଗ କରିବା ସହିତ ପୋଲିସ ସାଇବର ସେଲରେ ମଧ୍ୟ ଅଭିଯୋଗ କରିଛନ୍ତି । କିଛିଦିନ ତଳେ ରାୟଗଡା ଜିଲାପାଳଙ୍କ ନାଁରେ ସୋସିଆଲ ମିଡିଆ ପ୍ଲାଟଫର୍ମ ଫେସବୁକରେ କେହି ଦୁର୍ବୃତ୍ତ ନକଲି ଆକାଉଣ୍ଟ ଖୋଲି ସହରର ଲୋକଙ୍କୁ ବନ୍ଧୁତା ଅନୁରୋଧ ପଠାଇବା ସହିତ ମୋବାଇଲ ନମ୍ବର ମାଗି ପରବର୍ତ୍ତୀ ସମୟରେ ହ୍ବାଟସଆପ ଜରିଆରେ ଯୋଗାଯୋଗ କରି ନିଜ ବନ୍ଧୁ ସିଆରପିଏଫ ଅଧିକାରୀ ଅଛନ୍ତି ଏବଂ ବଦଳି ଯୋଗୁଁ ନିଜର ଘରକରଣା ସାମଗ୍ରୀ ବିକ୍ରି କରିଦେବା ନେଇ ଲୋକଙ୍କୁ ଠକୁଥିବା ଦେଖିବାକୁ ମିଳିଥିଲା। ତେବେ ଏନେଇ ଗଣମାଧ୍ୟମ ପ୍ରତିନିଧି ଜିଲାପାଳ ଆଶୁତୋଷ କୁଲକର୍ଣ୍ଣିଙ୍କୁ ଅଭିଯୋଗ କରିବା ପରେ ଜିଲାପାଳ ଏସପିଙ୍କୁ ଅଭିଯୋଗ ଜଣାଇଥିଲେ ଏବଂ ପୋଲିସ ପଦକ୍ଷେପ ଗ୍ରହଣ କରିଥିଲା। ତେବେ ଏଠି ପ୍ରଶ୍ନ ଉଠୁଛି ଯେ, ଦେଶରେ ଏହିଭଳି ବିଭିନ୍ନ ସାଇବର ଅପରାଧ ଘଟୁଥିଲେ ମଧ୍ୟ ଏହା ପଛରେ ଥିବା ରାକେଟକୁ କେହି ଠାବ କାହିଁକି କରିପାରୁନାହାଁନ୍ତି। ତେଣୁ ଉଭୟ କେନ୍ଦ୍ର ଓ ରାଜ୍ୟ ସରକାର ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି ।
