ଭଦ୍ରକ ଅଫିସ, ୪।୨: ଭଦ୍ରକ ଗ୍ରାମାଞ୍ଚଳ ଥାନା ଅଧୀନ ଗୋପବନ୍ଧୁପୁର ଛକ ନିକଟରେ ୧୬ ନଂ. ଜାତୀୟ ରାଜପଥରେ ଶୁକ୍ରବାର ଅପରାହ୍ନରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଟ୍ରକ୍ ବାଇକ୍କୁ ଘୋଷାଡ଼ି ନେବାରୁ ଜଣେ ଯୁବକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ମୃତକ ହେଲେ ଭଦ୍ରକ ବ୍ଲକ ଆର୍ଏନ୍ ବେତଡ଼ା ପଞ୍ଚାୟତ ବୀରପଡ଼ା ଗ୍ରାମର ଧନେଶ୍ୱର ସାହୁଙ୍କ ପୁଅ ପ୍ରକାଶ। ଦୁର୍ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା। କ୍ଷତିପୂରଣ ଦାବି କରିବା ସହ ସ୍ଥାନୀୟ ଲୋକେ ମୃତଦେହ ଛାଡ଼ି ନ ଥିଲେ। ସିଟି ଡିଏସ୍ପି ଅଂଶୁମାନ ଦ୍ୱିବେଦୀ, ଟାଉନ ଥାନାଧିକାରୀ ଉମାଶଙ୍କର ନାୟକ ଓ ପୁରୁଣାବଜାର ଥାନାଧିକାରୀ ଆଲୋକ ଜେନା ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରି ମୃତଦେହ ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ।
ଅନୁଯାୟୀ, ପ୍ରକାଶ ବାଇକ୍ରେ ଭଦ୍ରକ ଆସୁଥିବା ବେଳେ ଉକ୍ତ ସ୍ଥାନରେ ତାଙ୍କ ଗ୍ରାମର ପ୍ରସନ୍ନ ପାତ୍ରଙ୍କ ସହ ଦେଖା ହୋଇଥିଲା। ନିଜ ବାଇକ୍ ଉପରେ ବସି ଉଭୟ ରାସ୍ତାପାର୍ଶ୍ୱରେ କଥା ହେଉଥିଲେ। ପଛପଟୁ ଦ୍ରୁତଗତିରେ ଆସୁଥିବା ଟ୍ରକ୍ ସେମାନଙ୍କୁ ଧକ୍କା ଦେବା ସହ ପ୍ରକାଶଙ୍କ ବାଇକ୍କୁ କିଛି ବାଟ ଘୋଷାଡ଼ି ନେଇଥିଲା। ଘଟଣାସ୍ଥଳରେ ପ୍ରକାଶଙ୍କର ମୃତ୍ୟୁ ଘଟିଥିବା ବେଳେ ବାଇକ୍ଟି ଭାଙ୍ଗିରୁଜି ଚୁର୍ମାର୍ ହୋଇଯାଇଛି। ପ୍ରସନ୍ନଙ୍କୁ ଗୁରୁତର ଅବସ୍ଥାରେ ଭଦ୍ରକର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଟ୍ରକ୍ଟି ଖସି ପଳାଇ ଯାଉଥିବାବେଳେ ଖବରପାଇ ପିସିଆର୍ ପୋଲିସ ନୂଆ ବସ୍ଷ୍ଟାଣ୍ଡ ନିକଟରେ ଅଟକାଇ ଗ୍ରାମାଞ୍ଚଳ ଥାନାକୁ ଆଣି ଚାଳକଙ୍କୁ ଅଟକ ରଖିଛି।
