ଵ୍ରହ୍ମପୁର,୨୦।୪(ସୁବାସ ଚନ୍ଦ୍ର ପାଢ଼ୀ): କୋର୍ଟ ପରିସରରେ ହାତରେ ଖଣ୍ଡା ଧରି ଜଣେ ଯୁବକଙ୍କ ଉନ୍ମତ୍ତ କାଣ୍ଡ । ଲୋକଙ୍କୁ ଗାଳିଗୁଲଜ ସହ ଭୟଭୀତ କରିବା ଅଭିଯୋଗରେ ପୋଲିସ ଅଭିଯୁକ୍ତଙ୍କୁ ବାନ୍ଧିଛି। ଅଭିଯୁକ୍ତ ହେଲେ ବୈଦ୍ୟନାଥପୁର ଥାନା ଅନ୍ତର୍ଗତ ପିଡବ୍ଲ୍ୟୁଡି କଲୋନୀରେ ରହୁଥିବା ସୁଶାନ୍ତ ପାଢ଼ୀ(୪୫)। ମାମଲା ନଂ୧୮୨/୨୬ ରେ ତାଙ୍କୁ ଗିରଫ କରାଯାଇଛି।
ପୋଲିସ ଅଭିଯୁକ୍ତଙ୍କ ଠାରୁ ଗୋଟିଏ ଖଣ୍ଡା ଜବତ କରିଛି। ପ୍ରାଥମିକ ତଦନ୍ତରୁ ସେ ଜଣେ ଗଛ କଟାଳି ବୋଲି ଜଣାପଡିଛି । ସେ ମାତ୍ରାଧିକ ନିଶାପନ କରି ଏଭଳି କାଣ୍ଡ ଘଟାଇଥିବା ନେଇ ଅନୁମାନ କରାଯାଉଛି । ତେବେ ତାଙ୍କୁ କୋର୍ଟ ଭିତରକୁ କେଉଁ ଠିକାଦାର ପଠାଇଥିଲେ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ । ଅନ୍ୟପଟେ କୋର୍ଟ ପରିସରରେ ମାରଣାସ୍ତ୍ର ଧରି ବୁଲିବା ସହ ଲୋକଙ୍କୁ ଆତଙ୍କିତ କରିବା ଅଭିଯୋଗରେ ତାଙ୍କୁ ଗିରଫ କରାଯାଇଥିବା ପୋଲିସ କହିଛି। ପୂର୍ବରୁ ତାଙ୍କରି ନାମରେ କୌଣସି ଅପରାଧିକ ମାମଲା ନଥିବା ଜଣାପଡିଛି।
ଘଟଣାରୁ ପ୍ରକାଶ ଯେ ସୋମବାର ଅପରାର୍ହ୍ନରେ ଜଣେ ଯୁବକ ନିଶାଶକ୍ତ ଅବସ୍ଥାରେ ହାତରେ ଖଣ୍ଡା ଧରି କୋର୍ଟ ପରିସରରେ ଘୁରି ବୁଲୁଥିଲେ। ଏପରିକି ସେ ବିଭିନ୍ନ ଅଶ୍ଳୀଳ ଭାଷାରେ ଗାଳି ଗୁଳଜ କରୁଥିଲେ। ଲୋକମାନେ ଏହାଦେଖି ଭୟଭୀତ ହୋଇଥିଲେ। ପରେ ସେଠାରେ କାର୍ଯ୍ୟରତ କିଛି ଆଇନଜୀବୀ ପୋଲିସକୁ ଖବର କରିଥିଲେ । ପରେ ବୈଦ୍ୟନାଥପୁର ପୋଲିସ ସେଠାରେ ପହଞ୍ଚି ଉକ୍ତ ଯୁବକଙ୍କୁ କାବୁ କରିଥିଲା। ଘଟଣାର ବିଭିନ୍ନ ଦିଗକୁ ନେଇ ତଦନ୍ତ କରାଯାଉଛି ବୋଲି ପୋଲିସ କହିଛି ।