ଦେବଗଡ଼,୩୦ା୭(ଶଶାଙ୍କ ଶେଖର ଝାଙ୍କର): ଦେବଗଡ଼ ଥାନା ଅନ୍ତର୍ଗତ ସୁନାମୁଣ୍ଡା ଗ୍ରାମରେ ପିସ୍ତଲ ମୁନରେ ଭୟଭୀତ କରି ହତ୍ୟା ଧମକ ଦେଇଥିବା ଜଣେ ଯୁବକକୁ ପୋଲିସ ଗିରଫ କରିଛି। ଏହା ସହିତ ଏକ ଦେଶୀ ପିସ୍ତଲ ଏବଂ ଏକନଳୀ (ସିଙ୍ଗେଲ ବ୍ୟାରେଲ) ବନ୍ଧୁକର ବିଭିନ୍ନ ଯନ୍ତ୍ରାଂଶ ଜବତ କରାଯାଇଛି। ଗୁରୁବାର ଜିଲା ପୋଲିସ ମୁଖ୍ୟାଳୟରେ ଆୟୋଜିତ ଏକ ଖବରଦାତା ସମ୍ମିଳନୀରେ ଅତିରିକ୍ତ ଆରକ୍ଷୀ ଅଧିକ୍ଷକ ଧୀରଜ ଚୋପଦାର ଏହି ସୂଚନା ଦେଇଛନ୍ତି।
ପୋଲିସର ସୂଚନା ଅନୁଯାୟୀ, ବୁଧବାର ସନ୍ଧ୍ୟା ପ୍ରାୟ ୬ଟା ସମୟରେ ସୁନାମୁଣ୍ଡା ଗ୍ରାମର ସ୍ୱର୍ଗତ ସନାତନ ବେହେରାଙ୍କ ପୁଅ ରୋହିତ ବେହେରା ସେହି ଗ୍ରାମର ରଘୁନାଥ ନାୟକଙ୍କ ଘରକୁ ଯାଇଥିଲେ। ସେଠାରେ ରଘୁନାଥ ଏବଂ ତାଙ୍କ ସମ୍ପର୍କୀୟାଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ହାତରେ ଥିବା ଏକ ଦେଶୀ ପିସ୍ତଲ ଦେଖାଇ ଜୀବନରେ ମାରିଦେବାକୁ ଧମକ ଦେଇଥିଲେ। ଗ୍ରାମବାସୀମାନେ ଏକତ୍ରିତ ହୋଇ ସାହସିକତାର ସହ ରୋହିତକୁ କାବୁ କରିବା ସହ ତା’ ହାତରୁ ପିସ୍ତଲ ଛଡ଼ାଇ ପୋଲିସକୁ ଖବର ଦେଇଥିଲେ।
ପୋଲିସ ଅଭିଯୁକ୍ତ ରୋହିତକୁ ଗିରଫ କରି ପଚରାଉଚରା କରିବା ପରେ ସେ ଏହି ପିସ୍ତଲଟି ନିଜ ଗ୍ରାମର ଜୁନୁ କାରିଗରଠାରୁ କିଣିଥିବା ପ୍ରକାଶ କରିଥିଲା। ଏହାକୁ ଆଧାର କରି ପୋଲିସ ବନ୍ଧୁକ ବିକ୍ରେତା ଜୁନୁ କାରିଗରର ଘରେ ଚଢ଼ଉ କରି ଏକ ଦେଶୀ ସିଙ୍ଗେଲ ବ୍ୟାରେଲ ବନ୍ଧୁକର ନଳୀ ଓ ଅନ୍ୟାନ୍ୟ ଯନ୍ତ୍ରାଂଶ ଜବତ କରିଥିଲା। ତେବେ ଘଟଣାସ୍ଥଳରେ ଜୁନୁ ନ ଥିବାରୁ ପୋଲିସ ତାକୁ ଗିରଫ କରିପାରି ନାହିଁ।
ଉଭୟ ରୋହିତ ଏବଂ ଜୁନୁଙ୍କ ବିରୁଦ୍ଧରେ ଆର୍ମସ୍ ଆକ୍ଟ ସମେତ ବିଭିନ୍ନ ଦଫାରେ ମାମଲା ରୁଜୁ କରାଯାଇଛି। ଗିରଫ ରୋହିତକୁ ଗୁରୁବାର କୋର୍ଟ ଚାଲାଣ କରାଯାଇଥିବା ବେଳେ ଫେରାର୍ ଥିବା ବନ୍ଧୁକ ବିକ୍ରେତା ଜୁନୁକୁ ଖୁବ୍ ଶୀଘ୍ର ଗିରଫ କରାଯିବ ବୋଲି ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀ ଚୋପଦାର ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ଦେବଗଡ଼ ଥାନା ଅଧିକାରୀ ଶବ୍ୟସାଚୀ ଶତପଥୀ ଏବଂ ତଦନ୍ତକାରୀ ସବ୍-ଇନ୍ସପେକ୍ଟର ବିନୟ କୁମାର ପରିଡ଼ା ମଧ୍ୟ ଉପସ୍ଥିତ ଥିଲେ।