ଖୋର୍ଦ୍ଧା ଅଫିସ,୨୬ା୧୧: ଖୋର୍ଦ୍ଧାରେ ନିଶା କାରବାର ବଢିଚାଲିଛି। ସହରରୁ ଗ୍ରାମାଞ୍ଚଳ ପର୍ଯ୍ୟନ୍ତ ଚେର ଲମ୍ବିଛି। ବାଲେଶ୍ୱର, ଭୁବନେଶ୍ୱର ପ୍ରଭୃତି ସ୍ଥାନରୁ ବ୍ରାଉନସୁଗାର ଆସୁଛି। ବିଶେଷକରି ବେକାର ଯୁବକ ଓ କଲେଜ ପଢୁଆ ଛାତ୍ର ଏହି ନିଶା କାରବାରରେ ସମ୍ପୃୃକ୍ତି ଥିବା ଦେଖିବାକୁ ମିଳିଛି। ସ୍ବଳ୍ପ ସମୟରେ ଅଧିକ ରୋଜଗାର ଆଶାରେ ଯୁବପିଢି ବ୍ରାଉନସୁଗାର ସମେତ ଅନ୍ୟ ନିଶା କାରବାରକୁ ଆପଣାଉଛନ୍ତି। ଗୁରୁଜଙ୍ଗ, ସାମାନ୍ତରାପୁର, ଠେଙ୍ଗାହାଟ, ଭାଲିଆବାଡ଼ି ଏବଂ ସହର ତଳି ଅଞ୍ଚଳରେ ନିଶା ବିକ୍ରି ଓ ସେବନ ହେଉଛି। ଗତ ମାସରେ ଏସ୍ଟିଏଫ୍ ଗୁରୁଜଙ୍ଗରୁ ଜଣେ ବିଟେକ୍ ଛାତ୍ରଙ୍କଠାରୁ ଏକ କେଜି ଧଳାଜହର ଜବତ କରିଥିଲା। ଏହାର କିଛିଦିନ ପରେ ନୂଆବସଷ୍ଟାଣ୍ଡରେ ୨ଜଣ ଯୁବକଙ୍କଠାରୁ ଏକ କେଜିରୁ ଊର୍ଦ୍ଧ୍ୱ ବ୍ରାଉନସୁଗାର ଜବତ ହୋଇଥିଲା। ବୁଧବାର ଖୋର୍ଦ୍ଧା ଥାନା ଅଧୀନ ତରତୁଆ ଅଞ୍ଚଳରୁ ପ୍ରମୋଦ ପଣ୍ଡାଙ୍କଠାରୁ ୨୫୩ ଗ୍ରାମ ଏବଂ ବିଡିଏ କଲୋନୀରୁ ୫୦.୫ ଗ୍ରାମର ଧଳାଜହର ଜବତ କରାଯିବା ସହ ଭାଲିଆବାଡ଼ିି ଟାଙ୍ଗିସାହିର ସୋମନାଥ ବରାଳ, ଶଅରସାହିର ଅବିନାଶ ପାତ୍ର ଏବଂ ସାମନ୍ତରାପୁରର ଆତ୍ତର୍ର୍ତ୍ରାଣ ବେହେରାଙ୍କୁ ଗିରଫ କରାଯାଇଛି। ଏମାନଙ୍କ ବୟସ ୨୦ରୁ ୨୫ ବର୍ଷ ମଧ୍ୟରେ ବୋଲି ଜଣାପଡ଼ିଛି। ଏହି ଘଟଣାରୁ ନିଶା କାରବାରରେ ଯୁବବର୍ଗଙ୍କ ସମ୍ପୃକ୍ତି ସାମ୍ନାକୁ ଆସିଛି। ଏହା ବୁଦ୍ଧିଜୀବୀଙ୍କୁ ଚିନ୍ତାରେ ପକାଇଛି।
ଏ ନେଇ ନିଶାମୁକ୍ତି ଅଭିଯାନର ଅଧ୍ୟକ୍ଷ ରାମଶଙ୍କର କହିଛନ୍ତି, ଆଜିର ଯୁବପିଢି ନିଶା କାରବରେ ଲିପ୍ତ ରହୁଥିବା ଦେଖିବାକୁ ମିଳିଛି। ଦେଶର ଏହି ଭବିଷ୍ୟତ ଏବେ ବିପଥଗାମୀ ହେବାରେ ଲାଗିଛନ୍ତି। ଏହା ଚିନ୍ତାଜନକ କଥା। ଏଥିଲାଗି ଆଗାମୀ ଦିନରେ ଆମ ଅନୁଷ୍ଠାନ ପକ୍ଷରୁ ବ୍ୟାପକ ସଚେତନତା କାର୍ଯ୍ୟକ୍ରମ କରାଯିବ। ସେହିପରି ବୁଦ୍ଧିଜୀବୀ ପ୍ରଭାତ ମିଶ୍ର କହିଛନ୍ତି, ଖୋର୍ଦ୍ଧା ଏକ ବୀରମାଟି। ଏହାର ଏକ ଗୌରବମୟ ଇତିହାସ ରହିଛି। ତେବେ ନିଶା କାରବାର ଯୋଗୁ ଏହାର ବାତାବରଣ ଦିନକୁ ଅଶାନ୍ତ ହେବାରେ ଲାଗିଛି। ବିଶେଷତଃ ଯୁବପିଢି ଏଥିରେ ସଂପୃକ୍ତି ରହିବା ଚିନ୍ତାଜନକ ବିଷୟ। ଏ ଦିଗରେ ବ୍ୟାପକ ସଚେତନତା କାର୍ଯ୍ୟକ୍ରମର ଆବଶ୍ୟକତା ରହିଛି। ଯୁବ ସାମାଜିକକର୍ମୀ ଅବ୍ୟକ୍ତ ହରିହର ଖାଡ଼ଙ୍ଗାଙ୍କ ମତରେ ଯୁବପୀଢ଼ିି ଦେଶର ସମ୍ପତ୍ତି। ସେମାନଙ୍କ ପ୍ରଗତିରେ ଦେଶର ପ୍ରଗତି। ସେମାନେ ପଥଭ୍ରଷ୍ଟ ହେଲେ ସମାଜର କ୍ଷତି ଘଟିବ। ଏଥିଲାଗି ସମସ୍ତଙ୍କ ଉତ୍ତରଦାୟିତ୍ୱ ରହିଛି। ଯୁବପୀଢ଼ିଙ୍କ ଗତିବିଧି ଉପରେ ପରିବାରବର୍ଗ ନଜର ରଖିବା ଉଚିତ। ସେହିପରି ପୂର୍ବତନ କୁଳପତି ମେଜର କ୍ଷୀରୋଦ ପ୍ରସାଦ ମହାନ୍ତି କହିଛନ୍ତି, କମ୍ ସମୟରେ ପ୍ରଚୁର ଅର୍ଥ ଉପାର୍ଜନ ଲାଳସାରେ ଯୁବପୀଢ଼ି ନିଶା କାରବାର କରୁଛନ୍ତି। ଏହା ଚିନ୍ତାଜନକ ବିଷୟ। ଏଥିଲାଗି ଜିଲା ପ୍ରଶାସନ, ବିଭିନ୍ନ ସାମାଜିକ ଓ ଶିକ୍ଷାନୁଷ୍ଠାନ ପକ୍ଷରୁ ସଚେତନତା କରାଯିବାର ଆବଶ୍ୟକତା ରହିଛି। ଅନ୍ୟପକ୍ଷରେ ଏସ୍ପି ରାଜକିଶୋର ଦୋରା କହିଛନ୍ତି, ଖୋର୍ଦ୍ଧାରେ ନିଶା କାରବାର ରୋକିବା ପାଇଁ ପୋଲିସ ପକ୍ଷରୁ ସ୍ବତନ୍ତ୍ର ଡ୍ରାଇଭ ଚାଲିଛି। ବିଭିନ୍ନ ସମୟରେ ଚଢ଼ାଉ କରାଯାଇ ନିଶା ବେପାରୀଙ୍କୁ ଗିରଫ କରାଯାଉଛି।
