ନୂଆଦିଲ୍ଲୀ, ୧୩।୭: ଜନ ଗହଳିପୂର୍ଣ୍ଣ ସ୍ଥାନରେ ବାଇକରେ ଷ୍ଟଣ୍ଟ କରୁଥିବା କିଛି ଯୁବକଙ୍କୁ ଏପରି ନ କରିବା ପାଇଁ ବାରଣ କରିବା ଜଣେ ବ୍ୟକ୍ତିଙ୍କ ପାଇଁ ମହଙ୍ଗା ପଡ଼ିଛି। ଯାହାର ଫଳସ୍ବରୂପ ଯୁବକମାନେ ରାଗିଯାଇ ସେହି ବ୍ୟକ୍ତିଙ୍କୁ ଛୁରୀ ଭୁସି ହତ୍ୟା କରିଛନ୍ତି। ଏଭଳି ଏକ ଘଟଣା ପଶ୍ଚିମ ଦିଲ୍ଲୀର ରଘୁବୀର ନଗରରେ ଘଟିଯାଇଛି। ସ୍ଥାନୀୟ ଅଞ୍ଚଳର ମନୀଷ ନାମକ ଜଣେ ବ୍ୟକ୍ତି ପେଶାରେ ଜଣେ କାର ଚାଳକ ଥିଲେ। ଗତ ସପ୍ତାହରେ ୧୭ ବର୍ଷୀୟ ଜଣେ ନାବାଳକ ଏବଂ ତାଙ୍କର ଦୁଇଜଣ ସାଙ୍ଗ ଜନଗହଳିପୂର୍ଣ୍ଣ ରାସ୍ତା ବିପଦପୂର୍ଣ୍ଣ ଭାବେ ବାଇକ୍ରେ ଷ୍ଟଣ୍ଟ କରି ଯାଉଥିଲେ। ମନୀଷ ସେମାନଙ୍କୁ ଅଟକାଇ ଏପରି ନ କରିବା ପାଇଁ ପରାମର୍ଶ ଦେଇଥିଲେ। ଏହାକୁ ନେଇ ଉଭୟ ପକ୍ଷ ମଧ୍ୟରେ କଥା କଟାକଟି ହୋଇଥିଲା। ଶେଷରେ ମୁଖ୍ୟ ଅଭିଯୁକ୍ତ ନାବାଳକଙ୍କ ସମେତ ତାଙ୍କର ୨ ସାଙ୍ଗ ଛୁରୀରେ ମନୀଷଙ୍କୁ ମରଣାନ୍ତକ ଆକ୍ରମଣ କରି ଫେରାର ହୋଇଯାଇଥିଲେ। ଏହାପରେ ସ୍ଥାନୀୟ ଲୋକ ମନୀଷଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ ମଧ୍ୟ ସେତେବେଳକୁ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ଅଭିଯୁକ୍ତମାନେ ମନୀଷଙ୍କ ଶରୀରକୁ ଛୁରୀରେ ୨୮ଥର ଆକ୍ରମଣ କରିଥିବା ଜଣାପଡ଼ିଛି। ଏହି ଘଟଣାରେ ପୋଲିସ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭିକୁ ଯାଞ୍ଚ କରି ୩ ଅଭିଯୁକ୍ତଙ୍କୁ ଗରିଫ କରିବାରେ ସଫଳ ହୋଇଛି।
