ବ୍ରହ୍ମପୁର ଅଫିସ,୨୪ା୯: ବ୍ରହ୍ମପୁର ବଡ଼ବଜାର ଥାନା ଅନ୍ତର୍ଗତ ପୁରୁଣା ବ୍ରହ୍ମପୁର ମେଣ୍ଟୁଛକ ନିକଟସ୍ଥ ରାଧାକୃଷ୍ଣ ମନ୍ଦିର ପରିସରରେ ଏକ ନିର୍ମମ ହତ୍ୟାକାଣ୍ଡ ଘଟିଛି। ଜଣେ ଯୁବକଙ୍କୁ କିଛି ଦୁର୍ବୃତ୍ତ ପଥରରେ ଛେଚି ହତ୍ୟା କରିବା ଘଟଣା ପ୍ରଚାର ହେବା ପରେ ବ୍ରହ୍ମପୁର ସହରରେ ଚାଞ୍ଚଲ୍ୟ ସୃଷ୍ଟି ହୋଇଛି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ସାଇଣ୍ଟିଫିକ୍ ଟିମ୍ ଓ ଡଗ୍ ସ୍କ୍ବାଡ ସହାୟତାରେ ତଦନ୍ତ ଆରମ୍ଭ କରିଛି। ମୃତ ଯୁବକଙ୍କ ନାମ କାଳିଆ ସାହୁ(୩୦) ବୋଲି ବଡ଼ ବଜାର ଥାନା ଅଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି। ତାଙ୍କର ଘର ଜେନାସାହିରେ। ଏ ନେଇ ବଡ଼ବଜାର ଥାନାରେ ୧୯୬/୨୦ରେ ଏକ ହତ୍ୟା ମାମଲା ରୁଜୁ ହୋଇଛି।
ସୂଚନାଯୋଗ୍ୟ, ପ୍ରତିଦିନ ଭଳି ବୁଧବାର ରାତିରେ ପୂଜକ ମନ୍ଦିର ଫାଟକରେ ତାଲା ପକାଇ ଘରକୁ ଯାଇଥିଲେ। ରାତିରେ ମନ୍ଦିରର ଜଗୁଆଳି ଆସିଥିଲେ। ବିଳମ୍ବିତ ରାତିରେ ମନ୍ଦିର ପରିସରରେ ଥିବା ରୋଷେଇଶାଳାର ବାରଣ୍ଡାରେ ଜଣେ ଯୁବକଙ୍କ ରକ୍ତାକ୍ତ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ଏ ନେଇ ତୁରନ୍ତ ସେ ମନ୍ଦିର ପୂଜକ ଓ ଟ୍ରଷ୍ଟିଙ୍କୁ ଖବର କରିଥିଲେ। ମନ୍ଦିର ଟ୍ରଷ୍ଟି ଘଟଣାସ୍ଥଳରେ ପହଞ୍ଚି ଯୁବକଙ୍କ ମୃତଦେହ ଦେଖି ପୋଲିସକୁ ଖବର କରିଥିଲେ। ଭୋର୍ ସମୟରେ ବଡ଼ବଜାର ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା। ଟାଉନ ଏସ୍ଡିପିଓ ବିଷ୍ଣୁପ୍ରସାଦ ପତି, ବଡ଼ବଜାର ଥାନାଧିକାରୀ ପ୍ରମୁଖ ତଦନ୍ତ ଆରମ୍ଭ କରିଥିଲେ। କାଳିଆଙ୍କ ମା’ ବାସନ୍ତୀ ସାହୁ ପୁଅର ମୃତଦେହ ଚିହ୍ନଟ କରିଛନ୍ତି। କାଳିଆ କିଛିଦିନ ହେଲା ମନ୍ଦିରରେ ରଙ୍ଗ ଦେବା କାମ କରୁଥିଲେ। ରାତିରେ ସେ ମନ୍ଦିର ପରିସରରେ ହିଁ ଶୋଇ ପଡ଼ନ୍ତି ବୋଲି ପୋଲିସ କହିଛି। ପୋଲିସ କାଳିଆଙ୍କ ମୃତଦେହ ନିକଟରୁ ଦୁଇଟି ରକ୍ତଲଗା ସିମେଣ୍ଟ ଇଟା ଜବତ କରିଛି। ତାଙ୍କ ମୁଣ୍ଡକୁ ସେହି ଇଟାରେ ଛେଚି ହତ୍ୟା କରାଯାଇଥିବା ପୋଲିସ ସନ୍ଦେହ କରୁଛି। ନିକଟରୁ ଏକ ଗଞ୍ଜେଇ ଚିଲମ, ଦିଆସିଲି ମଧ୍ୟ ଜବତ ହୋଇଛି। ବୁଧବାର ରାତିରେ କାଳିଆ ସହିତ କିଛି ଯୁବକ ଗଞ୍ଜେଇ ଟାଣିବା ପରେ କୌଣସି ଏକ କଥାକୁ ନେଇ ଗଣ୍ଡଗୋଳର ସୂତ୍ରପାତ ହୋଇଥିବା ନେଇ ପୋଲିସ ଅନୁମାନ କରୁଛି। ଏହାପରେ ସେହି ଯୁବକମାନେ କାଳିଆଙ୍କ ମୁଣ୍ଡକୁ ପଥରେ ଛେଚି ହତ୍ୟା କରିଥିବା ପୋଲିସ ଅନୁମାନ କରୁଛି। ଉକ୍ତ ରାତିରେ କାଳିଆଙ୍କ ସହିତ ଥିବା ୪ ଯୁବକଙ୍କୁ ପୋଲିସ ଥାନାରେ ଅଟକ ରଖି ତଦନ୍ତ ଜାରି ରଖିଛି।
