ଭଦ୍ରକ ଅଫିସ, ୨୪ା୨: ପୁଣେରେ କାର୍ଯ୍ୟରତ ଭଦ୍ରକ ଜିଲା ଧୂଷୁରୀ ଥାନା ଅଧୀନ ଅନଳଡିହ ଗ୍ରାମର ବାସୁଦେବ ନାୟକ ନାମକ ଯୁବକଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଛି। ସୂଚନା ଅନୁଯାୟୀ, ବାସୁଦେବ ପୁନେରେ ଏକ ଘରୋଇ କମ୍ପାନୀରେ ୧୦ବର୍ଷରୁ ଊଦ୍ଧର୍ବ ହେଲା କାମ କରିଆସୁଥିଲେ। ଗତ ୧୬ ତାରିଖରେ ଏକ ଟାଟାମ୍ୟାଜିକରେ କମ୍ପାନୀର ମାଲ୍ ନେଇ ଆସୁଥିବା ବେଳେ ଉକ୍ତ ଗାଡ଼ିର ଚକ ଲିକ୍ ହୋଇଯାଇଥିଲା। ଡ୍ରାଇଭର ଓ ବାସୁଦେବ ଷ୍ଟେପିନ ଲଗାଉଥିବା ବେଳେ ଦ୍ରୁତଗତିରେ ଆସୁଥିବା ଏକ କାର୍ ସେମାନଙ୍କୁ ଧକ୍କା ଦେଇଥିଲା। ଏଥିରେ ଟାଟାମ୍ୟାଜିକ ଡ୍ରାଇଭରଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ବାସୁଦେବଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ମୃତଦେହ ଗ୍ରାମରେ ପହଞ୍ଚିବା ପରେ ଶୋକାକୁଳ ପରିବେଶ ମଧ୍ୟରେ ଶେଷକୃତ୍ୟ ସମ୍ପନ୍ନ ହୋଇଥିଲା। ମୃତ ବାସୁଦେବଙ୍କର ସ୍ତ୍ରୀ ଓ ୨ ପୁଅ ଥିବାବେଳେ ପରିବାର ଏବେ ଅସହାୟ ହୋଇପଡ଼ିଛନ୍ତି।
