ଜଗତ୍ସିଂହପୁର ଅଫିସ,୧୧।୭: କରୋନା ଭୂତାଣୁ ଓ ଲକ୍ଡାଉନ୍, ଶଟ୍ଡାଉନଜନିତ ପରିସ୍ଥିତି ଯୋଗୁ ଅନେକେ ଚାକିରି ହରାଇ ବେରୋଜଗାର ହୋଇଯାଇଛନ୍ତି। ହଜାର ହଜାର ଲୋକ ହାତବାନ୍ଧି ହତାଶ ହୋଇ ବସିଛନ୍ତି। କିନ୍ତୁ ଏପରି ଏକ ସଙ୍କଟ ସମୟକୁ ସୁଯୋଗରେ ପରିଣତ କରିଦେଇଛନ୍ତି ଜଗତ୍ସିଂହପୁର ବ୍ଲକ ତରଡ଼ାପଡ଼ା ପଞ୍ଚାୟତ ଆନନ୍ଦପୁର ଗ୍ରାମର ଯୁବ ସଫ୍ଟୱେର ଇଞ୍ଜିନିୟର ସ୍ବପ୍ନେଶ ମହାନ୍ତି (୩୨)। ମହାମାରୀ ପାଇଁ ବାଙ୍ଗାଲୋରସ୍ଥିତ ଏକ ସଫ୍ଟୱେର କମ୍ପାନୀରୁ ଗଁ।କୁ ଫେରିଥିବା ସ୍ବପ୍ନେଶ ଉନ୍ନତ ଜ୍ଞାନକୌଶଳ ତଥା ବାୟୋଫ୍ଲକ୍ ପ୍ରଣାଳୀରେ ପଲିଥିନ ଟାଙ୍କିରେ ମାଛ ଚାଷ କରି ଲକ୍ଷାଧିକ ଟଙ୍କା ଲାଭ କମାଇବା ଯୋଜନାରେ ରହିଛନ୍ତି।
ସ୍ବପ୍ନେଶ କହିଛନ୍ତି, ବାଙ୍ଗାଲୋରରୁ ପଳାଇ ଆସିବା ପରେ ଘରେ ଅଯଥାରେ ବସି ସମୟ ନଷ୍ଟ କରିବାକୁ ଚାହିଁ ନ ଥିଲି। ତେଣୁ ଆଧୁନିକ ଜ୍ଞାନକୌଶଳରେ କି ଚାଷ କରି ଲାଭବାନ ହୋଇପାରିବି ସେ ନେଇ ଇଣ୍ଟରନେଟରେ ସର୍ଚ୍ଚ କରିଥିଲି। ଶେଷରେ ବାୟୋଫ୍ଲକ ଫିସ୍ ଫାର୍ମିଂ ପାଇଁ ନିଷ୍ପତ୍ତି ନେଇଥିଲି। ଏପ୍ରିଲ ୨୮ରେ ନିଜ ବାଡ଼ିରେ ମାତ୍ର ୪ ମିଟର ବ୍ୟାସ ଓ ୧.୩ ମିଟର ଉଚ୍ଚତାର ୨ଟି ଗୋଲେଇ ପଲିଥିନ କୁଣ୍ଡ କରି ସେଥିରେ ଭୁବନେଶ୍ୱର କୌଶଲ୍ୟାଗଙ୍ଗସ୍ଥିତ ସିଫାରୁ ୪ରୁ ୫ଗ୍ରାମ ଓଜନ ବିଶିଷ୍ଟ ୨ ହଜାର ରୁପ-ଚାନ୍ଦି ମାଛ ଯାଆଁଳ କିଣି ଛାଡିଥିଲି। ମାଛଗୁଡ଼ିକ ଏବେ ପାଖାପାଖି ୮୦ରୁ ୧୦୦ ଗ୍ରାମର ହୋଇଗଲେଣି। ଯାଆଁଳ ଯନତ୍ ନେବା, ଦାନା ଦେବା, ପାଣିସ୍ତର ଠିକ୍ ରଖିବା, ପ୍ରତି ସପ୍ତାହରେ ଥରେ ପାଣିର ଟିଡିଏସ୍ ଯାଞ୍ଚ କରିବା ସହିତ ଆବଶ୍ୟକ ଔଷଧ ଯୋଗାଉଛି। ଆଉ ୩ରୁ ୪ ମାସରେ ପ୍ରତି ମାଛର ଓଜନ ୫ରୁ ୬ଶହ ଗ୍ରାମ ହୋଇଯିବା ଆଶା ରହିଛି। ଏସବୁ ବାବଦରେ ପାଖାପାଖି ୧.୧୦ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଠିକ୍ ଭାବେ ବଢ଼ିଲେ ୫ କୁଇଣ୍ଟାଲ ମାଛ ମିଳିବ ଓ କୁଣ୍ଡପିଛା ୩୦ରୁ ୪୦ ହଜାର ଟଙ୍କା ଲାଭ ପାଇହେବ। ପ୍ରଥମେ ପରିବାର ପକ୍ଷରୁ ସମର୍ଥନ ମିଳି ନ ଥିବାବେଳେ ଏବେ ବାପା ଯଜ୍ଞେଶ୍ୱର ପ୍ରୋତ୍ସାହିତ କରୁଛନ୍ତି। ସେ ଚାକିରିକୁ ଗଲାପରେ ବାପା ଦାୟିତ୍ୱ ସମ୍ଭାଳିବେ ବୋଲି ସ୍ବପ୍ନେଶ କହିଛନ୍ତି। ପୁଅଠାରୁ ତାଲିମ ପାଇ ସାରିଛନ୍ତି ବୋଲି ବାପା ଯଜ୍ଞେଶ୍ୱର ମଧ୍ୟ କହିଛନ୍ତି।
ଏ ସମ୍ପର୍କରେ ଜିଲା ମତ୍ସ୍ୟ ଅଧିକାରୀ ସୁବ୍ରତ ଦାସ କହିଛନ୍ତି, ବାସ୍ତବିକ ଯୁବଗୋଷ୍ଠୀ ଏଥିପ୍ରତି ଆକର୍ଷିତ ହେବା ଉଚିତ। କାରଣ କମ୍ ଜାଗା, ପାଣିରେ ପ୍ରଦୂଷଣମୁକ୍ତ ମାଛ ଚାଷ କରିହେବ। ଇତିମଧ୍ୟରେ ଜିଲାରେ ଯୁବଗୋଷ୍ଠୀଙ୍କ ନିଜ ଉଦ୍ୟମରେ ୮/୧୦ଟି ପ୍ରକଳ୍ପ ହୋଇ ସାରିଲାଣି। ସରକାର ଜୁଲାଇରେ ଏହି ଯୋଜନାର ଶୁଭାରମ୍ଭ କରିଛନ୍ତି। ଯୋଜନା ମୁତାବକ ଜଳଙ୍ଗ, ରୁପଚାନ୍ଦି, ପିଲାକିଆ, ମାଗୁର ଓ କଉ ଆଦି ମାଛ ଚାଷ ପାଇଁ ପ୍ରୋତ୍ସାହିତ କରାଯିବ। ରୋହି, ଭାକୁର ଚାଷ ବ୍ୟାପକ ହୋଇନାହିଁ। ଗୋଟିଏ ୪ ମିଟର ବ୍ୟାସାର୍ଦ୍ଧବିଶିଷ୍ଟ କୁଣ୍ଡରେ ୧୦ ହଜାର ଲିଟର ପାଣି ଭରିଲେ ସେଥିରୁ ୫/୬ ମାସରେ ୫ କୁଇଣ୍ଟାଲ ମାଛ ଉତ୍ପାଦନ ହୋଇପାରିବ। ତେବେ ସରକାରଙ୍କ ତରଫରୁ ସାଧାରଣ ବର୍ଗଙ୍କ ପାଇଁ ରିହାତି ବ୍ୟବସ୍ଥା ଥିବା ଦାଶ ସୂଚନା ଦେଇଛନ୍ତି।
