୨୦୨୦ ମସିହା ଶେଷ ହେବାକୁ ବସିଲାଣି। ବର୍ଷର ଶେଷ ଅର୍ଥାତ୍ ଡିସେମ୍ବର ଆରମ୍ଭ ହୋଇଯାଇଛି। ମହାମାରୀ କରୋନା ଯୋଗୁ ଏହି ବର୍ଷ କାହାପାଇଁ ଭଲ ରହିନାହିଁ। ସମସ୍ତେ କରୋନା ଭୟରେ ଜୀବନ ବିତାଉଛନ୍ତି। ଚଳିତବର୍ଷ ସାଧାରଣ ଲୋକଙ୍କଠାରୁ କଳାକାରଙ୍କ ପର୍ଯ୍ୟନ୍ତ ସମସ୍ତଙ୍କ ପାଇଁ ସବୁଠାରୁ ଖରାପ ବର୍ଷ କହିଲେ ଅତ୍ୟୁକ୍ତି ହେବ ନାହିଁ। ଟିଭି ଇଣ୍ଡଷ୍ଟ୍ରି ଏହି ବର୍ଷ ଅନେକ କଳାକାରଙ୍କୁ ହରାଇଛି। କିଏ ଆତ୍ମହତ୍ୟା କରିଛନ୍ତି ତ ଆଉ କାହାର କରୋନାରେ ମୃତ୍ୟୁ ଘଟିଛି। ଜାଣିବା ସେହିସବୁ କଳାକାରଙ୍କ ବିଷୟରେ…
ମନମିତ ଗ୍ରଓ୍ବୋଲ: ଛୋଟ ପରଦାରେ ପ୍ରସାରିତ ଲୋକପ୍ରିୟ ଧାରାବାହିକ ‘ଆଦସ ସେ ମଜବୁର’ କଳାକାର ମନମିତ ଗ୍ରଓ୍ବୋଲ ମାତ୍ର ୩୨ ବର୍ଷ ବୟସରେ ଆତ୍ମହତ୍ୟା କରିଥିଲେ। ଗତ ମେ’ ୧୫ ତାରିଖରେ ସେ ମୁମ୍ବାଇସ୍ଥିତ ନିଜ ଆପାର୍ଟମେଣ୍ଟରେ ଆତ୍ମହତ୍ୟା କରିଥିଲେ। ଡିପ୍ରେସନ ଯୋଗୁ ସେ ଆତ୍ମହତ୍ୟା କରିଥିବା କୁହାଯାଉଛି।
ପ୍ରେକ୍ଷା ମେହତା: ଟିଭି ଶୋ’ ‘କ୍ରାଇମ୍ ପେଟ୍ରୋଲ’, ‘ଲାଲ ଇଶ୍କ’ ଏବଂ ‘ମେରି ଦୁର୍ଗା’ରେ କାମ କରିସାରିଥିବା ଅଭିନେତ୍ରୀ ପ୍ରେକ୍ଷା ମେହତା ମେ’ ୨୫ ତାରିଖରେ ଇନ୍ଦୋରସ୍ଥିତ ନିଜ ଘରେ ଫାଶୀ ଲଗାଇ ଆତ୍ମହତ୍ୟା କରିଥିଲେ।
କୁଶଲ ପଞ୍ଜାବୀ: ଟିଭି ଏବଂ ଫିଲ୍ମ କଳାକାର କୁଶଲ ପଞ୍ଜାବୀ ଗତବର୍ଷ ଶେଷ ଦିନରେ ଆତ୍ମହତ୍ୟା କରିଥିଲେ। ୩୭ ବର୍ଷୀୟ କୁଶଲ ମୃତ୍ୟୁ ପୂର୍ବରୁ ଏକ ସୁଇସାଇଡ୍ ନୋଟ୍ ଲେଖିଥିଲେ। ତାଙ୍କ ମୃତ୍ୟୁ ପାଇଁ କେହି ଦାୟୀ ନୁହନ୍ତି ବୋଲି କୁଶଲ ସେଥିଲେ ଉଲ୍ଲେଖ କରିଥିଲେ। ଶେଷଥର ପାଇଁ ତାଙ୍କୁ ‘ଇଶ୍କ ମେଁ ମରଜାଓ୍ବା’ରେ ଦେଖିବାକୁ ମିଳିଥିଲା।
ସେଜଲ ଶର୍ମା: ଟିଭି ଶୋ ‘ଦିଲ୍ ତୋ ହାପି ହୈ ଜି’ ଫେମ୍ ଅଭିନେତ୍ରୀ ସେଜଲ ଶର୍ମା ଚଳିତ ବର୍ଷ ଜାନୁୟାରୀରେ ଆତ୍ମହତ୍ୟା କରିଥିଲେ। ତେବେ ଆଜି ପର୍ଯ୍ୟନ୍ତ ତାଙ୍କ ମୃତ୍ୟୁର କାରଣ ରହସ୍ୟାବୃତ ହୋଇ ରହିଛି।
ସମୀର ଶର୍ମା: ଟିଭି ଶୋ’ ‘କାହାନୀ ଘର ଘର କି’ ଫେମ୍ ସମୀର ଶର୍ମା ଗତ ଅଗଷ୍ଟ ୬ରେ ମୁମ୍ବାଇସ୍ଥିତ ନିଜ ଘରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ମୃତଦେହ ଜବତ ହେବାର ୨ ଦିନ ପୂର୍ବରୁ ସେ ଆତ୍ମହତ୍ୟା କରିଥିବା ଜଣାପଡ଼ିଥିଲା। ତେବେ ତାଙ୍କ ମୃତ୍ୟୁର କାରଣ ଜଣାପଡ଼ି ନାହିଁ।
