ଢେଙ୍କାନାଳ ଅଫିସ, ୧୨ ।୩
ଢେଙ୍କାନାଳ ସଦର ରେଞ୍ଜ୍ ଗହମଖୁଣ୍ଟି ରାସ୍ତାରେ କ୍ଷତାକ୍ତ ଅବସ୍ଥାରେ ବୁଲୁଥିବା ଏକ ଦନ୍ତାହାତୀ ଆତଙ୍କ ସୃଷ୍ଟି କରିଛି। ହାତୀର ପଛ ଡାହାଣ ଗୋଡ଼ରେ ଗଭୀର କ୍ଷତ ସୃଷ୍ଟି ହୋଇଛି। ଦନ୍ତା ଗର୍ଜନରେ ଅଞ୍ଚଳର ଥରହର ହେଉଥିବା ସୂଚନା ପାଇ ବନ ବିଭାଗ ପକ୍ଷରୁ ଏହାର ଚିକିତ୍ସା ଆରମ୍ଭ ହୋଇଛି।
ଦୀର୍ଘ ୩ଦିନ ହେଲା ଉକ୍ତ ହାତୀ ଯନ୍ତ୍ରଣାରେ ଛଟପଟ ହୋଇ ଇତସ୍ତତଃ ହୋଇ ଘୂରିବୁଲୁଛି। ଅତ୍ୟଧିକ କଷ୍ଟ ସହି ନ ପାରି ଦନ୍ତା ବାରମ୍ବାର ପୋଖରୀରେ ପଶିଯାଉଥିବା ଦେଖିବାକୁ ମିଳିଥିଲା। ଗ୍ରାମବାସୀ ବାରମ୍ବାର ସୂଚନା ଦେବା ସତ୍ତ୍ୱେ ବନ ବିଭାଗ ଏହାକୁ ଗୁରୁତ୍ୱ ଦେଇ ନ ଥିଲା। ଶୁକ୍ରବାର ବନ କର୍ମଚାରୀ, ପ୍ରାଣୀ ଚିକିତ୍ସକ ଏବଂ ମାହୁନ୍ତଙ୍କ ସହାୟତାରେ ଘଟଣାସ୍ଥଳରେ ପହଞ୍ଚତ୍ ହାତୀକୁ ଟ୍ରାଙ୍କୁଲାଇଜ୍ କରିଥିଲେ। ଏହାପରେ ଆଣ୍ଟିଓବାୟୋଟିକ୍ ଇଞ୍ଜେକ୍ସନ ଦିଆଯାଇଥିଲା। ତେବେ ଇଞ୍ଜେକ୍ସନ ଦେବା ପରେ ଦନ୍ତା ହଠାତ୍ ହିଂସ୍ର ରୂପ ଧାରଣ କରି ଆକ୍ରମଣ କରିଥିଲା। ଏଥିରେ ହାତୀ ସ୍କ୍ବାଡ୍ କର୍ମଚାରୀ ବିଶ୍ୱରଞ୍ଜନ ପାଣିଗ୍ରାହୀ ଗୁରୁତର ହୋଇଛନ୍ତି। ତାଙ୍କ ଛାତିରେ ଆଘାତ ଲାଘିଛି। ତାଙ୍କୁ ପ୍ରଥମେ ଜିଲା ଚିକିତ୍ସାଳୟ ଏବଂ ପରେ କଟକ ସ୍ଥାନାନ୍ତର କରାଯାଇଛି। ଅଞ୍ଚଳବାସୀଙ୍କ କହିବା କଥା, ଗୋବିନ୍ଦପୁର, ଗହମଖୁଣ୍ଟି, ବୋରାପଦା, ମେଘା ଅଞ୍ଚଳରେ କିଛି ମାସ ହେଲା ଏହି ହାତୀ ଘୂରିବୁଲୁଛି। ଦିନକୁ ଦିନ ଅଧିକ ହିଂସ୍ର ହେବାରେ ଲାଗିଛି। କିଛି ମାସ ମଧ୍ୟରେ ୩ ଜଣଙ୍କ ଜୀବନ ନେଲାଣି। ଗୁଳିମାଡ଼ କିମ୍ବା ବିସ୍ଫୋରକ ସାମଗ୍ରୀ ଉପରେ ପାଦ ପକାଇ ଦେଇଥିବାରୁ ଏହାର ଗୋଡ଼ରେ କ୍ଷତ ସୃଷ୍ଟି ହୋଇଥିବା ଅନୁମାନ କରାଯାଉଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶ ଚାନ୍ଦ ଗୋଗିନେନି କୁହନ୍ତି, ଗୁଳିମାଡ଼ ହେଲେ ଗୋଡ ଉପରେ ଆଘାତ ଲାଗିଥାଆନ୍ତା। ହେଲେ ପାଦ ତଳ ଅଂଶରେ କ୍ଷତ ସୃଷ୍ଟି ହୋଇଥିବାରୁ ଏହା ଗୁଳିମାଡ଼ ନୁହେଁ ବୋଲି ଜଣାପଡୁଛି। ହାତୀକୁ ଆଣ୍ଟିଓବାୟୋଟିକ୍ ଇଞ୍ଜେକ୍ସନ ଦିଆଯାଇଛି। ହାତୀ ଆକ୍ରମଣରେ ଗୁରୁତର ସ୍କ୍ବାଡ୍ କର୍ମଚାରୀଙ୍କୁ କଟକ ସ୍ଥାନାନ୍ତର କରାଯାଇଛି। ଏହାର ଗତିବିଧି ଉପରେ ବନ ବିଭାଗ ନଜର ରଖିଛି।
