ଏବେ ଚାଲିଛି ପାର୍ବଣର ସମୟ। ମା’ଦୁର୍ଗତିନାଶିନୀଙ୍କର ବି ହୋଇଛି ଧରାବତରଣ। ହେଲେ ଏଥର କରୋନା କଟକଣା ମଧ୍ୟରେ ଚାଲିଛି ମା’ଙ୍କ ପୂଜା ବିଧି। ଯେଉଁଥିପାଇଁ ନା ଅଛି ସେ ଆକର୍ଷଣୀୟ ମଣ୍ଡପ ସଜ୍ଜା ଭିତରେ ମା’ଙ୍କର ବଡ଼ ବଡ଼ ମୃଣ୍ମୟୀ ମୂର୍ତ୍ତି, ନା ଦେଖିବାକୁ ମିଳୁଛି ସେ ସୁଦୃଶ୍ୟ ଆକାଶଛୁଆଁ ତୋରଣ ସାଙ୍ଗକୁ ଆଖିଝଲସା ଆଲୋକମାଳା, ନା ସାଂସ୍କୃତିକ କାର୍ଯ୍ୟକ୍ରମରେ ସରଗରମ ହେଉଛି ମାହୋଲ…
ଏଥର ଫିକା ଫିକା ଦଶହରା। ମଣ୍ଡପଗୁଡ଼ିକରେ ମା’ଙ୍କର ଯଥାବିଧି ପୂଜାର୍ଚ୍ଚନା ହେଉଥିଲେ ହେଁ କରୋନା କଟକଣା ମା’ଙ୍କ ଦର୍ଶନରୁ ବଞ୍ଚତ୍ତ କରିଛି ଭକ୍ତଙ୍କୁ। ଅନ୍ଲାଇନ୍ରେ ମା’ଙ୍କ ଦର୍ଶନର ସୁଯୋଗ ମିଳୁଥିଲେ ହେଁ ସେଥିରେ ପ୍ରତ୍ୟକ୍ଷ ଦର୍ଶନର ଆନନ୍ଦ ନାହିଁ। ମଣ୍ଡପରୁ ମଣ୍ଡପ ବୁଲିବା, ଭଳିକି ଭଳି ଆଲୋକ ସଜ୍ଜା ସାଙ୍ଗକୁ ସୁଉଚ୍ଚ ତୋରଣ ଦେଖିବା, ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଭରପୂର ମଜା ଉଠାଇବା, ରାବଣପୋଡ଼ିରେ ବିଭିନ୍ନ ପ୍ରକାର ଆତସବାଜି ଦେଖିବା ହେଉ କି ଭସାଣି ବେଳେ ଡିଜେ ମ୍ୟୁଜିକ୍ ତାଳେ ତାଳେ ନାଚିବା ଏଥର ସର୍ବସାଧାରଣଙ୍କ ପାଇଁ ପାଲଟିଛି ସ୍ବପ୍ନ; ଯାହାକୁ ନେଇ ସଭିଙ୍କ ମନରେ ରହିଛି ଅବସୋସ। ଆସନ୍ତୁ ଜାଣିବା ଏଥର ଦଶହରାକୁ ନେଇ କ’ଣ ରହିଛି ଏମାନଙ୍କ ପ୍ରତିକ୍ରିୟା …
ମିସ୍ କରିବି ଭସାଣି ଡ୍ୟାନ୍ସ:ଦଶହରା ତ ସମସ୍ତଙ୍କ ପାଇଁ ସ୍ପେଶାଲ। ହେଲେ ଏହି ସମୟ ଆସିଲେ ଆମ କଟକିଆଙ୍କ ଖୁସି କହିଲେ ନ ସରେ। ସୁନ୍ଦର ଆଲୋକ ସଜାରେ ଝଲସି ଉଠୁଥିବା ପୂରା ସହରରେ ବୁଲି ବୁଲି ପ୍ରତିଟି ପୂଜା ମଣ୍ଡପରେ ଶୋଭା ପାଉଥିବା ମା’ଙ୍କ ମୂର୍ତ୍ତି ଦର୍ଶନ ସହ ରାବଣପୋଡ଼ି ସମୟରେ ଭଳିକି ଭଳି ଆତସବାଜି ଦେଖିବାକୁ ବହୁତ ଭଲ ଲାଗେ। ବୁଲାବୁଲି ବେଳେ ବିଭିନ୍ନ ଫୁଡ଼୍ ଷ୍ଟଲ୍ରେ ଖାଇବା ଏବଂ ପାର୍ଶ୍ୱରେ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମ ଦେଖିବା ସହ ମ୍ୟୁଜିକ୍ ତାଳେ ତାଳେ ନାଚିବାର ଖୁସି ଅଲଗା ପ୍ରକାର। ଲଗାତର ୩-୪ ଦିନ ସଂଧ୍ୟାରୁ ରାତି ପର୍ଯ୍ୟନ୍ତ ନାଚିଲେ ବି ନା ଥକେ ପାଦ ନା କମେ ଇଚ୍ଛା ବରଂ ଭସାଣିରେ ଡିଜେ ମ୍ୟୁଜିକ୍ରେ ନାଚିବାକୁ ଆହୁରି ବଢିଯାଏ ଜୋସ୍। ଏଥର କରୋନା ପାଇଁ ଏସବୁ ହୋଇପାରିବନି। ତେଣୁ ଏଥର ସବୁଠୁ ବେଶି ମିସ୍ କରିବି ଭସାଣି ଡ୍ୟାନ୍ସ।
– ପୁଷ୍ପରାଜ୍ ଚୌଧୁରୀ
ମେକାନିକାଲ ଇଞ୍ଜିନିୟର
ମାଛୁଆ ବଜାର, କଟକ
କରୋନା ଛଡ଼ାଇ ନେଲା
ପୂଜାର ମଜା:ପାର୍ବଣର ସମୟ ଆସି ଯାଇଛି। ହେଲେ କରୋନା ଚଳିତବର୍ଷ ନା କେବଳ ମା’ ମହିଷମର୍ଦିନୀଙ୍କ ଦର୍ଶନର ସୌଭାଗ୍ୟ ଛଡ଼ାଇ ନେଇଛି ବରଂ ମା’ଙ୍କ ମୂର୍ତ୍ତିରେ ରଙ୍ଗ ଦେବାଠୁ ଆରମ୍ଭ କରି ପୂଜା ମଣ୍ଡପଗୁଡ଼ିକର ସାଜସଜ୍ଜା କରିବାରୁ ବି ବଞ୍ଚତ୍ତ କରିଛି। କିଛି ବର୍ଷ ହେବ ଦଶହରା ସମୟରେ ରସୁଲଗଡ଼, ଅଶୋକ ନଗର, ୟୁନିଟ-୯, ଖୋର୍ଦ୍ଧା କାଇପଦର ଆଦି ଦୁର୍ଗାପୂଜା କମିଟି ପକ୍ଷରୁ ଆୟୋଜିତ ପୂଜାରେ ରଙ୍ଗ ଦେବା ଏବଂ ମଣ୍ଡପର ଭିତର ଏବଂ ବାହାର ଡେକୋରେଶନ କାର୍ଯ୍ୟ କରିଆସୁଛି। ଏହାଦ୍ୱାରା ବର୍ଷକୁ ଥରେ ମା’ଙ୍କ ସେବାର ସୁଯୋଗ ମିଳୁଥିବାରୁ ମାନସିକ ଶାନ୍ତି ମିଳେ। ତା’ଛଡ଼ା ବେଶ୍ ଭଲ ରୋଜଗାର ମଧ୍ୟ ହୋଇଥାଏ। ଏଥର ଏସବୁ ନ ହୋଇପାରୁଥିବାରୁ ଦୁଃଖ ଲାଗୁଛି। ତେଣୁ ଆଗାମୀ ବର୍ଷକୁ ଏ ମହାମାରୀ ଦୂର ହୋଇଯାଉ ଏବଂ ଭକ୍ତମାନେ ମା’ଙ୍କ ଦର୍ଶନର ସୁଯୋଗ ପାଆନ୍ତୁ ଏତିକି କାମନା।
– ମାନସ କୁମାର ମହାରଥିତ୍
ଛାତ୍ର, ଧଉଳି କଲେଜ ଅଫ
ଆର୍ଟ ଆଣ୍ଡ କ୍ରାଫ୍ଟ
ଦଶହରା ସମୟରେ ଘରେ ବୋର୍ ଲାଗୁଛି: ପୂଜା ପର୍ବ ମଧ୍ୟରେ ଦଶହରାର ମଜା ସବୁଠୁ ଭିନ୍ନ। ପ୍ରତିବର୍ଷ ଏହି ସମୟକୁ ଚାତକ ଭଳି ଚାହିଁ ରହିଥାଏ। କଟକ ଏବଂ ଭୁବନେଶ୍ୱରର ବିଭିନ୍ନ ସ୍ଥାନ ବୁଲି ବୁଲି ମା’ଙ୍କ ମୂର୍ତ୍ତି ଦର୍ଶନ କରିବା, ଆକର୍ଷଣୀୟ ତୋରଣ ଦେଖିବା, ଫଟୋ ଉଠାଇବା ଆଦି ଖୁବ୍ ଖୁସି ଲାଗେ। ହେଲେ ଏସବୁ ସହିତ ୟୁନିଟ୍-୩ ପ୍ରଦର୍ଶନୀ ପଡ଼ିଆରେ ଆୟୋଜିତ ଦାଣ୍ଡିଆ ନାଇଟ୍ସରେ ଭାଗ ନେଇ ସାଙ୍ଗମାନଙ୍କ ସହ ଡ୍ୟାନ୍ସ କରିବାର ଚାର୍ମ ନିଆରା। ଏଥିପାଇଁ ମୁଁ ପ୍ରତିବର୍ଷ ଦଶହରାର ପ୍ରାୟ ୧୫-୨୦ ଦିନ ପୂର୍ବରୁ ଲେହେଙ୍ଗା, ମ୍ୟାଚିଂ ଜୁଏଲେରୀ, ଡେକୋରେଟିଭ୍ ଦାଣ୍ଡିଆ ଷ୍ଟିକ୍ ଆଦି କିଣିଥାଏ। ହେଲେ ଏବର୍ଷ କରୋନା ମହାମାରୀ ଲାଗି ଏସବୁ ହୋଇପାରୁ ନ ଥିବାରୁ ବହୁତ ଦୁଃଖ ଲାଗୁଛି। ସତ କହିବାକୁ ଗଲେ ଦଶହରା ସମୟରେ ଘରେ ରହିବାକୁ ପଡ଼ୁଥିବାରୁ ଭାରି ବୋର୍ ବି ଲାଗୁଛି।
-ଶାଶ୍ୱତୀ ମିଶ୍ର, ଛାତ୍ରୀ, ଭୁବନେଶ୍ୱର
ପୂଜା ତ ଅଛି ହେଲେ ସେ ମଜା ନାହିଁ: ଦଶହରା ସମୟ ଆସିଲେ ଭାରି ଖୁସି ଲାଗେ। ଏ ସମୟରେ ମା’ଙ୍କ ଆଗମନରେ ଚତୁର୍ଦ୍ଦିଗ ଉତ୍ସବମୁଖରିତ ହୋଇଉଠେ। ତେବେ ଏ ସମୟଟି ମୋ ପାଇଁ ବେଶ୍ ଖାସ୍। କାରଣ ମା’ଙ୍କ ଦର୍ଶନ, ବୁଲା ବୁଲି ଆଦିର ମଜା ନେବା ସହ ନିଜେ ମଧ୍ୟ ଜଣେ ଡିଜେ ହିସାବରେ ବିଭିନ୍ନ ପ୍ରୋଗ୍ରାମ କରିଥାଏ। କଟକ ସହର ଏବଂ ଉପକଣ୍ଠ ଅଞ୍ଚଳରେ ଦଶହରା ସମୟରେ ବିଭିନ୍ନ ଷ୍ଟାଣ୍ଡିଂ ପ୍ରୋଗ୍ରାମ ଏବଂ ଭସାଣି ପାଇଁ ବିଭିନ୍ନ ପୂଜା କମିଟି ପକ୍ଷରୁ ପ୍ରାୟ ୩ ମାସ ଆଗରୁ ଲକ୍ଷ ଲକ୍ଷ ଟଙ୍କା ଆଡ଼ଭାନ୍ସ ଦେଇଯାଆନ୍ତି । ବିଶେଷ କରି କେତେକ ସ୍ଥାନରେ ନବମୀ ଏବଂ ଦଶମୀରେ ବଙ୍ଗୀୟ ରୀତିନୀତି ଅନୁଯାୟୀ ହେଉଥିବା ସିନ୍ଦୂର ଖେଳ ହେଉ କିମ୍ବା ଦାଣ୍ଡିଆ ନାଇଟ୍ସରେ ଡିଜେ ପ୍ରୋଗ୍ରାମର ମଜା ନିଆରା। ହେଲେ କରୋନା ଲାଗି ସରାକର ସାମାଜିକ କାର୍ଯ୍ୟକ୍ରମ ଏବଂ ଦୁର୍ଗାପୂଜାକୁ ନିରାଡ଼ମ୍ବରରେ ପାଳନ କରିବାକୁ ନିର୍ଦ୍ଦେଶ ଦେଇଥିବାରୁ ଏବର୍ଷ ଦଶହରାରେ ପୂଜା ତ ଅଛି ହେଲେ ସେ ମଜା ନାହିଁ।
-ଧୀରେନ୍ଦ୍ର ବେହେରା, ଡିଜେ, କଟକ
ଖାଁ ଖାଁ ଲାଗୁଛି ଚାରିଆଡ଼:
ଦଶହରା ସମୟରେ ମା’ଙ୍କ ଦର୍ଶନ ଲାଗି ମଣ୍ଡପରୁ ମଣ୍ଡପ ବୁଲାବୁଲି ଏବଂ କିଲା ପଡ଼ିଆରେ ଆୟୋଜିତ ରାବଣପୋଡ଼ିରେ ଆତସବାଜି ଦେଖିବା ସହ ଭସାଣି ସମୟରେ ଡ୍ୟାନ୍ସ କରିବାର ଚାର୍ମ ଅଲଗା। ତା’ଛଡା ନିଜେ ମଧ୍ୟ ମଣ୍ଡପଠାରୁ ଆରମ୍ଭ କରି ବଡ଼ ବଡ଼ ଗେଟ୍ ଏବଂ କଲ୍ଚରାଲ ପ୍ରୋଗ୍ରାମ ପେଣ୍ଡାଲ ପର୍ଯ୍ୟନ୍ତ ଲାଇଟ୍ ଏବଂ ଅନ୍ୟାନ୍ୟ ଡେକୋରେଶନ୍ କାମ କିଛି ବର୍ଷ ହେବ କରି ଆସୁଛି। ତେଣୁ ଏହି କାମରେ ୨ ମାସ ପୂର୍ବରୁ ଅର୍ଡ଼ର ଆସିବା ସହ ଧୀରେ ଧୀରେ କାମ ଆରମ୍ଭ ହୋଇ ପୂଜା ସରିବାର କିଛି ଦିନ ପର୍ଯ୍ୟନ୍ତ କାମ ଚାଲିଥାଏ। ତେଣୁ ଏହି ସମୟଗୁଡ଼ିକ ସମ୍ପୂର୍ଣ୍ଣ କାର୍ଯ୍ୟବହୁଳ ଥିଲେ ସୁଦ୍ଧା ଖୁସି ଲାଗିଥାଏ। ହେଲେ ଏଥର କରୋନା ଦଶହରାର ଆନନ୍ଦ ନେବା ସହ ରୋଜଗାର ଉଭୟରୁ ବଞ୍ଚତ୍ତ କରିଛି। ଗତ ବର୍ଷକୁ ମନେପକାଇଲେ ବର୍ତ୍ତମାନ ଚାରିଆଡ଼େ ଏତେ ଖାଁ ଖାଁ ଲାଗୁଛି ଯେ, ଏହା ଦଶହରା ସମୟ ବୋଲି ବିଶ୍ୱାସ ହେଉନାହିଁ।
-ଅନିଲ ପାତ୍ର
ଡେକୋରେଟର୍, କଟକ
