ନୟାଗଡ଼,୫।୪(ଲୋକନାଥ ମିଶ୍ର):ଜଙ୍ଗଲ ସୁରକ୍ଷାକାରୀଙ୍କୁ ଘାରିଛି ନିଅଁା ଚିନ୍ତା। ଜଙ୍ଗଲରେ ନିଅଁା ନ ଲାଗିବା ପାଇଁ ନୟାଗଡ଼ ଜିଲା ଦଶପଲ୍ଲା ବ୍ଲକର ଆଦିବାସୀମାନେ ଗଁାରେ ଆଗୁଆ ସଭା କରି ସଚେତନତା ସୃଷ୍ଟି କରିଛନ୍ତି। ପୁଣି ପାଳି କରି ଜଙ୍ଗଲ ସୁରକ୍ଷାକୁ କଡ଼ାକଡ଼ି କରିଛନ୍ତି। ସେହିପରି ଜଙ୍ଗଲର ବିଭିନ୍ନ ପଥରରେ ନିଅଁା ନ ଲାଗିବା ପାଇଁ ସଚେତନତା ବାର୍ତ୍ତା ଲେଖିଛନ୍ତି। ଏପରି କି ଗଛରୁ ପଡିଥିବା ପତରକୁ ପ୍ରାୟ ୫ ଫୁଟ ଲେଖାଏ ଓଳାଇ ଫାୟାର ଲାଇନ୍ ସୃଷ୍ଟି କରିଛନ୍ତି। ଫାୟାର ଲାଇନ୍ ଦ୍ୱାରା ଜଙ୍ଗଲରେ ନିଅଁା ଯେପରି ନ ଲାଗିବ ସେଥିପାଇଁ ଆଗୁଆ ପଦକ୍ଷେପ ନେଇଛନ୍ତି। ଆଦିବାସୀଙ୍କ ଏପରି ପଦକ୍ଷେପ ଯୋଗୁ ଚଳିତ ବର୍ଷ ନିଅଁା ଲାଗି ନାହିଁ। ତେବେ ଚଳିତ ବର୍ଷ ଯେପରି ଜଙ୍ଗଲରେ ନିଅଁା ନ ଲାଗିବ ସେଥିପାଇଁ ସବୁ ପ୍ରକାରର ବ୍ୟବସ୍ଥା କରିଛନ୍ତି ଆଦିବାସୀ।
ଦଶପଲ୍ଲା ବ୍ଲକର ବାଙ୍କତଇଲା, ମଞ୍ଜାରୀ, ମିଟୁକୁଳି, ଟାକରା, ଘୁଗୁଡିପଡା, କଦଳୀବାରି ଆଦି ଆଦିବାସୀ ଅଧ୍ୟୁଷିତ ଅଞ୍ଚଳରେ ଆଦିବାସୀମାନେ ୨୦୧୯ରୁ ଜଙ୍ଗଲ ସୁରକ୍ଷା କରି ଆସୁଛନ୍ତି। ଜଙ୍ଗଲ ସୁରକ୍ଷା ଯୋଗୁ ବାଙ୍କତଇଲାରେ ୬୭୦ ଏକର, ମଞ୍ଜାରୀରେ ୪୪୦ ଏକର, ମିଟୁକୁଳରେ ୫୦୦ ଏକର, ଟାକରାରେ ୪୦୦ ଏକର, ଘୁଗୁଡିପଡ଼ାରେ ୨୫୦ ଏକର, କଦଳୀବାରିରେ ୧୫୦ ଏକର ଜଙ୍ଗଲ ସୁରକ୍ଷିତ ହୋଇପାରିଛି । ସ୍ଥାନୀୟ ଜଙ୍ଗଲରେ କାଠ ଚୋର, ପଥର ଚୋର ଓ ଶିକାରୀଙ୍କ ଦୌରାମତ୍ୟ କମିଯାଇଛି। ପୁଣି ଜଙ୍ଗଲରେ ନିଅଁା ଲଗାଇବାକୁ ଲୋକମାନେ ଡରିଲେଣି। ଏପରିକି କାମ ନ ଥିଲେ ଲୋକମାନଙ୍କୁ ଜଙ୍ଗଲ ଭିତରକୁ ଯିବା ବାରଣ କରାଯାଇଛି। ଏନେଇ ସାନକୁରୁବାରୀ ଗଁାର ପଞ୍ଚାନନ ଜାନି ଓ ବାଙ୍କତଇଲା ଗଁାର ଲକ୍ଷ୍ମୀଧର ମୁଦୁଲି କୁହନ୍ତି, ଜଙ୍ଗଲରେ ନିଅଁା ଲାଗିବା ଦ୍ୱାରା ଗଛଲତା ପୋଡ଼ି ଯିବା ସହ ବନ୍ୟପ୍ରାଣୀଙ୍କ ମୃତ୍ୟୁ ଘଟୁଛି। ଏହାର ଭୟାବହତା ନେଇ ଆଖପାଖ ଲୋକଙ୍କୁ ସଚେତନତା କରିବା ପରେ ସଫଳତା ମିଳିଛି। ଗତ ବର୍ଷ ଅଳ୍ପ କିଛି ଜଙ୍ଗଲରେ ନିଅଁା ଲାଗିଥିଲା। ଆମେ ଗଛର ଡାଳ, ବାଲି ଓ ପାଣି ସାହାର୍ଯ୍ୟରେ ନିଅଁା ଲିଭାଇଥିଲୁ। ଏଣୁ ଚଳିତ ବର୍ଷ ସଚେତନତାକୁ ଗୁରୁତ୍ୱ ଦେବାରୁ ନିଅଁା ଲାଗିବା କମ୍ ହୋଇ ଯାଇଛି। ମୁଣ୍ଡୁଳୀର ନିରାକାର ଜାନି କୁହନ୍ତି, ଜଙ୍ଗଲରେ ପତ୍ର ପଡି ରହିଲେ ମାଟି କ୍ଷୟ କମ୍ ହୁଏ। ଅନ୍ୟପକ୍ଷେ ପତ୍ର ପଚିଶଢ଼ି ମାଟିକୁ ଉର୍ବର କରାଏ। ପାହାଡ଼ର ବର୍ଷା ଜଳ ଜମିକୁ ଆସି ଜମିର ଉର୍ବରତା ବଢ଼ାଏ। ଏଣୁ ଆମେ ଜଙ୍ଗଲରେ ଫାୟାର ଲାଇନ କରୁଥିଲେ ମଧ୍ୟ ପତ୍ରକୁ ନଷ୍ଟ କରି ନ ଥାଉ। ମଞ୍ଜାରୀର ଶରତ ମାଝି କୁହନ୍ତି, ନିଅଁା ଲାଗିବା ଦ୍ୱାରା ପାଣିଆଳୁ ଓ କସାଆଳୁ, ମସିଆ, କନ୍ଦା, ବାଉଁଶ କରଡ, ସତାବରୀ ଆଉ ମିଳୁ ନ ଥିଲା। ନିଅଁା ନ ଲାଗିବା ଦ୍ୱାରା ଏଗୁଡିକ ଚଳିତ ବର୍ଷ ଜଙ୍ଗଲରୁ ଅଧିକ ସଂଗ୍ରହ କରାଯାଇଛି। ଏହି ପ୍ରକ୍ରିୟା ଚାଲୁ ରହୁଛି। ଜଙ୍ଗଲ ରହିଲେ ଆମେ ସମସ୍ତେ ସୁରକ୍ଷିତ ରହିବୁ। ଏହି ବାର୍ତ୍ତା ଦେଇ ଆମେ ସମସ୍ତଙ୍କୁ ସଚେତନ କରିଛୁ।
