କଣାସ/ସାକ୍ଷୀଗୋପାଳ,୨୨।୧୧ (ବିଭୂତି ଭୂଷଣ ତ୍ରିପାଠୀ/ଭରତ ରାଉତ): ରାଜ୍ୟର ସମସ୍ତ ସରକାରୀ ବିଦ୍ୟାଳୟରେ ଛାତ୍ରୀଛାତ୍ରଙ୍କୁ ମାଗଣାରେ ପୁଷ୍ଟିକର ଖାଦ୍ୟ ଯୋଗାଇଦେବା ପାଇଁ ମଧ୍ୟାହ୍ନଭୋଜନ ଯୋଜନା କାର୍ଯ୍ୟକାରୀ ହେଉଛି। ସରକାର ଏ ବାବଦ ଖର୍ଚ୍ଚରାଶି ବହନ କରୁଥିବାବେଳେ କେତେକ ଘରୋଇ ଅନୁଷ୍ଠାନକୁ ଦାୟିତ୍ୱ ଦେଇଛନ୍ତି। ଏକ ଘରୋଇ ଅନୁଷ୍ଠାନ ପକ୍ଷରୁ ମଧ୍ୟାହ୍ନଭୋଜନ ପ୍ରସ୍ତୁତ କରାଯାଇ ପୁରୀ ଜିଲାର ବିଭିନ୍ନ ବିଦ୍ୟାଳୟକୁ ଯୋଗାଇ ଦିଆଯାଉଛି। ତେବେ ଗୁରୁବାର ସମ୍ପୃକ୍ତ ଅନୁଷ୍ଠାନ ପକ୍ଷରୁ କଣାସ ଓ ସାକ୍ଷୀଗୋପାଳ ବ୍ଲକର କେତୋଟି ବିଦ୍ୟାଳୟରେ ଯୋଗାଇ ଦିଆଯାଇଥିବା ମଧ୍ୟାହ୍ନ ଭୋଜନରେ ପୋକ ସାଲୁବାଲୁ ହେଉଥିବା ଦେଖିବାକୁ ମିଳିଛି। ଏ ନେଇ ଛାତ୍ରୀଛାତ୍ର ଏବଂ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁଯାୟୀ, କଣାସ ବ୍ଲକର କଳାପଦର ପ୍ରାଥମିକ ବିଦ୍ୟାଳୟ, ଓହ୍ଲାଣ ପ୍ରାଥମିକ ଉଚ୍ଚ ବିଦ୍ୟାଳୟ, ଉତ୍ତର ଚିଲିକା ପ୍ରାଥମିକ ବିଦ୍ୟାଳୟ, ବିରିତୋଇ ପ୍ରାଥମିକ ବିଦ୍ୟାଳୟ, ତେଲେଙ୍ଗାପଡ଼ା ପ୍ରାଥମିକ ବିଦ୍ୟାଳୟ, ସାହାସପୁର ପ୍ରାଥମିକ ବିଦ୍ୟାଳୟ ସମେତ ଅନ୍ୟ କେତୋଟି ସ୍କୁଲରେ ଗୁରୁବାର ପିଲାଙ୍କୁ ମଧ୍ୟାହ୍ନଭୋଜନରେ ଭାତ, ଡାଲି, ବୁଟ ତରକାରି ଖାଇବାକୁ ଦିଆଯାଇଥିଲା। କେତେଜଣ ପିଲା ଖାଇବା ଆରମ୍ଭ କରିବା ମାତ୍ରେ ବୁଟ ତରକାରିରେ କଳା ରଙ୍ଗର ଅତି ଟିକି ଟିକି ପୋକ ସାଲୁବାଲୁ ହେଉଥିବା ଦେଖିବାକୁ ପାଇଥିଲେ। ଏକଥା ଅନ୍ୟ ପିଲାମାନେ ଜାଣିବା ପରେ କେହି ଖାଇ ନ ଥିଲେ। ସମସ୍ତେ ଏ ନେଇ ଶିକ୍ଷକଙ୍କୁ ଜଣାଇବା ପରେ ସେମାନଙ୍କୁ ବିସ୍କୁଟ ଖାଇବାକୁ ଦିଆଯାଇଥିଲା। ଏ ସମ୍ପର୍କରେ ବ୍ଲକ ଶିକ୍ଷାଧିକାରୀଙ୍କୁ ସ୍କୁଲ କର୍ତ୍ତୃପକ୍ଷ ଅବଗତ କରିଥିବା ଜଣାପଡ଼ିଛି। ସେହିପରି ସତ୍ୟବାଦୀ ବ୍ଳକ ଅନ୍ତର୍ଗତ କାଦୁଆ କ୍ଲଷ୍ଟରର କାଦୁଆ ପ୍ରାଥମିକ ବିଦ୍ୟାଳୟ ଓ ବୀରରାମଚନ୍ଦ୍ରପୁର କ୍ଲଷ୍ଟରର ତାଳପଡ଼ା ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ରମାନେ ମଧ୍ୟାହ୍ନ ଭୋଜନ ଖାଉଥିବାବେଳେ ପୋକ ବାହାରିଥିଲା। ଫଳରେ ସେମାନେ ଖାଦ୍ୟକୁ ନ ଖାଇ ଫିଙ୍ଗିଦେଇଥିଲେ। ପରେ ସେମାନେ ଉପାସରେ ଘରକୁ ଫେରି ଏ ସମ୍ପର୍କରେ ନିଜ ଅଭିଭାବକଙ୍କୁ ଜଣାଇଥିଲେ। ଅଭିଭାବକମାନେ ସ୍କୁଲରେ ପହଞ୍ଚତ୍ କର୍ତ୍ତୃପକ୍ଷଙ୍କୁ ଘେରି କୈଫିୟତ ମାଗିବା ସହ କାର୍ଯ୍ୟାନୁଷ୍ଠାନ ଦାବି କରିଥିଲେ। ଅନୁରୂପ ଭାବେ ମହାବଳପଡ଼ା ଓ ଅନ୍ୟ କେତେକ ଉଚ୍ଚ ପ୍ରାଥମିକ ବିଦ୍ୟାଳୟରୁ ଏଭଳି ଅଭିଯୋଗ ଆସିଛି। ଅନ୍ୟପକ୍ଷରେ ସତ୍ୟବାଦୀ ମଣ୍ଡଳ ଶିକ୍ଷା ଅଧିକାରୀ ଭବମ ପ୍ରଧାନ କହିଛନ୍ତି, ଉକ୍ତ ଘଟଣା ସମ୍ପର୍କରେ ତାଙ୍କ ନିକଟରେ କୌଣସି ଲିଖିତ ଅଭିଯୋଗ ହୋଇନାହିଁ। ଅଭିଯୋଗ ହେବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସୂଚନା ଥାଉକି, ଗତ ଜୁଲାଇ ୩୦ରେ ମଧ୍ୟ କାଦୁଆ ପ୍ରାଥମିକ ବିଦ୍ୟାଳୟକୁ ମଧ୍ୟାହ୍ନ ଭୋଜନ ପାଇଁ ଆସିଥିବା ଭାତରୁ ପୋକ ବାହାରିଥିଲା।
