ଆମିଷ ଖାଉଥିବା ମଣିଷ ନିଶ୍ଚିତଭାବେ ଆମଲେଟ୍ ଖାଇଥିବେ। ତେବେ ଭିଏତ୍ନାମ, ହାନୋଇରେ ପ୍ରସ୍ତୁତ ହେଉଥିବା ଏକ ସ୍ବତନ୍ତ୍ର ପ୍ରକାରର ଆମଲେଟ୍ ବୋଧହୁଏ ସମସ୍ତଙ୍କ ପକ୍ଷେ ଖାଇବା ସମ୍ଭବ ହେବ ନାହିଁ। ଏହାର କାରଣ ହେଉଛି ଏଥିରେ ବ୍ୟବହାର କରାଯାଉଥିବା ଏକ ଖାସ୍ ସାମଗ୍ରୀ। ଏଥିରେ ବ୍ୟବହାର କରାଯାଏ ୨ ଇଞ୍ଚ ଲମ୍ବର ସାମୁଦ୍ରିକ ପୋକ, ଯାହାର ନାଁ ‘ପଲୋଲୋ’। ପିଆଜ, କଞ୍ଚାଲଙ୍କା, ଟମାଟୋ, ଅଣ୍ଡା ସହ ଶହ ଶହ ସଂଖ୍ୟାର ଉକ୍ତ ପୋକ ଆମଲେଟ୍ରେ ମିଶାଯାଏ; ଯଦ୍ଦ୍ବାରା ଆମଲେଟ୍ର ସ୍ବାଦ ସି’ ଫୁଡ୍ ପରି ଲାଗେ। ଓମଲେଟ୍ରେ ବ୍ୟବହାର କରିବା ପୂର୍ବରୁ ପୋକକୁ ସିଝା ଯାଇଥାଏ। ଯେମିତି କି ଏଥିରୁ ଆମିଷ ଗନ୍ଧ ଦୂର ହେବ। ସାଧାରଣତଃ ପ୍ରଶାନ୍ତ ମହାସାଗରରେ ମିଳୁଥିବା ଉକ୍ତ ପୋକକୁ ଏବେ ଭିଏତ୍ନାମରେ ଚାଷ କରାଯାଉଛି। ଏହି ପୋକରେ ପ୍ରସ୍ତୁତ ଆମ୍ଲେଟ୍ର ବାସ୍ନା ବହୁତ ଭଲ। ତେଣୁ ରାସ୍ତାକଡ ଫୁଡ୍ଷ୍ଟଲ୍ରେ ଆମ୍ଲେଟ୍ ପ୍ରସ୍ତୁତ କଲାବେଳେ ଲୋକେ ଏହାର ବାସ୍ନାରେ ଟାଣି ହୋଇ ଚାଲି ଆସନ୍ତି ଖାଇବାକୁ।
