ନୂଆଦିଲ୍ଲୀ, ୨୩।୮: ଗତବର୍ଷ ଭାରତ ବିପକ୍ଷରେ ଟେଷ୍ଟ ପଦାର୍ପଣ କରି ଅନ୍ତର୍ଜାତୀୟ କ୍ରିକେଟ୍ ଖେଳିବାର ସ୍ବପ୍ନ ପୂରଣ କରିଥିବା ଓ୍ବେଷ୍ଟଇଣ୍ଡିଜ ଅଲ୍ରାଉଣ୍ଡର ରାକୀମ୍ କର୍ନଓ୍ବାଲ୍ ଏବେ ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଟୁର୍ନାମେଣ୍ଟ ଆଇପିଏଲ୍ ଖେଳିବା ଲକ୍ଷ୍ୟରେ ରହିଛନ୍ତି। ୬ ଫୁଟ୍ ୫ ଇଞ୍ଚ ଉଚ୍ଚତା ବିଶିଷ୍ଟ ରାକୀମ ନିଜର ଭାରୀ ଓଜନ ପାଇଁ ବିଶ୍ୱ କ୍ରିକେଟ୍ରେ ସ୍ବତନ୍ତ୍ର ପରିଚୟ ଲାଭ କରିଛନ୍ତି। ରାକୀମଙ୍କ ଓଜନ ୧୪୦ କିଗ୍ରା ରହିଛି। ବିଶ୍ୱରେ ବର୍ତ୍ତମାନ ଖେଳୁଥିବା କ୍ରିକେଟର୍ଙ୍କ ମଧ୍ୟରେ ସେ ସବୁଠାରୁ ଓଜନିଆ ଖେଳାଳି ହେବାର କୀର୍ତ୍ତିମାନ ସ୍ଥାପନ କରିଛନ୍ତି।
ସ୍ପିନ ବୋଲିଂ ସାଙ୍ଗକୁ କର୍ନଓ୍ବାଲ ନିମ୍ନକ୍ରମରେ ଜଣେ ବେଶ୍ ଉପଯୋଗୀ ବ୍ୟାଟ୍ସମ୍ୟାନ। ବର୍ତ୍ତମାନ ସେ କାରବୀୟାନ ପ୍ରିମିୟର ଲିଗ୍ (ସିପିଏଲ୍)ରେ ସେଣ୍ଟ ଲୁସିଆ ଜୌକସ୍ ପକ୍ଷରୁ ପ୍ରତିନିଧିତ୍ୱ କରୁଛନ୍ତି। ନିଜର ପ୍ରଥମ ଟି୨୦ ଲିଗ୍ରେ ଆଖିଦୃଶିଆ ପ୍ରଦର୍ଶନ କରି ଆଇପିଏଲ୍ ଫ୍ରାଞ୍ଚାଇଜ୍କୁ ପ୍ରଭାବିତ କରିବା ଲକ୍ଷ୍ୟରେ ରହିଛନ୍ତି ୨୭ ବର୍ଷୀୟ ଏହି ପୃଥଳାକାୟ କ୍ରିକେଟର୍। ‘ହଁ, ଆଇପିଏଲ୍ ଖେଳିବା ମୋର ଲକ୍ଷ୍ୟ। ସିପିଏଲ୍ ମୋ ପାଇଁ ଆରମ୍ଭ ମାତ୍ର। ମୁଁ ଭାବୁଛି ଅନ୍ୟ ଫ୍ରାଞ୍ଚାଇଜକୁ ଆକୃଷ୍ଟ କରିବା ଲାଗି ମୋତେ ପ୍ରଭାବୀ ପ୍ରଦର୍ଶନ କରିବାକୁ ପଡ଼ିବ। ଯେତେବେଳେ ମଧ୍ୟ ସୁଯୋଗ ଆସିବ ସେଥିଲାଗି ମୋତେ ପ୍ରସ୍ତୁତ ରହିବାକୁ ପଡ଼ିବ’ ବୋଲି କର୍ନଓ୍ବାଲ କହିଛନ୍ତି। ଓ୍ବେଷ୍ଟଇଣ୍ଡିଜ ପକ୍ଷରୁ ୩ ଟେଷ୍ଟ ମ୍ୟାଚ୍ ଖେଳି ସେ ୧୩ ଉଇକେଟ୍ ନେଇଛନ୍ତି।
