ମସ୍କୋ/ଓ୍ବାଶିଂଟନ, ୧୩।୨ : ୟୁକ୍ରେନକୁ ନେଇ ବିଶ୍ୱର ଦୁଇଟି ମହାଶକ୍ତି, ଆମେରିକା ଏବଂ ରୁଷିଆ ମଧ୍ୟରେ ପରିସ୍ଥିତି ଅତ୍ୟନ୍ତ ତିକ୍ତ ହୋଇପଡ଼ିଛି। ୟୁରୋପର ୱେଷ୍ଟର୍ଣ୍ଣ ଫ୍ରଣ୍ଟରେ ରୁଷିଆ ଏବଂ ଆମେରିକା ମଧ୍ୟରେ ପାରସ୍ପରିକ ଘେରାବନ୍ଦ ଜାରି ରହିଛି। ଆମେରିକା ରାଷ୍ଟ୍ରପତି ଜୋ ବାଇିଡେନଙ୍କ ସୈନ୍ୟବାହିନୀ ମଧ୍ୟ ପୂର୍ବ ଫ୍ରଣ୍ଟ ଉପରେ କାର୍ଯ୍ୟକଳାପକୁ ଜୋରଦାର କରିଛନ୍ତି। ଆମେରିକାର ରାଷ୍ଟ୍ରପତିଙ୍କ ଚେତାବନୀ ପରେ ନୈସେନାର ଆଣବିକ ବୁଡ଼ାଜାହାଜ ରୁଷିଆର ସାମୁଦ୍ରିକ ସୀମା ଭିତରକୁ ପ୍ରବେଶ କରିଛି।
ଦୁଇ ଦେଶ ମଧ୍ୟରେ ସମ୍ପର୍କ ଶୀତଳ ଯୁଦ୍ଧର ଯୁଗରେ ପହଞ୍ଚିଥିବାର ଦେଖାଯାଉଛି। ଏହି କାରଣରୁ ତୃତୀୟ ବିଶ୍ୱଯୁଦ୍ଧର ଆଶଙ୍କା ବଢ଼ିିବାରେ ଲାଗିଛି।
ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଆମେରିକାର ଓ୍ବର୍ଜିନିଆ ଶ୍ରେଣୀର ଆଣବିକ ବୁଡ଼ାଜାହାଜ ଏହାର ସାମୁଦ୍ରିକ ସୀମାରେ ପ୍ରବେଶ କରାଇଛି। ଯେତେବେଳେ ରୁଷିଆର ଯୁଦ୍ଧ ଜାହାଜ ଆମେରିକାର ବୁଡ଼ାଜାହାଜକୁ ଭୂପୃଷ୍ଠକୁ ଆସିବାକୁ କହିଲା, ସେତେବେଳେ ଏହାକୁ ଅଣଦେଖା କରାଯାଇଥିଲା। ଏହା ପରେ ରୁଷିଆର ନୌସେନା ଆମେରିକାର ବୁଡ଼ାଜାହାଜ ବିରୁଦ୍ଧରେ ବିଶେଷ କାର୍ଯ୍ୟାନୁଷ୍ଠାନ ଗ୍ରହଣ କଲା।
ପରେ ଆମେରିକାର ବୁଡ଼ାଜାହାଜ ତୁରନ୍ତ ରୁଷିଆର ସମୁଦ୍ରିକ ଅଞ୍ଚଳରୁ ପଳାଇଥିଲା। ଏହି ଘଟଣାରେ ରାଗିଯାଇ ରୁଷିଆ ଆମେରିକାର ପ୍ରତିରକ୍ଷା ମନ୍ତ୍ରଣାଳୟ ଅଧିକାରିଙ୍କୁ ଡକାଇ ଏହି କାର୍ଯ୍ୟାନୁଷ୍ଠାନ ବିରୋଧରେ ଚେତାବନୀ ଦେଇଛି। ତେବେ ରୁଷିଆର ଏଭଳି ଅଭିଯୋଗକୁ ଆମେରିକା ଅସ୍ବୀକାର କରିଛି।
ଯଦି ୟୁକ୍ରେନ ନାଟୋରେ ଯୋଗ ଦିଏ, ତେବେ ପରମାଣୁ ଯୁଦ୍ଧ ହେବ ବୋଲି ରୁଷିଆ ରାଷ୍ଟ୍ରପତି ବ୍ଳାଡିମୀର ପୁଟିନ ଆମେରିକା ପ୍ରତିପକ୍ଷ ଜୋ ବାଇଡେନ୍ଙ୍କ ଉଦ୍ଦେଶ୍ୟରେ କହିଛନ୍ତି।
ପୁଟିନ ଚେତାବନୀ ଦେଇ କହିଛନ୍ତି ଯେ ନିଶ୍ଚିତ ଭାବରେ ନାଟୋ ଏବଂ ରୁଷିଆ ମଧ୍ୟରେ ସାମରିକ ଶକ୍ତି ତୁଳନାତ୍ମକ ନୁହେଁ। ଆମେ ଏହାକୁ ବୁଝୁୁଛୁ। କିନ୍ତୁ ଆମେ ଏହା ମଧ୍ୟ କହୁଛୁ ଯେ ରୁଷିଆ ଏକ ପ୍ରମୁଖ ଆଣବିକ ଶକ୍ତି ଏବଂ ଆମର କିଛି ଆଧୁନିକ ଅସ୍ତ୍ର ଅନ୍ୟ ରାଷ୍ଟ୍ରଙ୍କ ତୁଳନାରେ ଅଧିକ ହୋଇପାରେ। ଏହି ଯୁଦ୍ଧରେ କେହି ବିଜେତା ରହିବେ ନାହିଁ। ନିଜର ଇଚ୍ଛା ବିନା ବିଶ୍ୱର ବିଭିନ୍ନ ରାଷ୍ଟ୍ର ଏହି ବିବାଦରେ ଜଡିତ ହୋଇଯିବେ ବୋଲି ପୁଟିନ୍ କହିଛନ୍ତି।’
