ୱାଶିଂଟନ/ତେହେରାନ,୭।୪: ହର୍ମୁଜ ପ୍ରଣାଳୀ ଖୋଲିବାକୁ ନେଇ ଆମେରିକା ଏବଂ ଇରାନ ମଧ୍ୟରେ ଚାଲିଥିବା ବିବାଦ ଏବେ ଚରମ ସୀମାରେ ପହଞ୍ଚିଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବିସ୍ଫୋରକ ବୟାନ ଦେଇ କହିଛନ୍ତି ଯେ, ଆଜି ରାତିରେ ଏକ ସମ୍ପୂର୍ଣ୍ଣ ସଭ୍ୟତାର ବିନାଶ ହୋଇପାରେ, ଯାହା ହୁଏତ କେବେ ଫେରିବ ନାହିଁ।
ଟ୍ରମ୍ପ କହିଛନ୍ତି, “ମୁଁ ଚାହୁଁନାହିଁ ଏମିତି କିଛି ଘଟୁ, କିନ୍ତୁ ହୁଏତ ଏହା ହିଁ ହେବାକୁ ଯାଉଛି। ଆଜି ରାତିରେ ଆମେ ଜାଣିବାକୁ ପାଇବା ଯେ ଏହା ବିଶ୍ୱ ଇତିହାସର ସବୁଠୁ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ମଧ୍ୟରୁ ଏକ। ୪୭ ବର୍ଷର ଦୁର୍ନୀତି, ଜବରଦସ୍ତି ଚାନ୍ଦା ଆଦାୟ ଏବଂ ମୃତ୍ୟୁର ଯୁଗ ଆଜି ଶେଷ ହେବ।” ସେ ଆହୁରି ମଧ୍ୟ କହିଛନ୍ତି ଯେ ଇରାନରେ ଅଧିକ ବୁଦ୍ଧିମାନ ଏବଂ କମ୍ ମୌଳିକ ଚିନ୍ତାଧାରା ଥିବା ଲୋକେ ଆଗକୁ ଆସିଲେ, ହୁଏତ କିଛି ବୈପ୍ଳବିକ ଏବଂ ଚମତ୍କାର ଘଟିପାରେ।
ତେବେ ଟ୍ରମ୍ପଙ୍କ ଏହି ଡେଡଲାଇନ ଶେଷ ହେବା ପୂର୍ବରୁ ହିଁ ଆମେରିକୀୟ ସେନା ଇରାନର ସବୁଠାରୁ ଗୁରୁତ୍ୱପୂର୍ଣ୍ଣ ‘ଖାର୍ଗ ଆଇଲ୍ୟାଣ୍ଡ’ (Kharg Island)କୁ ଟାର୍ଗେଟ କରିଛି। ଇରାନର ପ୍ରାୟ ୯୦% ତୈଳ ରପ୍ତାନି ଏହି ଦ୍ୱୀପ ମାଧ୍ୟମରେ ହୋଇଥାଏ। ଏହାକୁ ଇରାନର ‘ଅଏଲ ଲାଇଫଲାଇନ୍’ ବୋଲି କୁହାଯାଏ। ଏଠାରେ ବଡ଼ ବଡ଼ ଅଏଲ ଟର୍ମିନାଲ ଏବଂ ଷ୍ଟୋରେଜ ସୁବିଧା ରହିଛି, ଯେଉଁଥିପାଇଁ ଏହାକୁ ‘ଫରବିଡେନ ଆଇଲ୍ୟାଣ୍ଡ’ (Forbidden Island) ମଧ୍ୟ କୁହାଯାଏ।
ଆମେରିକାର ଏହି ଧମକ ପରେ ଇରାନର ରିଭୋଲ୍ୟୁସନାରୀ ଗାର୍ଡ (IRGC) ପକ୍ଷରୁ ମଧ୍ୟ କଡ଼ା ଚେତାବନୀ ଦିଆଯାଇଛି। “ଯଦି ଆମେରିକା ଆମର ନାଗରିକ ସୁବିଧା ସୁଯୋଗ ବା ଭିତ୍ତିଭୂମି ଉପରେ ଆକ୍ରମଣ କରେ, ତେବେ ଆମର ପ୍ରତିକ୍ରିୟା କେବଳ ଏହି ଅଞ୍ଚଳରେ ସୀମିତ ରହିବ ନାହିଁ। କାରଣ ଆମର ଯୁଦ୍ଧ ବିମାନର ସକ୍ଷମ ମଧ୍ୟରେ ଆମେରିକାର ଅନେକ ଗୁରୁତ୍ୱପୂର୍ଣ୍ଣ ସମ୍ପତ୍ତି ରହିଛି।”
ତେବେ ସୋମବାର ପ୍ରେସ କନଫରେନ୍ସରେ ଟ୍ରମ୍ପ ସ୍ପଷ୍ଟ କରିଥିଲେ ଯେ, ଯଦି ଇରାନ ନିର୍ଦ୍ଧାରିତ ସମୟ ପୂର୍ବରୁ ଆମେରିକା ସହ ବୁଝାମଣା ନ କରେ, ତେବେ ଯେକୌଣସି ମୁହୂର୍ତ୍ତରେ ବଡ଼ ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସାରା ବିଶ୍ୱର ନଜର ଏବେ ଆଜି ରାତି (ଭାରତୀୟ ସମୟ ବୁଧବାର ସକାଳ ୫:୩୦) ଉପରେ ରହିଛି। ଏହା କେବଳ ଏକ ମାନସିକ ଯୁଦ୍ଧ କିମ୍ବା ଏକ ବଡ଼ ଧରଣର ସାମରିକ ସଂଘର୍ଷର ଆରମ୍ଭ, ତାହା ସମୟ କହିବ।
