ଢେଙ୍କାନାଳ ଅଫିସ,୧୩ା୧: ବିଶ୍ୱବିଖ୍ୟାତ ମହିମା ଧର୍ମପୀଠ ଯୋରନ୍ଦା ମହିମାଗାଦିରେ ଆସନ୍ତା ଫେବୃୟାରୀ ୪ରେ ପ୍ରସିଦ୍ଧ ମାଘମେଳା ଅନୁଷ୍ଠିତ ହେବ। ମହିମା ଧର୍ମାବଲମ୍ବୀଙ୍କ ମୁଖ୍ୟ ମହୋତ୍ସବକୁ ଶାନ୍ତିଶୃଙ୍ଖଳାର ସହ ଆୟୋଜନ କରିବା ଲାଗି ଏକ ପ୍ରସ୍ତୁତି ବୈଠକ ଗୁରୁବାର ଢେଙ୍କାନାଳ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଆୟୋଜିତ ହୋଇଯାଇଛି। ତେବେ ଉପାସନାସ୍ଥଳୀ ଉଚ୍ଛେଦକୁ ନେଇ ସୃଷ୍ଟି ହୋଇଥିବା ବିବାଦର ସମାଧାନ ହୋଇ ନ ଥିବାରୁ କୌପୀନଧାରୀ ମହିମା ସମାଜର ସାଧୁସନ୍ଥମାନେ ବୈଠକ ବର୍ଜନ କରିଥିବା ବେଳେ କେବଳ ବଳ୍କଳଧାରୀ ଗୋଷ୍ଠୀର ସାଧୁସନ୍ନ୍ୟାସୀ ଉପସ୍ଥିତ ଥିଲେ। ଉଭୟ ଗୋଷ୍ଠୀ ଆପୋସ ବୁଝାମଣା ମାଧ୍ୟମରେ ମେଳା ଆୟୋଜନ କରିବା ଏବଂ ମହିମା ଧର୍ମର ଗରିମା ବୃଦ୍ଧି କରିବା ପାଇଁ ଜିଲାପାଳ ସରୋଜ କୁମାର ସେଠୀ ପରାମର୍ଶ ଦେଇଛନ୍ତି।
କୌପୀନଧାରୀ ମହିମା ସମାଜ ପକ୍ଷରୁ ଜିଲାପାଳଙ୍କ ନିକଟରେ ହୋଇଥିବା ଅଭିଯୋଗରୁ ଜଣାପଡ଼ିଛି, ବାରମ୍ବାର ନିବେଦନ ସତ୍ତ୍ୱେ ଜିଲା ପ୍ରଶାସନ କୌପୀନଧାରୀ ଗୋଷ୍ଠୀକୁ ଅଣଦେଖା କରିଚାଲିଛି। ନ୍ୟାୟାଳୟଙ୍କ ଆଦେଶକୁ ଅଣଦେଖା କରି ନ୍ୟାଯ୍ୟ ଦାବିରୁ ବଞ୍ଚତ୍ତ କରାଯାଉଛି। ମହିମା ସ୍ବାମୀଙ୍କ ସମ୍ପତ୍ତି, ନୀତିକାନ୍ତି ପାଳନରେ ସମାନ ଅଧିକାର ଦେବାରେ ପକ୍ଷପାତିତା କରାଯାଉଛି। ଏଭଳି ସ୍ଥିତିରେ ମାଘମେଳା ବୈଠକରେ ଯୋଗଦାନ ମୂଲ୍ୟହୀନ ବୋଲି କୌପୀନଧାରୀ ମହିମା ସମାଜ ସଭାପତି ଶ୍ରୀମଦ୍ ବାବା ରଘୁନାଥ ଦାସ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି।
ଆଲୋଚନାରେ ଭାଗ ନେଇ ଏସ୍ପି ଜ୍ଞାନରଞ୍ଜନ ମହାପାତ୍ର କହିଲେ, ମେଳା ଆୟୋଜନରେ ପୋଲିସ ପକ୍ଷରୁ ସମ୍ପୂର୍ଣ୍ଣ ସହଯୋଗ କରାଯିବ। ବିଶୃଙ୍ଖଳା ଏଡ଼ାଇବାକୁ ଆବଶ୍ୟକସ୍ଥଳେ କଟକଣା ଜାରି କରାଯିବ। ଶାନ୍ତିଶୃଙ୍ଖଳା ରକ୍ଷା, ଯାନବାହନ ନିୟନ୍ତ୍ରଣ, ପାର୍କିଂ, ମାଦକଦ୍ରବ୍ୟ ବ୍ୟବସାୟ ନିୟନ୍ତ୍ରଣ ଲାଗି ବିହିତ ବ୍ୟବସ୍ଥା କରାଯିବ। ଦୁଇ ଗୋଷ୍ଠୀର ସାଧୁସନ୍ଥମାନେ ସହଯୋଗ ମନୋଭାବ ନେଇ ମେଳା ଆୟୋଜନ କରିବାକୁ ସେ ନିବେଦନ କରିଛନ୍ତି। ଖୁବ୍ଶୀଘ୍ର ଉଭୟ ଗୋଷ୍ଠୀକୁ ନେଇ ଏକ ବୈଠକ ହେବ। ମେଳାର ଆନୁଷଙ୍ଗିକ ବ୍ୟବସ୍ଥା ତଦାରଖ କରିବା ପାଇଁ ପରିଚାଳନା କମିଟି ଗଠନ କରାଯିବ ବୋଲି ନିଷ୍ପତ୍ତି ହୋଇଛି। ବୈଠକରେ ପାର୍କିଂ ଫି’ ଧାର୍ଯ୍ୟ, ଆଲୋକୀକରଣ, ନିରାପତ୍ତା, ଅଗ୍ନି ନିର୍ବାପକ ବ୍ୟବସ୍ଥା, ମାଦକଦ୍ରବ୍ୟ ନିଷେଧ, ଜଳଉତ୍ସ ବିଶୋଧନ, ସିସିଟିଭି କ୍ୟାମେରା ବ୍ୟବସ୍ଥା, ପାନୀୟ ଜଳଯୋଗାଣ, ଜାଳେଣି କାଠ ଯୋଗାଣ, ନିୟନ୍ତ୍ରଣ କକ୍ଷ ସ୍ଥାପନ, ନିରବଚ୍ଛିନ୍ନ ବିଦ୍ୟୁତ୍ ସେବା, ଖାଦ୍ୟପଦାର୍ଥ ଯାଞ୍ଚ ସମ୍ପର୍କରେ ଆଲୋଚନା ହୋଇଥିଲା। ଉପଜିଲାପାଳ ସ୍ନିଗ୍ଧାରାଣୀ ଧଳ, ଅତିରିକ୍ତ ଜିଲାପାଳ (ସାଧାରଣ) ରମେଶ ଚନ୍ଦ୍ର ସେଠୀ, ଗଁଦିଆ ବିଡିଓ ଆଶିଷ ରଞ୍ଜନ ସାହୁ, ଥାନାଧିକାରୀ ସତ୍ୟବ୍ରତ ଭୂତିଆ ପ୍ରମୁଖ ଉପସ୍ଥିତ ଥିଲେ।
