ଭୁବନେଶ୍ୱର,(ବ୍ୟୁରୋ)/ ବାରଙ୍ଗ,୩ା୩ (ଡି.ଏନ.ଏ.): ରାଜଧାନୀ ଉପକଣ୍ଠ ଚନ୍ଦକା ଥାନା ଅନ୍ତର୍ଗତ ତୁଳସୀଦେଇପୁରସ୍ଥିତ ସୋଲ୍ ସୋକ୍ ଫାର୍ମ ହାଉସ୍ରେ ଇଲେକ୍ଟ୍ରିସିଆନ୍ ଦୀପକ କୁମାର ସ୍ବାଇଁଙ୍କୁ ହତ୍ୟା ଘଟଣାରେ ସମ୍ପୃକ୍ତ ଅଭିଯୁକ୍ତ ଶୁଭେନ୍ଦୁ କୁମାର ଦାସ (୩୮)ଙ୍କୁ ପୋଲିସ ଗୁରୁବାର ଗିରଫ କରିଛି। ଶୁଭେନ୍ଦୁଙ୍କ ଘର ଜଗତ୍ସିଂହପୁର ଜିଲା ବାଲିକୁଦା ଥାନା ଅନ୍ତର୍ଗତ ସାଫିପୁର ଗ୍ରାମରେ ହୋଇଥିବାବେଳେ ସେ ଉକ୍ତ ଫାର୍ମ ହାଉସରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ଶୁଭେନ୍ଦୁଙ୍କୁ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରାଯିବା ପରେ ଜେଲ ହାଜତକୁ ପଠାଇ ଦିଆଯାଇଛି। ସାଇଣ୍ଟିଫିକ୍ ଟିମ ଘଟଣାସ୍ଥଳରେ ପହଞ୍ଚତ୍ ବିଭିନ୍ନ ନମୁନା ସଂଗ୍ରହ କରିଛି। ଅନ୍ୟପଟେ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ଦୀପକଙ୍କ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତେବେ ଦୀପକ ଗାଳିଗୁଲଜ କରିବାରୁ ଶୁଭେନ୍ଦୁ ରାଗିଯାଇ ତାଙ୍କୁ ହତ୍ୟା କରିଥିବା ଥାନାଧିକାରୀ ରାଧାକାନ୍ତ ସାହୁ କହିଛନ୍ତି। ହେଲେ ମୃତ ଦୀପକ କାହିଁକି ଗାଳିଗୁଲଜ କରିଥିଲେ ଏନେଇ ଅଭିଯୁକ୍ତ କିଛି ମୁହଁ ଖୋଲି ନ ଥିଲେ ବୋଲି ସେ ପ୍ରକାଶ କରିଛନ୍ତି।
ପୋଲିସ ସୂଚନା ଅନୁଯାୟୀ, ମୃତ ଦୀପକଙ୍କ ଘର ରାଉରକେଲାସ୍ଥିତ ବାସନ୍ତୀ କଲୋନୀରେ। ଦୀପକ ଓ ଅଭିଯୁକ୍ତ ଶୁଭେନ୍ଦୁ ଫାର୍ମ ହାଉସରେ ଥିବା ଏକ ନିର୍ମାଣାଧୀନ କୋଠାରେ ଅନ୍ୟ ଶ୍ରମିକଙ୍କ ସହ ରହୁଥିଲେ। ବୁଧବାର ସାଥୀ ଶ୍ରମିକମାନେ ଦୋଳ ପୂର୍ଣ୍ଣିମା ଉତ୍ସବ ପାଇଁ ଛୁଟିରେ ଚାଲିଯାଇଥିବାବେଳେ ଦୀପକ ଓ ଶୁଭେନ୍ଦୁ ଉକ୍ତ ଘରେ ଥିଲେ। ଅପରାହ୍ନରେ କୌଣସି ଏକ କାରଣକୁ ନେଇ ଉଭୟଙ୍କ ମଧ୍ୟରେ ଝଗଡା ହୋଇଥିଲା। ଶୁଭେନ୍ଦୁ ରାଗିଯାଇ ଦୀପକଙ୍କୁ ଏକ ବିଦ୍ୟୁତ୍ ତାରରେ ବାନ୍ଧି ଦେଇ ଏକ ଟାଓ୍ବେଲରେ ତାଙ୍କ ବେକକୁ ଭିଡ଼ି ଦେଇଥିଲେ। ଘଟଣାସ୍ଥଳରେ ଦୀପକଙ୍କ ମୃତ୍ୟୁ ହୋଇଯିବାପରେ ଅଭିଯୁକ୍ତ ଶୁଭେନ୍ଦୁ ଏନେଇ କଣ୍ଟ୍ରାକ୍ଟରଙ୍କୁ ଫୋନ୍ କରି ଜଣାଇଥିଲେ। ଖବର ପାଇ ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିବା ସହ ଶୁଭେନ୍ଦୁଙ୍କୁ କାବୁ କରି ଥାନାକୁ ଆଣିଥିଲା। ଏନେଇ ମୃତ ଦୀପକଙ୍କ ବଡ଼ ଭଉଣୀ ରଶ୍ମିତା ରାୟଙ୍କ ଅଭିଯୋଗକ୍ରମେ ପୋଲିସ ଏକ ହତ୍ୟା ମାମଲା (ନଂ.୬୫/୨୩) ରୁଜୁ କରିଥିଲା।
