ବଲାଙ୍ଗୀର ଅଫିସ,୧୧।୫: ବଲାଙ୍ଗୀର ଜିଲା ପାଟଣାଗଡ଼ ପଥରଚେପା ଆଦର୍ଶ ବିଦ୍ୟାଳୟ ରାସ୍ତାରେ ବନ ବିଭାଗ ଚଢ଼ାଉ କରି ଏକ ଶାଳ କାଠ ବୋଝେଇ ଅଟୋକୁ ଜବତ କରିଛି।
ସୂଚନାଯୋଗ୍ୟ, ରାତିରେ କାଠ ଚୋରା ଚାଲାଣ ହେଉଥିବା ନେଇ ଡିଏଫଓଙ୍କ ପାଖରେ ଅଭିଯୋଗ ହୋଇ ଆସୁଥିଲା। ଖବର ପାଇ ବନ ବିଭାଗ ପକ୍ଷରୁ ଦେଓଗାଁ ବ୍ଲକ ଅନ୍ତର୍ଗତ ପ୍ରତାପପୁରଠାରୁ ବେହେରାପାଲିକୁ ଯାଉଥିବା (ଓଡି ୦୩ ଏଲ୍ ୦୦୭୮)ନମ୍ବର ବିଶିଷ୍ଟ ଅଟୋକୁ ଯାଞ୍ଚ କରାଯାଇଥିଲା। ଡିଏଫଓ ନିତୀଶ କୁମାରଙ୍କ ନିର୍ଦ୍ଦେଶକ୍ରମେ ବଲାଙ୍ଗୀର ରେଞ୍ଜର ଦାୟିତ୍ୱରେ ଥିବା କେଶବ କିଶୋର ନାଏକଙ୍କ ନେତୃତ୍ୱରେ ଚଢ଼ାଉ କରାଯାଇଥିଲା। ଜବତ ଅଟୋ ବଲାଙ୍ଗୀର ସହରର ତାଲିପାଲିପଡାର ବୋଲି ଜଣାପଡିଛି। ଏହା ସହ ଅଟୋ ଡ୍ରାଇଭର ସିପକ କୁମାର ଖୁଣ୍ଟିଆ ଓରଫ ଲିପୁ(୨୨)ଙ୍କୁ ବନବିଭାଗ କାବୁ କରିବାରେ ସଫଳ ହୋଇଛି। ୫୯ ଖଣ୍ଡ ଶାଳ କାଠ ଜବତ ହୋଇଥିବା ଆନୁମାନିକ ମୂଲ୍ୟ ୫୦ ହଜାର ଟଙ୍କା ହେବ ବୋଲି ବନ ବିଭାଗ ପକ୍ଷରୁ କୁହାଯାଇଛି। ବୁଧବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ଫରେଷ୍ଟର ବ୍ୟାସଦେବ ସାହୁ ସୂଚନା ଦେଇଛନ୍ତି। ଚଢାଉ ସମୟରେ ଫରେଷ୍ଟର ରଞ୍ଜିତ କୁମ୍ଭାର,ଅଶୋକ ସେଠ୍ ଓ ଫାରା ଷ୍ଟାପ ସାମିଲ ଥିଲେ।
