କୋଲକାତା,୭।୨ : ମହିଳା ପ୍ରିମିୟର ଲିଗ (ଡବ୍ଲୁପିଏଲ) ର ପ୍ରଥମ ସଂସ୍କରଣ ଚଳିତ ବର୍ଷ ମାର୍ଚ୍ଚ ୪ ରୁ ୨୬ ପର୍ଯ୍ୟନ୍ତ ଅନୁଷ୍ଠିତ ହେବ। ଏ ସମ୍ପର୍କରେ ବିସିସିଆଇ ଏକ ପ୍ରେସ ବିଜ୍ଞପ୍ତି ଜାରି କରିଛି। ଏହି ଟୁର୍ନାମେଣ୍ଟ ମୁମ୍ବାଇର ଦୁଇଟି ଷ୍ଟାଡିୟମ ବ୍ରାବୋର୍ନ ଏବଂ ଡିଓ୍ବାଇ ପାଟିଲରେ ଖେଳାଯିବ। ଏହି ଦୁଇଟି ଷ୍ଟାଡିୟମରେ ମୋଟ ୨୨ ଟି ମ୍ୟାଚ ଖେଳାଯିବ।
ମହିଳା ଟି-୨୦ ବିଶ୍ୱକପ ପରେ ଖେଳାଳି ଏବଂ ପ୍ରଶିକ୍ଷକଙ୍କୁ ଯେଭଳି ସୁବିଧା ହେବ ସେଥିପାଇଁ ଏହି ଲିଗ କେବଳ ଗୋଟିଏ ସ୍ଥାନରେ ଅନୁଷ୍ଠିତ ହେଉଛି। ଫେବୃଆରୀ ୧୦ ରୁ ୨୬ ପର୍ଯ୍ୟନ୍ତ ଦକ୍ଷିଣ ଆଫ୍ରିକାରେ ମହିଳା ଟି-୨୦ ବିଶ୍ୱକପ ଟୁର୍ନାମେଣ୍ଟ ଖେଳାଯିବ । ଏହା ପରେ ମହିଳା ଆଇପିଏଲ ଆରମ୍ଭ ହେବ ।
ଏଥି ସହିତ, ଫେବୃଆରୀ ୧୩ ରେ, ଖେଳାଳିମାନଙ୍କୁ ମୁମ୍ବାଇରେ ନିଲାମ କରାଯିବ। ମହିଳା ଆଇପିଏଲ ନିଲାମ ପାଇଁ ମୋଟ ୧୫୨୫ ଖେଳାଳି ପଞ୍ଜୀକୃତ ହୋଇଥିଲେ। ସେଥିମଧ୍ୟରୁ ୪୦୯ ଖେଳାଳି ଶର୍ଟଲିଷ୍ଟ ହୋଇଛନ୍ତି। ସେଥିମଧ୍ୟରୁ ୨୪୬ ଜଣ ଭାରତୀୟ ଏବଂ ୧୬୩ ଜଣ ବିଦେଶୀ ଖେଳାଳି ଅଛନ୍ତି। ୧୬୩ ବିଦେଶୀ ଖେଳାଳିଙ୍କ ମଧ୍ୟରୁ ଆଠ ଜଣ ଆସୋସିଏଟ ଦେଶରୁ ଆସିଛନ୍ତି। ଚଳିତ ବର୍ଷ ମହିଳା ପ୍ରିମିୟର ଲିଗରେ ପାଞ୍ଚଟି ଦଳ ଖେଳୁଥିବାର ଦେଖିବାକୁ ମିଳିବ। ସେଥିମଧ୍ୟରେ ମୁମ୍ବାଇ ଇଣ୍ଡିଆନ୍ସ, ଗୁଜରାଟ ଜଏଣ୍ଟସ, ଲକ୍ଷ୍ନୌ ୱାରିୟର୍ସ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଏବଂ ଦିଲ୍ଲୀ କ୍ୟାପିଟାଲ ରହିଛି।
