ମାଲକାନଗିରି,୩ା୯(ନୃସିଂହ ଚରଣ ମହାନ୍ତି): ଦିନ ଥିଲା ସେ ମାଓବାଦୀ ସଂଗଠନରେ ଥିଲେ। ମାତ୍ର ଏବେ ସମାଜର ମୁଖ୍ୟସ୍ରୋତରେ ସାମିଲ ହେବା ଲାଗି ପୋଲିସ ପାଖରେ ଆତ୍ମସମର୍ପଣ କରିବା ପରେ ସେ ବନି ଯାଇଛନ୍ତି ଡିଆରଜି ବାହିନୀର ଜଣେ ଶକ୍ତିଶାଳୀ ମହିଳା କମାଣ୍ଡୋ। ମାଲକାନଗିରି ଛତିଶଗଡ଼ ସୀମାନ୍ତ ବିଜାପୁର ଜିଲାରେ ଏବେ ମାଓବାଦୀଙ୍କ ଉପରେ ନଜର ରଖିବା ଲାଗି ଏହି ମହିଳା କମାଣ୍ଡୋମାନଙ୍କୁ ନିୟୋଜିତ କରାଯାଇଛି।
ହାତରେ ଏ.କେ. ୪୭ ଭଳି ଅତ୍ୟାଧୁନିକ ବନ୍ଧୁକ ଧରି ମାଓବାଦୀ ଅପରେଶନରେ ବାହାରୁଛନ୍ତି ମହିଳା ସୁରକ୍ଷାକର୍ମୀ। ଏମାନେ ହେଉଛନ୍ତି ଛତିଶଗଡ ଡିଆରଜି ବାହିନୀର ମହିଳା କମାଣ୍ଡୋ। ଏମାନଙ୍କ ଭିତରେ ରହିଛନ୍ତି ଏମିତି ଜଣେ ମହିଳା ଯାହାଙ୍କୁ ପିଲା ଦିନେ ବାପା ମାଆ ଖୁସିରେ ତାଙ୍କ ନାମ ସୁମିତ୍ରା ବୋଲି ରଖିଥିଲେ। ହେଲେ କିଏ ଜାଣିଥିଲା ବଡ଼ ହେଲା ବେଳକୁ ସେ କୁଖ୍ୟାତ ମାଓବାଦୀ ନେତ୍ରୀ ହୋଇଯିବେ। ଦୀର୍ଘ ୧୦ ବର୍ଷ ଧରି ଦଣ୍ଡକାରଣ୍ୟ ମାଓବାଦୀ ସଂଗଠନରେ ଜଣେ ସକ୍ରିୟ ମାଓବାଦୀ ଭାବେ କାର୍ଯ୍ୟ କରିଛନ୍ତି ସୁମିତ୍ରା। ଟପ୍ ମାଓବାଦୀ ନେତା ହିଡମାଙ୍କ ସହଯୋଗୀ ଭାବେ କାମ କରୁଥିଲେ ସୁମିତ୍ରା। ମାଲକାନଗିରି ଛତିଶଗଡ଼ ସୀମାନ୍ତ ବିଜାପୁର ଜିଲା ନିବାସୀ ସୁମିତ୍ରା ଦୀର୍ଘବର୍ଷ ଧରି ମାଓବାଦୀ ସଂଗଠନରେ ରହିବା ସହ ସୁକୁମା, ଦାନ୍ତେଓ୍ବାଡା ଓ ବିଜାପୁର ଜିଲାରେ ଅନେକ ହିଂସାକାଣ୍ଡ ଘଟାଇଛନ୍ତି। ହେଲେ ଜଗଦଲପୁରସ୍ଥିତ ସିଆର୍ପିଏଫ୍ ବାହିନୀରେ ଥିବା ନିଜ ଭାଇଙ୍କ ଏକ ହାତ ଲେଖା ଚିଠି ତାଙ୍କୁ ଫେରାଇ ଆଣିଥିଲା ସମାଜର ମୁଖ୍ୟସ୍ରୋତକୁ। ୨୦୨୦ରେ ବିଜାପୁର ପୋଲିସ ପାଖରେ ଆତ୍ମସମର୍ପଣ କରିବା ପରେ ସୁମିତ୍ରା ଡିଆରଜି ବାହିନୀର ଜଣେ ଦକ୍ଷ ମହିଳା କମାଣ୍ଡୋ ବନି ଯାଇଛନ୍ତି। ବିଜାପୁର ଜିଲାରେ ମାଓବାଦୀଙ୍କୁ ନିପାତ କରିବା ଲାଗି ତାଙ୍କୁ ମିଳିଛି ଦାୟିତ୍ୱ। କେବଳ ସୁମିତ୍ରା ନୁହନ୍ତି, ତାଙ୍କ ପରି ଅବାଟକୁ ଚାଲିଯାଇଥିବା ରାଜକୁମାରୀ ଓ ମମତା ମଧ୍ୟ ମାଓବାଦୀ ସଂଗଠନ ଛାଡ଼ି ଏବେ ଛତିଶଗଡ଼ ପୋଲିସର ଡିଆରଜି ବାହିନୀରେ ସାମିଲ ହୋଇଛନ୍ତି।
ଏବେ ମୋଟ ୭୫ ଜଣ ମହିଳା କମାଣ୍ଡୋ ରହିଛନ୍ତି ବିଜାପୁର ଏସ୍ପିଙ୍କ ପାଖରେ। ଏହା ବ୍ୟତୀତ ବିଜାପୁର ଜିଲାର ବିଭିନ୍ନ ମାଓବାଦୀ ପ୍ରବଣ ଅଞ୍ଚଳରେ ଥିବା ସୁରକ୍ଷାକର୍ମୀଙ୍କ କ୍ୟାମ୍ପରେ ନିୟୋଜିତ ଅଛନ୍ତି ଆହୁରି ୧୨୫ ଜଣ ମହିଳା କମାଣ୍ଡୋ। ଯେଉଁମାନେ ଜଙ୍ଗଲ ଭିତରେ ଦିନରାତି ଚଳାଇଛନ୍ତି ମାଓବାଦୀ ବିରୋଧୀ ଅପରେଶନ। ସରକାରଙ୍କ ତ୍ରିବେଣୀ ନୀତି ଅନୁଯାୟୀ ସବ୍କା ବିକାଶ, ସ୍ବକା ବିଶ୍ବାସ ଓ ସବ୍କା ସୁରକ୍ଷା ଡିଆରଜି ବାହିନୀର ଏହି ମହିଳା କମାଣ୍ଡୋଙ୍କ ହାତରେ ବୋଲି କହିଛନ୍ତି ବିଜାପୁର ଏସ୍ପି ଅଞ୍ଜନେ ବାର୍ନୋଇ।
