ଭୁବନେଶ୍ୱର,୧୨।୪(ବ୍ୟୁରୋ):ଭାଜପା ପକ୍ଷରୁ ଗତ ୬ରୁ ଆସନ୍ତା ୨୦ ତାରିଖ ପର୍ଯ୍ୟନ୍ତ ଦେଶବ୍ୟାପୀ ସାମାଜିକ ନ୍ୟାୟ ସେବା ପକ୍ଷ ପାଳନ କରାଯାଉଛି। ଏହି ଅବସରରେ ଭାଜପାର କାର୍ଯ୍ୟକର୍ତାମାନେ କେନ୍ଦ୍ର ସରକାରଙ୍କ ବିଭିନ୍ନ ଗରୀବକଲ୍ୟାଣ ଯୋଜନା ତଥା ମହିଳାଙ୍କ ସାମାଜିକ, ଅର୍ଥନୈତିକ କ୍ଷେତ୍ରରେ ଅଗ୍ରଗତି ପାଇଁ ମୋଦୀ ସରକାରଙ୍କ ଦ୍ୱାରା କରାଯାଇଥିବା ଯୋଜନାକୁ ସଫଳତାର ସହ କାର୍ଯ୍ୟକାରୀ କରିଆସୁଛନ୍ତି ା ହେଲେ ୨୩ ବର୍ଷ ନିରଙ୍କୁଶ ଭାବେ ଶାସନ କରିଆସୁଥିବା ବିଜେଡି ମହିଳା ସଶକ୍ତିକରଣ ନଁାରେ ମହିଳା ଶୋଷଣ ନୀତି ଆପଣାଇଛି ବୋଲି ଭାଜପା ମୁଖପାତ୍ର ସୋନାଲି ସାହୁ କହିଛନ୍ତି।
ଭାଜପା ରାଜ୍ୟ କାର୍ଯ୍ୟାଳୟଠାରେ ଆୟୋଜିତ ଖବରଦାତା ସମ୍ମିଳନୀରେ ସୋନାଲି କହିଛନ୍ତି, କେନ୍ଦ୍ର ସରକାର ମହିଳାଙ୍କ ପାଇଁ ସାରା ଭାରତରେ ୧୦ କୋଟି ୯୫ ଲକ୍ଷ ଶୌଚାଳୟ କରିଛନ୍ତି। ହେଲେ କେନ୍ଦ୍ରରୁ ଶୌଚାଳୟ ପାଇଁ ଆସିଥିବା ୭୦୦ କୋଟି ଟଙ୍କାର ଦୁର୍ନୀତି ହୋଇଛି। ରାଜ୍ୟରେ ୧୦୦ ପରିବାରରୁ ୬୫ ଜଣଙ୍କ ଘରେ ଶୌଚାଳୟ ନାହିଁ। ସେହିପରି ଭାରତ ବର୍ଷରେ ୧୦ କୋଟି ପରିବାର ଉଜ୍ଜ୍ୱଳା ଯୋଜନା ଲାଭ ପାଉଛନ୍ତି। କିନ୍ତୁ ଓଡିଶାରେ ରାଜ୍ୟ ସରକାରଙ୍କ ଦୃଢ ଇଚ୍ଛାଶକ୍ତି ଅଭାବରୁ କେନ୍ଦ୍ରୀୟ ଯୋଜନାର ସଫଳ ରୂପାୟନ ହୋଇପାରୁନାହିଁ। ଶିକ୍ଷା କ୍ଷେତ୍ରରେ ଓଡ଼ିଶା ସର୍ବଭାରତୀୟ ସ୍ତରରେ ୧୩ତମ ସ୍ଥାନରେ ରହିବା ଶିକ୍ଷାର ଅବ୍ୟବସ୍ଥାକୁ ଆଙ୍ଗୁଳି ନିର୍ଦ୍ଦେଶ କରୁଛି। ରାଜ୍ୟରେ ୩୭୦ଟି ପଞ୍ଚାୟତରେ ହାଇସ୍କୁଲ ନ ଥିବାବେଳେ ୪୦୦ ବାଳିକା ବିଦ୍ୟାଳୟରେ ଶୌଚାଳୟକୁ ପାଣିର ସଂଯୋଗୀକରଣ କରାଯାଇନାହିଁ। ରାଜ୍ୟରେ ମହିଳାଙ୍କ ସ୍ବାକ୍ଷରତା ହାର ୬୪.୦୧% ରହିଛି। ରାଜ୍ୟରେ ପ୍ରତ୍ୟେକ ଦିନ ୬ ଜଣ ମହିଳା ଧର୍ଷଣ ଶିକାର ହେଉଥିବା ବେଳେ ୪ ଜଣ ମହିଳା ଅପହରଣ ହେଉଛନ୍ତି। ରାଜ୍ୟ ସରକାର ଏସ୍ଏଚଜି ଗ୍ରୁପର ସଦସ୍ୟତା ଆଢ଼ୁଆଳରେ ମହିଳାଙ୍କୁ ବିଜେଡି କାର୍ଯ୍ୟକର୍ତା ଭାବେ ବ୍ୟବହାର କରି ରାଜନୈତିକ ପଷାପାଲିର ଗୋଟି ଭାବେ ପରିଚାଳନା କରିବା ନିନ୍ଦନୀୟ ବୋଲି ସେ କହିଛନ୍ତି।
