ଆଗ୍ରା, ୨୭।୭: ଉତ୍ତର ପ୍ରଦେଶରେ ଲୋକଙ୍କ ମନରେ ଏବେ ମଧ୍ୟ କେମିତି ଜାତିପ୍ରଥା ବସା ବାନ୍ଧିହୋଇ ରହିଛି ତାହାର ଏକ ଜ୍ୱଳନ୍ତ ଉଦାହରଣ ଆଗ୍ରାରେ ଦେଖିବାକୁ ମିଳିଛି। ଏଠାରେ ଜଣେ ଦଳିତ ମହିଳାଙ୍କ ମୃତ୍ୟୁପରେ ପରିବାର ଲୋକ ଗ୍ରାମ ବାହାରେ ଥିବା ଶ୍ମଶାନରେ ତାଙ୍କର ଅନ୍ତିମ ସଂସ୍କାର କରୁଥିଲେ। କିନ୍ତୁ ସେଠାରେ କିଛି ଗ୍ରାମବାସୀ ପହଞ୍ଚି ଶବଦାହକୁ ବିରୋଧ କରିଥିଲେ। ଫଳରେ ଉପାୟଶୂନ୍ୟ ହୋଇ ଏହି ପରିବାର ଲୋକ ଥାନାରେ କୌଣସି ମାମଲା ରୁଜୁୂ ନ କରି ମହିଳାଙ୍କ ଶବକୁ ସେଠାରୁ ଧରି ଅନ୍ୟ ଏକ ସ୍ଥାନରେ ଶେଷରେ ଅନ୍ତିମ ସଂସ୍କାର କରିଥିବା ଜଣାପଡ଼ିଛି। ଘଟଣାର ଏକ ସପ୍ତାହ ପରେ ଏହି ଖବର ପାଇ ପୋଲିସ ଏହାର ତଦନ୍ତ ଆରମ୍ଭ କରିଛି। ଅଛନେରା ତହସିଲ ଅନ୍ତର୍ଗତ ରାୟଭା ଗ୍ରାମରେ ନଟ୍ ସମ୍ପ୍ରଦାୟର କିଛି ଲୋକ ରୁହନ୍ତି। ଏହି ସମ୍ପ୍ରଦାୟର ଜଣେ ମହିଳାଜଣଙ୍କ ଗତ ୨୦ରେ ସ୍ବାସ୍ଥ୍ୟ ଖରାପ ହୋଇଥିଲା। ଏହାପରେ ସେହିଦିନ ତାଙ୍କ ମୃତ୍ୟୁ ହୋଇଥିଲା। ଏହାପରେ ପରିବାର ଲୋକ ଅନ୍ତିମ ସଂସ୍କାର ପାଇଁ ଗ୍ରାମ ନିକଟରେ ଥିବା ଶ୍ମଶାନରେ ପହଞ୍ଚତ୍ଥିଲେ। ମହିଳାଙ୍କ ୬ ବର୍ଷର ପୁଅ ଜେଜେବାପାଙ୍କ ସହାୟତାରେ ମୁଖାଗ୍ନି ଦେବା ପାଇଁ ଚିତା ଚାରିପାଖେ ବୁଲୁଥିବାବେଳେ କିଛି ଗ୍ରାମବାସୀ ସେଠାରେ ପହଞ୍ଚି ଶବଦାହକୁ ବିରୋଧ କରିଥିଲେ। ପୂର୍ବରୁ ମଧ୍ୟ ଏହି ସମ୍ପ୍ରଦାୟର ଲୋକଙ୍କ ଶବକୁ ଏଠାରେ ଗ୍ରାମବାସୀ ଅନ୍ତିମ ସଂସ୍କାର କରାଇ ଦେଉ ନ ଥିବା ଜଣାପଡ଼ିଛି।
