ଡାକ୍ତରଙ୍କୁ ଈଶ୍ୱରଙ୍କ ଦ୍ୱିତୀୟ ଅବତାର କୁହାଯାଏ। କାରଣ ଡାକ୍ତରମାନେ ମଣିଷର ଜୀବନ ରକ୍ଷା କରନ୍ତି ଏବଂ ଖରାପ ସମୟରେ ସେମାନଙ୍କୁ ସାହାଯ୍ୟ କରନ୍ତି। କିନ୍ତୁ ରକ୍ଷକ ଯଦି ଭକ୍ଷକ ସାଜେ ତେବେ କାହାକୁ କହିବେ? ନିକଟରେ ବିହାରରେ ଏମିତି ଏକ ମାମଲା ସାମ୍ନାକୁ ଆସିଛି। ଏଠାକାର ଜଣେ ମହିଳାଙ୍କ ଉଭୟ କିଡ୍ନୀ ଚୋରି ହୋଇଛି। ଏନେଇ ମହିଳା ଜଣକ ଅଭିଯୋଗ ଆଣିଛନ୍ତି।
ଏକ ରିପୋର୍ଟ ଅନୁଯାୟୀ, ସୁନୀତା ଦେବୀ ନାମକ ଜଣେ ମହିଳା ତାଙ୍କ ଗର୍ଭାଶୟ ପାଇଁ ଅସ୍ତ୍ରୋପଚାର କରିବା ପାଇଁ ବିହାରର ମୁଜାଫରପୁରର ବରୀପୁରସ୍ଥିତ ଡାକ୍ତରଖାନା ଯାଇଥିଲେ। କିନ୍ତୁ ତାଙ୍କର ଉଭୟ କିଡ୍ନୀକୁ ଡାକ୍ତରଖାନାରେ ନିଆଯାଇଥିବା ଅଭିଯୋଗ ହୋଇଥିଲା। ୩୮ ବର୍ଷୀୟା ସୁନୀତା ଅଭିଯୋଗ କରିଛନ୍ତି ଯେ, ଡାକ୍ତରମାନେ ତାଙ୍କୁ ଚେତାଶୂନ୍ୟ କରିଦେଇଥିଲେ ଏବଂ ଯେତେବେଳେ ତାଙ୍କର ଚେତା ଫେରିଥିଲା ଗର୍ଭାଶୟ ପରିବର୍ତ୍ତେ ତାଙ୍କ ଉଭୟ କିଡ୍ନୀକୁ ବାହାର କରାଯାଇଥିଲା ଏବଂ ଡାକ୍ତରମାନେ ଅଦୃଶ୍ୟ ହୋଇଯାଇଥିଲେ।
ଫଳରେ ମହିଳାଙ୍କୁ ପ୍ରତିଦିନ ଡାଏଲିସିସ କରିବାକୁ ପଡ଼ିବ। ଏହି ମାମଲା ସେପ୍ଟେମ୍ବରର ଅଟେ। ସେବେଠାରୁ ମହିଳାଙ୍କୁ ପ୍ରତିଦିନ ଡାଏଲିସିସ କରିବାକୁ ପଡୁଛି। ଡାକ୍ତର ତାଙ୍କୁ କିମ୍ବା ତାଙ୍କ ସମ୍ପର୍କୀୟଙ୍କୁ ଏ ବିଷୟରେ ଜଣାଇ ନାହାନ୍ତି। କିଡ୍ନୀ ଚୋରି ପରେ ମହିଳାଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାକୁ ଲାଗିଲା ଏବଂ ତାଙ୍କୁ ତୁରନ୍ତ ମୁଜାଫରପୁରର ଶ୍ରୀକୃଷ୍ଣ ମେଡିକାଲ କଲେଜ ଏବଂ ହସ୍ପିଟାଲରେ ଭର୍ତ୍ତି କରାଯାଇଥିଲା। ତା’ପରେ ସୁନୀତାଙ୍କ ଦୁଇଟି କିଡ୍ନୀ ଗାଏବ ହୋଇଥିବା ଡାକ୍ତରମାନେ ପରିବାର ଲୋକଙ୍କୁ ଜଣାଇଥିଲେ। କିଡ୍ନୀ ବିନା ସେ ବଞ୍ଚି ପାରିବେ ନାହିଁ ବୋଲି ଡାକ୍ତରମାନେ କହିଛନ୍ତି।
ତେବେ ଡାକ୍ତର ନକଲି ବୋଲି ଜଣାପଡିଛି। ଦେବୀଙ୍କ ପରିବାର ପୋଲିସ ନିକଟରେ ଅଭିଯୋଗ କରିଛନ୍ତି, ଯାହାର ତଦନ୍ତ ଚାଲିଛି। ସେହି ଦିନଠାରୁ ଶୁଭକାନ୍ତ କ୍ଲିନିକ୍ର ପଓ୍ବନ କୁମାର ଏବଂ ଆର୍.କେ ସିଂ ଫେରାର ଅଛନ୍ତି। ଅନୁସନ୍ଧାନରୁ ଜଣାପଡ଼ିଛି, କ୍ଲିନିକ୍ର ପଞ୍ଜୀକରଣ ସେଠାରେ ନାହିଁ ଏବଂ ଡାକ୍ତରଙ୍କ ଶିକ୍ଷା ମଧ୍ୟ ନକଲି। ବର୍ତ୍ତମାନ ମହିଳା ଏବଂ ତାଙ୍କ ପରିବାର ଉଭୟ ଅଭିଯୁକ୍ତଙ୍କୁ ଧରାଯିବା ଏବଂ ସେମାନଙ୍କ କିଡନୀ ମହିଳାଙ୍କୁ ଦିଆଯାଉ ବୋଲି ଦାବି କରୁଛନ୍ତି। ମହିଳା ଜଣକ ୩ ସନ୍ତାନର ଜନନୀ। ତାଙ୍କ ସ୍ବାମୀ ଜଣେ ଶ୍ରମିକ, ଏଭଳି ପରିସ୍ଥିତିରେ ତାଙ୍କ ଘର ଚଳାଇବା ତାଙ୍କ ପାଇଁ ବହୁତ କଷ୍ଟକର।
