ୱାଶିଂଟନ୍: ଫିଲାଡେଲ୍ଫିଆର ୨୮ ବର୍ଷୀୟା ଲିଜ୍ ଗ୍ରାମଲିଚ୍ ନାମ୍ନୀ ଜଣେ ମହିଳା ଡିଜ୍ନୀ ୱାଲର୍ଡର ମାୟାରେ ପଡିଛନ୍ତି। ସେ ନିଜ ପ୍ଲାଜ୍ମା ବିକ୍ରି କରି ନିଜ ଭଉଣୀଙ୍କ ସହିତ ପ୍ରତି ମାସରେ ଅର୍ଲାଣ୍ଡୋସ୍ଥିତ ଡିଜ୍ନୀ ୱାଲର୍ଡ ବୁଲିବାକୁ ଯାଉଛନ୍ତି। ଫକ୍ସ ନ୍ୟୁଜ ଅନୁଯାୟୀ, ପ୍ଲାଜ୍ମା ସମ୍ପର୍କରେ ଯୁକ୍ତି କରି ଗ୍ରାମଲିଚ୍ କହିଛନ୍ତି ଯେ, ଏହା ଦ୍ୱାରା ସେ ପରର ଉପକାର କରୁଛନ୍ତି।
ସୂଚନା ଅନୁଯାୟୀ, ଗ୍ରାମଲିଚ୍ ୨୦୨୨ ମସିହା ଜାନୁୟାରୀ, ଫେବୃୟାରୀ ଏବଂ ମାର୍ଚ୍ଚରେ ଭଉଣୀଙ୍କ ସହ ଡିଜ୍ନୀ ୱାଲର୍ଡ ବୁଲି ସାରିଛନ୍ତି। ଏହାସହ ସେ ଏପ୍ରିଲ ମାସ ପାଇଁ ମଧ୍ୟ ଆଗରୁ ଟିକେଟ୍ ବୁକ କରିଛନ୍ତି। ତାଙ୍କ ଡିଜନୀ ୱାଲର୍ଡ ବୁଲିବା ବିମାନ ଦର ଉପରେ ନିର୍ଭର କରୁଛି। କାରଣ ଯେତେବେଳେ ବିମାନ ଦର କମ୍ ଥାଏ। ସେତେବେଳେ ଗ୍ରାମଲିଚ୍ ସେଠାକୁ ବୁଲିବାକୁ ଯାଇଥାନ୍ତି। ବୁଲିବା ଅର୍ଥ ଭରଣା ପାଇଁ ସେ ସପ୍ତାହକୁ ୨ ଥର ପ୍ଲାଜ୍ମା ବିକ୍ରି କରିଥାନ୍ତି। ଫିଲାଡେଲ୍ଫିଆରୁ ଅର୍ଲାଣ୍ଡୋ ବିମାନରେ ଯିବାକୁ ୨ ଘଣ୍ଟା ସମୟ ଲାଗୁଥିବାରୁ ସେ ଗୋଟେ ଦିନରେ ଡିଜ୍ନୀ ଲ୍ୟାଣ୍ଡ ବୁଲିବାକୁ ଯାଇପାରିବେ ବୋଲି ୨୦୨୦ରେ ଚିନ୍ତା କରିଥିଲେ, ଯାହା ତାଙ୍କର ପ୍ରଥମ ଯାତ୍ରା ଥିଲା।
