ଲୋଇସିଂହା,୨୪।୯(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ କନ୍ଦାଜୁରୀ ଗ୍ରାମର ଅଙ୍ଗନୱାଡି କେନ୍ଦ୍ର-୧ ଦୀର୍ଘ ମାସ ହେଲା ବନ୍ଦ ରହିଛି। ଉକ୍ତ କେନ୍ଦ୍ର ଖୋଲିବା ଦିଗରେ ପ୍ରଶାସନ ଆନ୍ତରିକତା ଦେଖାଉନାହିଁ। ଫଳରେ କେନ୍ଦ୍ର ଅଧୀନରେ ଥିବା ଶିଶୁଙ୍କ ପ୍ରାକ୍ଶିକ୍ଷା ଏବଂ ଗ୍ରାମର ଗର୍ଭବତୀ ଓ ପ୍ରସୂତି ସରକାରୀ ସୁବିଧାର ବଞ୍ଚତ୍ତ ରହିଛନ୍ତି। ଉକ୍ତ କେନ୍ଦ୍ର ଖୋଲିବା ଦିଗରେ ଶୁକ୍ରବାର ଗ୍ରାମର ମହିଳାମାନେ ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟରେ ସିଡିପିଓ ପ୍ରଜ୍ଞା ବାରିକଙ୍କୁ ଘେରିଥିଲେ। କେବେ କେନ୍ଦ୍ର ଖୋଲିବ ସେ ନେଇ ପ୍ରଶ୍ନ କରିଥିଲେ। ଏହି ମାମଲା ବିବାଦୀୟ ଥିବାରୁ ଉପରିସ୍ଥ ଅଧିକାରୀ ଯାହା ନିଷ୍ପତ୍ତି ନେବେ ସେହି ଅନୁସାରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି କହିଥିଲେ। ସୋମବାର ବଲାଙ୍ଗୀରରେ ଏଡିଏମକୁ ସାକ୍ଷାତ କରିବାକୁ ସେ ମହିଳାମାନଙ୍କୁ ପରାମର୍ଶ ଦେଇଥିଲେ ।
କନ୍ଦାଜୁରୀ ପଞ୍ଚାୟତ ସଦର ଗାଁ ୧ନଂ ଅଙ୍ଗନୱାଡି କେନ୍ଦ୍ରର ହେଲପର ଅବସର ନେବା ପରେ ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ ପକ୍ଷରୁ ୨୦୨୦ ଡିସେମ୍ବରରେ ଏହି ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ଏଥିରେ ଗ୍ରାମର ୩ଜଣ ମହିଳା ଆବେଦନ କରିଥିଲେ। ୨୦୨୧ ଫେବୃୟାରୀରେ ହେଲପର ଚୟନ ପାଇଁ ଭୋଟିଂ ହୋଇଥିଲା । ଆବେଦନକାରୀ ୩ଜଣଙ୍କ ମଧ୍ୟରୁ ଜଣେ ଦିବ୍ୟାଙ୍ଗ ମହିଳାଙ୍କୁ ୨୧ଖଣ୍ଡ , ସସ୍ମିତା ପଧାନଙ୍କୁ ୭ ଏବଂ ପଦ୍ମିନୀ ସିଂଙ୍କ ସପକ୍ଷରେ ଖଣ୍ଡିଏ ଭୋଟ ପଡିଥିଲା । ହେଲେ ପକ୍ଷପାତିତା କରି ଏକମାତ୍ର ଭୋଟ ପାଇଥିବା ମହିଳାଙ୍କୁ ବିଭାଗ ପକ୍ଷରୁ ହେଲପର ନିଯୁକ୍ତୁ ଦିଆଯାଇଥିଲା। ଏହାକୁ ନେଇ ଗ୍ରାମରେ ପ୍ରତିକ୍ରିୟା ପ୍ରକାଶ ପାଇଥିଲା । ସେବେଠାରୁ ଉକ୍ତ କେନ୍ଦ୍ରକୁ ଅଭିଭାବକମାନେ ଶିଶୁଙ୍କୁ ଛାଡୁ ନାହାନ୍ତି କିମ୍ବା କେନ୍ଦ୍ର ଅଧୀନ ଗର୍ଭବତୀ ଓ ପ୍ରସୂତି ମହିଳାମାନଙ୍କ ପାଇଁ ରହିଥିବା ସରକାରୀ ସୁବିଧା ଗ୍ରହଣ କରୁନାହାନ୍ତି। ଉକ୍ତ ବିବାଦର ସମାଧାନ ପାଇଁ ଗ୍ରାମବାସୀ ବହୁବାର ଉଦ୍ୟମ କରି ବିଫଳ ହୋଇଛନ୍ତି। ଅପରପକ୍ଷେ ପ୍ରଶାସନ ମଧ୍ୟ ଉକ୍ତ କେନ୍ଦ୍ର ଖୋଲିବା ଦିଗରେ ଆନ୍ତରିକତା ଦେଖାଉନାହିଁ। ଶୁକ୍ରବାର ମହିଳାମାନେ କାର୍ଯ୍ୟାଳୟକୁ ଆସିବା ସମୟରେ ସିଡିପିଓ ଅଫିସରେ ନଥିଲେ। ପରବର୍ତ୍ତି ସମୟରେ ସିଡିପିଓ ପହଞ୍ଚତ୍ବା ପରେ ଆମ ଶିଶୁଙ୍କୁ ଶିକ୍ଷା ଦିଅ, ସ୍ବାସ୍ଥ୍ୟସେବା ଦିଅ କହି କେନ୍ଦ୍ର ଖୋଲିବାକୁ ଦାବି କରିଥିଲେ ।
