କଥାରେ ଅଛି, ଘର ଫୁଙ୍କି ତାମସା ଦେଖୁଛ। ଏହି କଥାର ଯଥାର୍ଥତା ଦେଖିବାକୁ ମିଳିଛି ଜଣେ ମହିଳାଙ୍କ କ୍ଷେତ୍ରରେ। ସେ ନିଜ ଘରେ ନିଆଁ ଲଗାଇଦେଇ ବାହାରେ ଚେୟାର ଉପରେ ବସି ଏହି ଦୃଶ୍ୟକୁ ଉପଭୋଗ କରୁଥିଲେ। ଏପରି ଘଟଣା ଦେଖିବାକୁ ମିଳିଛି, ଆମେରିକାର ମ୍ୟାରିଲ୍ୟାଣ୍ଡ ସହରରେ।
ଏକ ରିପୋର୍ଟ ଅନୁଯାୟୀ ମହିଳା ନିଜ ଘରେ ପ୍ରଥମେ ନିଆଁ ଲଗାଇଦେଲେ। ପରେ ଘର ସାମ୍ନାରେ ଥିବା ଲନ୍ରେ ଚେୟାର ଉପରେ ବସି ଘର ଜଳୁଥିବା ଦୃଶ୍ୟ ଦେଖିଲେ। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଜଣେ ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ଏହି ଘର ଭିତର ଜଳୁଥିବା ସେ ଦେଖିବାକୁ ପାଇଥିଲେ। ତେବେ ମହିଳାଙ୍କ ପୂରା କାଣ୍ଡ ପଡ଼ୋଶୀଙ୍କ ଘରେ ଲାଗିଥିବା ସିସିଟିଭିରେ କଏଦ ହୋଇଛି।
ପ୍ରତ୍ୟକ୍ଷଦର୍ଶୀ କୁହନ୍ତି, ପ୍ରଥମେ ଘର ଭିତରୁ ପାଟି ଶୁଭିଲା। ପରେ ଜୋର୍ରେ କେହି ଝଗଡ଼ା ଲାଗୁଥିବା ମଧ୍ୟ ଶୁଣିବାକୁ ମିଳିଲା। ଏହାର କିଛି ସମୟ ପରେ ଘରେ ନିଆଁ ଜଳି ଉଠିଲା। ମହିଳା ଜଣକ ଘରେ ନିଆଁ ଲଗାଇ ଦେଇ ଆସି ବାହାରେ ବସି ପେପର ପଢ଼ିବାରେ ଲାଗିଲେ। ଏହି ସମୟରେ ତାଙ୍କ ସ୍ବାମୀ ଘର ଭିତରେ ଫସି ରହିଥିଲେ। ଖବର ପାଇ ଦମକଳବାହିନୀ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିବା ସହ ସ୍ବାମୀଙ୍କୁ ଉଦ୍ଧାର କରିଛନ୍ତି। ତେବେ ମହିଳା ଜଣଙ୍କ କାହିଁକି ଏପରି କାଣ୍ଡ ଭିଆଇଲେ ଏ ବିଷୟରେ ଅଧିକ ପଚରାଉଚରା ଚାଲିଛି। ତଦନ୍ତ ପରେ ସମସ୍ତ କଥା ଜଣାପଡ଼ିବ।
