ରାଉରକେଲା, ୮।୧୦(ସଙ୍ଗୀତା ଜେନା): ରାଉରକେଲା ପୋଲିସ ଜିଲା ଅଧୀନ ରଘୁନାଥପାଲୀ ଥାନା ଅଞ୍ଚଳରେ ସୋମବାର ରାତି ପ୍ରାୟ ୯ଟାରେ ଜଣେ ମହିଳାଙ୍କୁ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ଏହି ଘଟଣାରେ ପୋଲିସ ଜଣେ ଯୁବକଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ କୋଏଲବ୍ୟାଙ୍କ ଅଞ୍ଚଳର କାହ୍ନୁ ଚରଣ ଜେନା(୩୨)। ତାଙ୍କୁ ମଙ୍ଗଳବାର ସନ୍ଧ୍ୟା ୭ଟାରେ ଡାକ୍ତରୀ ମାଇନା ପରେ କୋର୍ଟଚାଲାଣ କରାଯାଇଛି। ପୋଲିସ ଅନ୍ୟ ୨ଜଣ ଯୁବକଙ୍କୁ ଅଟକ ରଖି ପଚରାଉଚୁରା କରୁଛି। ସେହିପରି ପୂର୍ବାହ୍ନ ୧୧ଟାରେ ପୀଡ଼ିତା ମହିଳାଙ୍କ ଡାକ୍ତରୀ ମାଇନା ପରେ କୋର୍ଟରେ ବୟାନ ରେକର୍ଡ କରାଯାଇଛି। ଏ ନେଇ ରଘୁନାଥପାଲୀ ଥାନାରେ ଏକ ମାମଲା (ନଂ.୫୬୪/୨୫) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ମହିଳା ଜଣଙ୍କ ପାନପୋଷ ଅଞ୍ଚଳରେ ଘରୋଇ କାମ କରନ୍ତି। ଗିରଫ ଅଭିଯୁକ୍ତ, ଅଟକ ଯୁବକ ଦ୍ୱୟ ଏବଂ ପୀଡ଼ିତା ମହିଳା ପରସ୍ପର ପରିଚିତ ଅଟନ୍ତି। ମହିଳା ଜଣଙ୍କ ସୋମବାର ରାତି ପ୍ରାୟ ୯ଟାରେ କାମ ସାରି ଘରକୁ ଫେରୁଥିବା ବେଳେ ଏସ୍ଟିଆଇ ଓଭରବ୍ରିଜ୍ ଖରିଆବାହାଲ ବସ୍ତି ରେଳ ଲାଇନ ପାର୍ଶ୍ୱରେ ଅଭିଯୁକ୍ତ କାହ୍ନୁ ଚରଣ ତାଙ୍କୁ ପ୍ରଲୋଭିତ କରି ବଳାତ୍କାର କରିଥିଲେ। ତାଙ୍କ ସହଯୋଗୀମାନେ ବଳାତ୍କାର କରିବାକୁ ଊଦ୍ୟମ କଲାବେଳେ ମହିଳା ଜଣଙ୍କ ସେଠାରୁ କୌଣସି ପ୍ରକାରେ ଖସିଆସି ରଘୁନାଥପାଲୀ ଥାନାରେ ରାତି ପ୍ରାୟ ୨ଟା ୪୫ ମିନିଟ୍ରେ ଅଭିଯୋଗ କରିଥିଲେ। ପୋଲିସ ତନାଘନା କରି ଅଭିଯୁକ୍ତଙ୍କୁ ଧରିବାରେ ସଫଳ ହୋଇଥିଲା। ଜଣେ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଥିବାବେଳେ ଅନ୍ୟ ୨ଜଣଙ୍କୁ ଅଟକ ରଖି ପଚରାଉଚୁରା କରାଯାଉଛି। ସେମାନଙ୍କ ସମ୍ପୃକ୍ତି ଥିଲେ କାର୍ଯ୍ୟାନୁଷ୍ଟାନ ସୁନିଶ୍ଚିତ ଗ୍ରହଣ କରାଯିବ ବୋଲି ପାନପୋଷ ଏସ୍ଡିପିଓ ରଶ୍ମିରଞ୍ଜନ ମହାପାତ୍ର କହିଛନ୍ତି।
Dharitri – Odisha’s No.1 Trusted Odia Daily
