ଲକ୍ଷ୍ନୌ,୯।୩: ଜଣେ ମହିଳାଙ୍କୁ ଟ୍ରେନରେ ଡବଲ୍ ଖୁସି ମିଳିଛି। ଲକ୍ଷ୍ନୌରୁ ମୁମ୍ବାଇ ଯାଉଥିବା ପୁଷ୍ପକ ଏକ୍ସପ୍ରେସରେ ମହିଳା ଜଣଙ୍କ ଯମଜ ପୁତ୍ର ସନ୍ତାନ ଜନ୍ମ ଦେଇଛନ୍ତି। ଉଭୟ ଶିଶୁ ଏବଂ ମା’ ସୁସ୍ଥ ଅଛନ୍ତି। ଚିକିତ୍ସା ପାଇଁ ତାଙ୍କୁ ହରଦା ହସ୍ପିଟାଲରେ ଭର୍ତ୍ତି କରାଯାଇଛି। ଜରୁରୀକାଳୀନ ପରିସ୍ଥିତିକୁ ଦୃଷ୍ଟିରେ ରଖି ଟ୍ରେନ ହରଦାଠାରେ ଅଟକି ରହିଥିଲା। ଟ୍ରେନରେ ଉପସ୍ଥିତ ମହିଳାମାନଙ୍କ ସହାୟତାରେ ପ୍ରସବ ପାଇଁ ପ୍ରସ୍ତୁତି ଚାଲିଥିଲା।
ସୂଚନାନୁସାରେ, ପୂର୍ଣ୍ଣିମା କୁମାରୀ ୧୨୫୩୩ ଲକ୍ଷ୍ନୌ- ମୁମ୍ବାଇ ପୁଷ୍ପକ ଏକ୍ସପ୍ରେସ ଟ୍ରେନରେ ଝାନସିରୁ ମୁମ୍ବାଇ ଯାଉଥିଲେ। ତାଙ୍କ ସହ ସ୍ବାମୀ ଜିତେନ୍ଦ୍ର କୁମାର ମଧ୍ୟ ଥିଲେ। ହଠାତ୍ ପୂର୍ଣ୍ଣିମାଙ୍କ ପ୍ରସବ ବେଦନା ଆରମ୍ଭ ହୋଇଯାଇଥିଲା। ସଙ୍ଗେ ସଙ୍ଗେ ପାଖରେ ଥିବା କିଛି ମହିଳା ସେଠାରେ ପହଞ୍ଚିଲେ। ଏହି ଟ୍ରେନ ସିଧାସଳଖ ଇଟାରସି ଛାଡିବା ପରେ ଖଣ୍ଡୱା ଠାରେ ରହିବାର ଥିଲା। ଟିଟି ମୋବାଇଲରୁ ବାଣିଜି୍ୟକ ନିୟନ୍ତ୍ରଣକୁ ଏହି ସୂଚନା ଦେଇଥିଲେ। ଟ୍ରେନରେ ଉପସ୍ଥିତ ମହିଳାମାନଙ୍କ ସହାୟତାରେ, ପ୍ରସବ ଶେଷ କରିବା ପାଇଁ ପ୍ରସ୍ତୁତି ଚାଲିଥିଲା। କାନପୁରରୁ ମୁମ୍ବାଇ ଅଭିମୁଖେ ଯାତ୍ରା କରୁଥିବା ନୁର ଜାହାନ (୬୨) ସଫଳତାର ସହ ପ୍ରସବ କରିଥିଲେ ଏବଂ ଯାଆଁଳା ପୁଅ ଜନ୍ମ ହୋଇଥିବା ଜଣାଇଥିଲେ।
ଜରୁରୀକାଳୀନ ପରିସ୍ଥିତିକୁ ଦୃଷ୍ଟିରେ ରଖି ରେଳ ପ୍ରଶାସନ ହରଦା ଷ୍ଟେଶନରେ ଟ୍ରେନକୁ ଅଟକାଇଥିଲା। ସେଠାରେ ପୂର୍ବରୁ ଡାକ୍ତର ଏବଂ ସେବାୟତଙ୍କ ଦଳ ଆମ୍ବୁଲାନ୍ସ ସହିତ ଉପସ୍ଥିତ ଥିଲେ। ଏହି କାରଣରୁ ଟ୍ରେନ ପ୍ରାୟ ଅଧ ଘଣ୍ଟା ଅଟକି ରହିଲା। କଷ୍ଟସାଧ୍ୟ ସମୟରେ ସେମାନଙ୍କ ସହଯୋଗ ପାଇଁ ସ୍ବାମୀ ରେଳ ପ୍ରଶାସନକୁ ଧନ୍ୟବାଦ ଦେଇଥିଲେ।
