ଫୁଲବାଣୀ ଅଫିସ,୧୬।୧୨: ଜୀବନ ସାରା ଭିକ୍ଷା ମାଗି ଚଳିବା ଏବଂ ସେଥିରୁ ସଞ୍ଚିତ ୧ ଲକ୍ଷ ଟଙ୍କା ଜଗନ୍ନାଥ ମନ୍ଦିରକୁ ଦାନ କରିଛନ୍ତି ଜଣେ ମହିଳା। ଶୁକ୍ରବାର ସେ ଜଗନ୍ନାଥ ମନ୍ଦିର ପରିଚାଳନା କମିଟିକୁ ଉକ୍ତ ଟଙ୍କା ହସ୍ତାନ୍ତର କରିଛନ୍ତି। ଏହି ଟଙ୍କାରେ ପୁରୁଣା ଜଗନ୍ନାଥ ମନ୍ଦିରର ମରାମତି ହେବ। ଟଙ୍କା ପ୍ରଦାନ କରିଥିବା ବୃଦ୍ଧା ମହିଳା ଜଣକ ହେଲେ ତୁଳା ବେହେରା(୭୦)। ୪୦ ବର୍ଷ ହେବ ସେ ଫୁଲବାଣୀ ଜଗନ୍ନାଥ ମନ୍ଦିର, ଶିବ ମନ୍ଦିର ଓ ସାଇ ମନ୍ଦିରରେ ଭିକ ମାଗି ୧ ଲକ୍ଷ ଟଙ୍କା ସଞ୍ଚିତ କରିଥିଲେ ା ଏହି ଘଟଣାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟି ଥିବା ବେଳେ ତୁଳାଙ୍କୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିବାରେ ଲାଗିଛି।
ତୁଳା ଜଣେ ଦିବ୍ୟାଙ୍ଗ ପ୍ରଫୁଲ୍ଲ ବେହେରାଙ୍କୁ ବିବାହ କରିଥିଲେ ା ତାଙ୍କ ସହ ବୁଲି ଭିକ୍ଷା ବୃତ୍ତି କରି ଚଳୁଥିଲେ ା ସ୍ବାମୀଙ୍କ ଦେହାନ୍ତ ପରେ ସେ ଏକାକି ମନ୍ଦିରରେ ଭିକ୍ଷା ମାଗୁଥିଲେ । ବୟସ ଅଧିକ ହେବାରୁ ୧୦ ବର୍ଷ ତଳେ ଉକିଅ ମହାକୁଡ ନାମକ ଜଣେ ବେସାହାରା ମହିଳାଙ୍କୁ ପାଳିତ ଝିଅ କରି ରଖିଛନ୍ତି। ଭିକ୍ଷା ମାଗି ରଖିଥିବା ଟଙ୍କା ପ୍ରଭୁ ଜଗନ୍ନାଥଙ୍କ ସେବାରେ ଲାଗୁ ବୋଲି ତୁଳା କହିଛନ୍ତି। ମନ୍ଦିର ପରିଚାଳନା କମିଟି ସଭାପତି ସୁନାଶିର ମହାପାତ୍ରଙ୍କ ସମେତ ଅନ୍ୟ କର୍ମକର୍ତ୍ତାଙ୍କ ଉପସ୍ଥିତିରେ ସେ ଲକ୍ଷେ ଟଙ୍କା ଦାନ କରିଛନ୍ତି। ତୁଳାଙ୍କ ଇଚ୍ଛା ଅନୁସାରେ ପୁରୁଣା ଜଗନ୍ନାଥ ମନ୍ଦିରର ପୁନରୁଦ୍ଧାର କାର୍ଯ୍ୟ କରାଯିବା ସହ ସାଧୁ ସନ୍ଥଙ୍କ ପାଇଁ ଏକ ଆଶ୍ରୟସ୍ଥଳୀ କରାଯିବ ବୋଲି ମନ୍ଦିର ସଭାପତି କହିଛନ୍ତି। ଏହି ଅବସରରେ ମନ୍ଦିର ପରିଚାଳନା କମିଟି ସମ୍ପାଦକ ହରିଶ୍ଚନ୍ଦ୍ର ମହାରଣା, ରଜତ ମହାନ୍ତି, ବିଜୟ ମହାନ୍ତି, ଶରତ ଚନ୍ଦ୍ର ସାହୁ, ଚନ୍ଦ୍ରଶେଖର ପରିଡା ପ୍ରମୁଖ ଉପସ୍ଥିତ ଥିଲେ।
