ନୂଆଦିଲ୍ଲୀ,୨୦।୧୦: ପ୍ରୟାଗରାଜ୍ର ମଲଖନପୁର ଗାଁରେ ଜଣେ ମହିଳା ନିଜ ଦିଅରଙ୍କ ଗୁପ୍ତାଙ୍ଗ କାଟିଦେଇଛନ୍ତି। ଏହି ଘଟଣା ପୋଲିସ ଓ ଗ୍ରାମବାସୀଙ୍କୁ ଆଶ୍ଚର୍ଯ୍ୟ କରିଦେଇଛି। ୧୬ ଅକ୍ଟୋବର ରାତିରେ ୨୦ ବର୍ଷୀୟ ଉମେଶ୍ (ରାମ ଆସରେଙ୍କ ପୁଅ) ନିଜ ରୁମରେ ରକ୍ତାକ୍ତ ହୋଇ ଚିତ୍କାର କରୁଥିବା ବେଳେ ପରିବାର ଲୋକେ ଦେଖିଥିଲେ। ତାଙ୍କର ଗୁପ୍ତାଙ୍ଗ କାଟି ଦିଆଯାଇଥିଲା ଏବଂ ବହୁ ଛୁରୀ ଆଘାତ କରାଯାଇଥିଲା। ପରିବାର ଲୋକେ ତାଙ୍କୁ ଡାକ୍ତରଖାନାକୁ ନେଇ ପୋଲିସରେ ଅଜଣା ଆକ୍ରମଣକାରୀ ବିରୋଧରେ ଅଭିଯୋଗ କରିଥିଲେ।
ତେବେ ତଦନ୍ତରେ ଜଣାପଡ଼ିଛି ଯେ ଉମେଶ୍ଙ୍କ ବଡ଼ ଭାଇ ଉଦୟଙ୍କ ସ୍ତ୍ରୀ ମଞ୍ଜୁଙ୍କ ସାନ ଭଉଣୀ ସହ ଉମେଶ୍ଙ୍କର ପ୍ରେମ ସମ୍ପର୍କ ଥିଲା। ଦୁହେଁ ବିବାହ କରିବାକୁ ପ୍ରତିଜ୍ଞା କରିଥିଲେ। କିନ୍ତୁ ପରିବାର ବିରୋଧ କରିଥିଲା। ଉମେଶ୍ ସମ୍ପର୍କ ଛାଡ଼ି ଅନ୍ୟ ଝିଅକୁ ପସନ୍ଦ କରିଥିଲେ। ଏହାରେ ମଞ୍ଜୁଙ୍କ ସାନ ଭଉଣୀ ଡିପ୍ରେସନ୍ରେ ଚାଲିଯାଇଥିଲେ। ଭଉଣୀର ଦୁଃଖ ଦେଖି ମଞ୍ଜୁ ଉମେଶ୍ ପ୍ରତି ରାଗିଯାଇଥିଲେ ଏବଂ ପ୍ରତିଶୋଧ ନେବାକୁ ଯୋଜନା କରିଥିଲେ।
ଏହାପରେ ରାତିଅଧରେ ଘରଲୋକେ ଶୋଇଥିବା ବେଳେ ମଞ୍ଜୁ ରୋଷେଇ ଘରୁ ଛୁରୀ ନେଇ ଉମେଶ୍ଙ୍କ କୋଠରିକୁ ଛୁରା ମାଡ଼ କରି ଗୁପ୍ତାଙ୍ଗ କାଟିଦେଇଥିଲେ। ଉମେଶ୍ଙ୍କ ଚିତ୍କାର ଶୁଣି ପରିବାର ଲୋକେ ଆସିବା ପୂର୍ବରୁ ମଞ୍ଜୁ ଫେରାର ହୋଇଯାଇଥିଲେ।
ପୋଲିସ୍ ତଦନ୍ତରେ ମଞ୍ଜୁଙ୍କ ଉପରେ ସନ୍ଦେହ ହୋଇଥିଲା। ପଚରାଉଚରାରେ ତାଙ୍କ ବୟାନରେ ଅସଙ୍ଗତି ଧରାପଡ଼ିଥିଲା। ଏସିପି ବିବେକ କୁମାର ଯାଦବ କହିଛନ୍ତି, “ଭାଉଜ ନିଜେ ଏହି ଆକ୍ରମଣ କରିଛନ୍ତି। ଦିଅର ତାଙ୍କ ସାନ ଭଉଣୀକୁ ଛାଡ଼ିଦେବାରେ ରାଗିଯାଇଥିଲେ।” ମଞ୍ଜୁ ଫେରାର ଅଛନ୍ତି, ପୋଲିସ ଏବେ ତାଙ୍କୁ ଖୋଜୁଛି।
ଡାକ୍ତରଖାନାରେ ଉମେଶ୍ଙ୍କର ଦେଢ଼ ଘଣ୍ଟାରୁ ଅଧିକ ଅପରେସନ୍ ହୋଇଛି। ଡାକ୍ତର କହିଛନ୍ତି, ତାଙ୍କ ଅବସ୍ଥା ସ୍ଥିର, କିନ୍ତୁ ପୁରା ଆରୋଗ୍ୟ ପାଇଁ ୭-୮ ମାସ ଲାଗିପାରେ।
