କଟକ ଅଫିସ,୧୭ା୧:ପାରିବାରିକ କଳହକୁ କେନ୍ଦ୍ର କରି ୨ ବର୍ଷର ଶିଶୁପୁତ୍ରକୁ ସାବତ ମା’ ହତ୍ୟା କରିବା ପରେ ନିଜେ ଆତ୍ମହତ୍ୟା କରିଛନ୍ତି। ଏଭଳି ଏକ ଅଭାବନୀୟ ଘଟଣା ଘଟିଛି କଟକ ମଧୁପାଟଣା ଥାନା ଅନ୍ତର୍ଗତ ଶ୍ରୀରାମ ନଗର ଅଞ୍ଚଳରେ। ଭଡ଼ାଘରେ ଶିଶୁପୁତ୍ର ସହ ରହୁଥିବା ସାବତ ମା’ ଜଣକ କାହିଁକି ଏପରି ଚରମ ନିଷ୍ପତ୍ତି ନେଲେ ତାକୁ ନେଇ ପୋଲିସ ତନାଘନା ଚଳାଇଛି। ମୃତା ମହିଳା ହେଲେ ଶିଳ୍ପୀ ଖୁଣ୍ଟିଆ (୩୧)। ପୋଲିସ ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ଜବତ କରି ଏସ୍ସିବି ମେଡିକାଲରେ ବ୍ୟବଚ୍ଛେଦ କରାଇଛି। ସାଇଣ୍ଟିଫିକ ଟିମ୍ ଘଟଣାସ୍ଥଳରେ ତଦନ୍ତ କରି ବ୍ଲେଡ୍, ରକ୍ତଭିଜା ଲୁଗା ସମେତ ଅନ୍ୟାନ୍ୟ ସାମଗ୍ରୀ ଜବତ କରିଛି। ମୃତା ମହିଳା ଜଣକ ଶିଶୁପୁତ୍ରର ବେକକୁ ବ୍ଲେଡ୍ରେ କାଟି ହତ୍ୟା କରିବା ପରେ ନିଜେ ଫ୍ୟାନ୍ରେ ଝୁଲି ଆତ୍ମହତ୍ୟା କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ମଧୁପାଟଣା ଥାନାରେ ମୃତାଙ୍କ ବାପଘର ଓ ଶାଶୁଘର ଲୋକଙ୍କ ଅଭିଯୋଗକ୍ରମେ ୨ଟି ପୃଥକ୍ ମାମଲା ରୁଜୁ ହୋଇଥିବାବେଳେ ସ୍ବାମୀ ସନ୍ତୋଷ ଖୁଣ୍ଟିଆଙ୍କୁ ଥାନାରେ ଅଟକ ରଖି ପଚରାଉଚୁରା କରାଯାଉଥିବା ଆଇଆଇସି ତୁଷାରକାନ୍ତ ସେଠୀ କହିଛନ୍ତି। ପ୍ରକାଶ ଯେ, ଶ୍ରୀରାମନଗରରେ ଏକ ଭଡ଼ାଘରେ ଶିଳ୍ପୀ ଓ ତାଙ୍କ ୨ବର୍ଷର ସାବତ ପୁଅ ରହୁଥିଲେ। ସୋମବାର ସକାଳେ ଘରର କବାଟ ନ ଖୋଲିବାରୁ କୌଣସି ଅଘଟଣର ଆଶଙ୍କା କରି ପଡ଼ୋଶୀ ମଧୁପାଟଣା ପୋଲିସକୁ ଖବର ଦେଇଥିଲେ। ପୋଲିସ ଏବଂ ଶିଳ୍ପୀଙ୍କ ପରିବାର ଲୋକେ ସେଠାରେ ପହଞ୍ଚତ୍ଥିଲେ। ସମସ୍ତଙ୍କ ଉପସ୍ଥିତିରେ ପୋଲିସ ପହଞ୍ଚତ୍ କବାଟ ଭାଙ୍ଗି ଭିତରକୁ ପଶିଥିଲା। ଘର ଭିତରେ ଫ୍ୟାନ୍ରେ ଶିଳ୍ପୀ ଝୁଲୁଥିବାବେଳେ ନିକଟରେ ଶିଶୁପୁତ୍ରର ରକ୍ତାକ୍ତ ମୃତଦେହ ପଡ଼ିରହିଥିଲା। ଶିଶୁ ପୁତ୍ରର ତଣ୍ଟି କଟାଯାଇଥିବା ଦେଖିବାକୁ ମିଳିଥିଲା। ଡିସିପି ପିନାକ ମିଶ୍ର, ଏସିପି ଅନୀଲ ମିଶ୍ର ଘଟଣାସ୍ଥଳରେ ପହଞ୍ଚତ୍ ପରିସ୍ଥିତି ଅନୁଧ୍ୟାନ କରିଥିଲେ। ସାଇଣ୍ଟିଫିକ୍ ଟିମ୍ ଭଡ଼ା ଘରେ ବିଭିନ୍ନ ସାମଗ୍ରୀକୁ ତର୍ଜମା କରି ପରୀକ୍ଷଣ ନିମନ୍ତେ ଜବତ କରିଥିଲା। ପୋଲିସ ଏବଂ ସାଇଣ୍ଟିଫିକ୍ ଟିମ୍ର ତଦନ୍ତ ଚାଲିଥିବାବେଳେ ବାହାରେ ସ୍ଥାନୀୟ ଲୋକଙ୍କ ସମେତ ମୃତକଙ୍କ ଶାଶୁଘର ଓ ବାପଘର ଲୋକଙ୍କ ମଧ୍ୟରେ ଆରୋପ, ପ୍ରତ୍ୟାରୋପ ସହ ଭିଡ଼ାଭିଡ଼ି ଭଳି ପରିସ୍ଥିତି ସୃଷ୍ଟି ହୋଇଥିଲା।
ସୂଚନାନୁସାରେ, ମୃତା ଶିଳ୍ପୀଙ୍କ ଘର କଟକ ନେତାଜୀନଗରରେ। ସେ କଟକ ଜିଲା ସାଲେପୁର ଥାନା ଅନ୍ତର୍ଗତ ମୁର୍କୁଣ୍ଡି ଗ୍ରାମର ସନ୍ତୋଷ ଖୁଣ୍ଟିଆଙ୍କ ଦ୍ୱିତୀୟ ସ୍ତ୍ରୀ। ସନ୍ତୋଷଙ୍କ ପ୍ରଥମ ସ୍ତ୍ରୀ ପୁତ୍ର ଜନ୍ମ ଦେଇ ମେଡିକାଲ ବେଡ୍ରେ ମୃତ୍ୟୁବରଣ କରିଥିଲେ। ମା’ ଛେଉଣ୍ଡ ଶିଶୁପୁତ୍ରକୁ ମାମୁ ଘରଲୋକ ନେଇ ଲାଳନପାଳନ କରୁଥିଲେ। ସନ୍ତୋଷଙ୍କ କହିବାନୁସାରେ, ପୁଅର ଲାଳନପାଳନ ପାଇଁ ସେ ଦ୍ୱିତୀୟ ବିବାହ କରିବାକୁ ଇଚ୍ଛା କରିଥିଲେ। ଶିଳ୍ପୀ ମଧ୍ୟ ପୂର୍ବରୁ ବିବାହ କରି ପ୍ରଥମ ସ୍ବାମୀଙ୍କୁ ଛାଡ଼ପତ୍ର ଦେଇଥିଲେ। ସନ୍ତୋଷଙ୍କ ସୋସିଆଲ ମିଡିଆରେ ଶିଳ୍ପୀଙ୍କ ସହ ପରିଚୟ ହେବା ପରେ ଉଭୟେ ପରସ୍ପର ବାବଦରେ ସବୁ ଜାଣି ବିବାହ କରିବାକୁ ରାଜି ହୋଇଥିଲେ। ୨୦୨୧ ନଭେମ୍ବର ୨୬ରେ ଉଭୟଙ୍କ ବିବାହ ହୋଇଥିଲା। ବିବାହ ପରେ ସେମାନେ ବହୁତ ଖୁସିରେ ଥିଲେ। ସାବତ ମା’ ହେଲେ ବି ଶିଳ୍ପୀ ପୁଅକୁ ବହୁତ ଭଲ ପାଉଥିଲେ। ହେଲେ ଶାଶୁଘରକୁ ଯିବା କଥା କହିଲେ ସେ ଅମଙ୍ଗ ହେଉଥିଲେ। ସମୟ କ୍ରମେ ଏହାକୁ ନେଇ ଉଭୟଙ୍କ ମଧ୍ୟରେ ମନାନ୍ତର ଘଟି ଥାନା ପର୍ଯ୍ୟନ୍ତ ମାମଲା ଯାଇ ଫଏସଲା ବି ହୋଇଛି। ହେଲେ ସେ କୌଣସି ପ୍ରକାରେ ସାଲେପୁର ଯିବାକୁ ଚାହୁଁ ନ ଥିଲେ। ସବୁ କଥାରେ ତାଙ୍କ ବାପଘର ଲୋକେ ଆସି ମୁଣ୍ଡ ପୂରାଉଥିଲେ। ପରସ୍ପର ମଧ୍ୟରେ ମନାନ୍ତର ବଢ଼ିବା ପରେ ପୁଅକୁ ଶିଳ୍ପୀ ମାରିଦେବାକୁ ବିଭିନ୍ନ ସମୟରେ ଧମକ୍ ଦେଉଥିଲେ ବୋଲି ସନ୍ତୋଷ ଅଭିଯୋଗ ଉଠାଇଛନ୍ତି। ଅପରପକ୍ଷରେ ମୃତା ଶିଳ୍ପୀଙ୍କ ମା’ କବିତା ଦାସ ଓ ବାପା ଜ୍ଞାନେନ୍ଦ୍ର ଦାସ ଅଭିଯୋଗ ଆଣିଛନ୍ତି ଯେ, ତାଙ୍କ ଝିଅକୁ ଶାଶୁଘର ଲୋକେ ବିଭିନ୍ନ ସମୟରେ ମାନସିକ ନିର୍ଯାତନା ଦେଉଥିଲେ। ଖରାପ ଭାଷାରେ ଗାଳି ଗୁଲଜ କରୁଥିଲେ, ଯାହାକୁ ସେ ସହିପାରୁ ନ ଥିଲା। ଶିଶୁପୁତ୍ରଟିକୁ ଶାଶୂଘର ଲୋକ ତା’ଠାରୁ ନେଇଯିବାକୁ ଚାହୁଁଥିବାରୁ ସେ ସେଥିରେ ରାଜିନଥିଲା। ସେ ସବୁବେଳେ କହୁଥିଲା ମୁଁ ଯୋଉଠି ରହିବି, ମୋ ପୁଅ ସେଇଠି ରହିବ। ଶେଷରେ ସେ ଏଭଳି ନିଷ୍ପତ୍ତି ନେଲା ବୋଲି କବିତା କହିଛନ୍ତି। ଡିସିପି ପିନାକ ମିଶ୍ର କହିଛନ୍ତି, ଉଭୟ ପରିବାର ମଧ୍ୟରେ ତିକ୍ତତା ଥିଲା। ଘଟଣାକୁ ଭଲ ଭାବେ ଅନୁଧ୍ୟାନ କରାଯାଉଛି। ଏବେ ଶବ ବ୍ୟବଚ୍ଛେଦ କରାଯାଇଛି। ରିପୋର୍ଟ ଆସିବା ପରେ ପୂର୍ଣ୍ଣାଙ୍ଗ ତଦନ୍ତ କାର୍ଯ୍ୟ କରାଯିବ।
ଭୁବନେଶ୍ୱରରେ ଚାକିରି କରିଥିଲେ
ଶାଶୁଘର ସାଲେପୁର ଯିବେ ନାହିଁ। କଟକରେ ରହିବେ ଆଉ ଚାକିରି କରିବେ, ଏଭଳି ନିଷ୍ପତ୍ତି ନେଇଥିଲେ ଶିଳ୍ପୀ। ଗତ କିଛି ଦିନ ହେବ ସେ ଭୁବନେଶ୍ୱରରେ ଏକ ଘରୋଇ ଚାକିରି କରିଥିଲେ। କଟକରୁ ବାଇକ୍ କିମ୍ବା ବସ୍ରେ ସେଠାକୁ ଯା’ଆସ କରୁଥିଲେ ବୋଲି ପରିବାର ଲୋକେ କହିଛନ୍ତି।
ଫେସ୍ବୁକ୍ରେ ଶେଷ ପୋଷ୍ଟ ‘କୁଇଟ୍’
ଶିଳ୍ପୀଙ୍କ ମୋବାଇଲ୍ରେ ସୋସିଆଲ ମିଡିଆ ଆକାଉଣ୍ଟ ଯାଞ୍ଚ ପରେ କେତେକ ତଥ୍ୟ ମିଳିଛି। ସେ ତାଙ୍କର ଫେସ୍ବୁକ୍ରେ ଶେଷ ପୋଷ୍ଟ କରିଥିଲେ ଯାହାକି ଇଂଲିଶ୍ରେ କୁଇଟ୍(କ୍ୟୁୟୁଆଇଟି) ବୋଲି ଲେଖାଥିଲା। ୟା ମାଧ୍ୟମରେ ସେ ସମସ୍ତଙ୍କୁ ନିଜ ଜୀବନର ଅନ୍ତିମ ସମୟ ବାବଦରେ ସୂଚନା ଦେବାର ପ୍ରୟାସ କରିଛନ୍ତି।
ସନ୍ଦେହରେ ପୋଲିସ ଏଏସ୍ଆଇ
ଶ୍ରୀରାମନଗର ମଧୁପାଟଣା ଥାନା ଅଧୀନରେ ଯାଉଥିବାବେଳେ ଘଟଣା ପରେ କ୍ୟାଣ୍ଟନମେଣ୍ଟ ଥାନାର ଏଏସ୍ଆଇ ଅଜୟ ବେହେରାଙ୍କ ଉପସ୍ଥିତିକୁ ନେଇ ଶିଳ୍ପୀଙ୍କ ବାପଘର ଲୋକେ ବିରୋଧ କରିଥିଲେ। ଏପରି କି ସେଠାରେ କିଛି ସମୟ ପାଇଁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଅଜୟ ଏଠାକୁ କାହିଁକି ଆସିଛନ୍ତି ବୋଲି ପଚାରିବା ସହ ଝିଅ ମୃତ୍ୟୁ ପାଇଁ ସେ ଦାୟୀ ବୋଲି ପରିବାର ଲୋକେ ଅଭିଯୋଗ କରିଥିଲେ। ଏହି ଅଭିଯୋଗ ଉପରେ ତଦନ୍ତ କରାଯିବ ବୋଲି ଡିସିପି ପିନାକ ମିଶ୍ର କହିଛନ୍ତି।
ସ୍ବର୍ଗଦ୍ୱାରରେ ଶେଷକୃତ୍ୟ
ଏସ୍ସିବି ମେଡିକାଲରେ ଶବ ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ଶବ ହସ୍ତାନ୍ତର କରିଛି। ମୃତା ମହିଳାଙ୍କ ବାପଘର ଲୋକେ ପୁରୀ ସ୍ବର୍ଗଦ୍ୱାରରେ ଶେଷକୃତ୍ୟ ସମ୍ପନ୍ନ କରିଥିବା ପରିବାର ପକ୍ଷରୁ ଜଣାଯାଇଛି।
