ପାଟଣା,୧୪ା୧୧(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଅବକାରୀ ଥାନା ଅଞ୍ଚଳରେ ମହୁଲି ମଦ ତିଆରି ଏକ ପ୍ରକାର କୁଟୀର ଶିଳ୍ପରେ ପରିଣତ ହୋଇଛି। ପାଟଣା ଓ ସାହାରପଡ଼ା ବ୍ଲକ୍ର ବିଭିନ୍ନ ଗ୍ରାମରେ ଥିବା ନଦୀ କୂଳ, ପୋଖରୀ ହୁଡ଼ା ଓ ଜଙ୍ଗଲ ମଧ୍ୟରେ ଅବାଧରେ ମହୁଲି ମଦ ପ୍ରସ୍ତୁତ କରାଯାଉଛି। ଏହାକୁ ମାଫିଆମାନେ ବାଇକ୍, ଅଟୋ ଯୋଗେ ନିକଟସ୍ଥ ଗ୍ରାମକୁ ଚାଲାଣ କରୁଛନ୍ତି। ମଦ୍ୟପାନ ଯୋଗୁ ପାରିବାରିକ ଅଶାନ୍ତି ସହ ସଡ଼କ ଦୁର୍ଘଟଣା ବୃଦ୍ଧି ପାଉଛି। ଉଭୟ ଅବକାରୀ ଓ ପୋଲିସ ବିଭାଗ ଅବଗତ ଥିଲେ ବି ଢିଲା କାର୍ଯ୍ୟାନୁଷ୍ଠାନ ଯୋଗୁ ଅଞ୍ଚଳରେ ଚୋରାମଦ କାରବାର ବୃଦ୍ଧି ପାଉଛି।
ବ୍ଲକ୍ର ହୀରାପଶି, ବାଇଦିବଜା, ରୁଢ଼ିଆପଡ଼ା, ପୁରୁଣା ପାଣି, ନୂଆଗାଁ, ଜାମୁପଶି, ଗୁଠୁଭୂଇଁ, ସାହାରପଡ଼ା ବ୍ଲକ୍ର ଚୁନୁ ସାହି, ରାଧାପୁର, କଣ୍ଢେଇପଡ଼ା, ଭାଳିଆଡ଼ିହା, ହରିହରପୁର, ଦାମାହୁଦା, ବାଲିପଶି, ବଡ଼ପଡ଼ା ଆଦି ଗ୍ରାମରେ ବହୁଳ ଭାବେ ଦେଶୀ ମଦ (ମହୁଲି) ରନ୍ଧା ଯାଉଛି। ମଦ ମାଫିଆମାନେ ଏହାକୁ ନିକଟସ୍ଥ ଗ୍ରାମଗୁଡ଼ିକୁ ଚାଲାଣ କରୁଛନ୍ତି। ଦୀର୍ଘଦିନରୁ ଏ ଅଞ୍ଚଳରେ ବେଆଇନ ମଦ କାରବାର ଚାଲିଥିବା ବେଳେ ଅବକାରୀ ବିଭାଗ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି। ମଦ ମାଫିଆ ଓ କିଛି ବିଭାଗୀୟ ଅଧିକାରୀଙ୍କ ମଧ୍ୟରେ ସଲାସୁତରା ଯୋଗୁ ଚଢ଼ାଉ ପୂର୍ବରୁ ମାଫିଆମାନେ ଘଟଣାସ୍ଥଳ ଛାଡ଼ି ଚାଲିଯାଉଛନ୍ତି। କର୍ମଚାରୀମାନେ କେବଳ ସରଞ୍ଜାମ ଜବତ କରି ମଦ ପାଇଁ ପ୍ରସ୍ତୁତ ହୋଇଥିବା ପୋଚକୁ ନଷ୍ଟ କରି ଫେରୁଛନ୍ତି। ଉଭୟ ବ୍ଲକ୍ରେ ବିଷାକ୍ତ ମଦ ପିଇ ଲୋକେ ରୋଗଗ୍ରସ୍ତ ହେବା ସହ ପାରିବାରିକ ଅଶାନ୍ତି ବୃଦ୍ଧି ପାଉଛି। ମଦ୍ୟପାନ କରି ଗାଡ଼ି ଚାଳନା ଯୋଗୁ ଦୁର୍ଘଟଣା ଘଟୁଥିବା ନଜିର ମଧ୍ୟ ରହିଛି। ଏନେଇ ଜିଲା ଅବକାରୀ ଅଧୀକ୍ଷକ ନାରାୟଶ ମେହେରଙ୍କୁ ପଚାରିବାରେ କହିଥିଲେ ଯେ, ବିଭାଗ ପକ୍ଷରୁ ବିଭିନ୍ନ ସମୟରେ ଚୋରାମଦ କାରବାର ଉପରେ ଚଢ଼ାଉ ହେଉଛି। ଆଗକୁ ଏହା ବ୍ୟାପକ କରାଯାଇ ମଦ ମାଫିଆଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
