ନୂଆଦିଲ୍ଲୀ,୧୮।୭: ମହାରାଷ୍ଟ୍ର ଲୋକ ସଭା ନିର୍ବାଚନରେ ଏନଡିଏର ଖରାପ ପ୍ରଦର୍ଶନ ପରେ ରାଜ୍ୟ ରାଜନୀତି ସରଗରମ ହୋଇଛି। ଏହି ପରାଜୟ ପାଇଁ ଏନଡିଏର ତିନି ପ୍ରମୁଖ ଦଳର ନେତା ପରସ୍ପରକୁ ଦୋଷ ଲଦୁଛନ୍ତି। ବର୍ତ୍ତମାନ ଏହି ଆରେପ-ପ୍ରତ୍ୟାରୋପ ଭିତରେ ଆରଏସଏସ ମଧ୍ୟ ବଡ଼ ବୟାନ ଦେଇଛି । ଆରଏସଏସ ଦିନକ ପୂର୍ବରୁ ଏକ ଆର୍ଟିକିଲରେ
ଅଜିତ ପାଓ୍ବାରଙ୍କୁ ନେଇ ବଡ଼ ବୟାନ ଦେଇଛି। ଅଜିତଙ୍କ ସହ ଭାଜପା ମେଣ୍ଟ ଭାଙ୍ଗିଦେବା ଉଚିତ ବୋଲି ସଂଘ ବଡ଼ ବୟାନ ଦେଇଛି।
ଆରଏସଏସର ଏହି ବୟାନ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ପାଲଟିଛି। ଆରଏସଏସର ଏହି ଲେଖା ସଂଘର ସାପ୍ତାହିକ ପତ୍ରିକାରେ ପ୍ରକାଶ ପାଇଛି। ଏଥିରେ କୁହାଯାଇଛି ଯେ, ୨୦୨୩ରେ ଏନସିପି ସହ ମେଣ୍ଟ ହେବା ପରେ ଭାଜପା ବିରୋଧରେ ଜନବିରୋଧୀ ଭାବନା ଦ୍ରୁତ ଗତିରେ ବୃଦ୍ଧି ପାଇଛି। ଫଳସ୍ବରୂପ ମହାରାଷ୍ଟ୍ରର ଚଳିତ ଲୋକ ସଭା ନିର୍ବାଚନରେ ଭାଜପା ଖରାପ ପ୍ରଦର୍ଶନ କରିଛି।
ଏହାକୁ ନେଇ ଅଜିତ ପାଓ୍ବାରଙ୍କ ମଧ୍ୟ ପ୍ରତିକ୍ରିୟା ସାମ୍ନାକୁ ଆସିଛି। ରାଜ୍ୟର ଉପମୁଖ୍ୟମନ୍ତ୍ରୀ ଅଜିତ ପାୱାର ଏବଂ ଦେବେନ୍ଦ୍ର ଫଡନାଭିସ ଗଡଚିରୋଲି ଜିଲା ଗସ୍ତରେ ଥିଲେ। କାର୍ଯ୍ୟକ୍ରମ ପରେ ଗଣମାଧ୍ୟମ ସହ ବାର୍ତ୍ତାଳାପ ସମୟରେ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କୁ ସଂଘର ସାପ୍ତାହିକ ବିବେକରେ ପ୍ରବନ୍ଧ ସମ୍ପର୍କରେ ପ୍ରଶ୍ନ କରାଯାଇଥିଲା। ଉତ୍ତରରେ ଅଜିତ କହିଛନ୍ତି, ଯିଏ ଯାହା ବି ଲେଖୁ ନା କାହିଁକି, ମୁଁ ଏ ସମ୍ପର୍କରେ କଥାବର୍ତ୍ତା କରିବାକୁ ବାଧ୍ୟ ନୁହେଁ। ରାଜ୍ୟର ବିକାଶ ପାଇଁ ଆମେ ମହାମେଣ୍ଟ କରିଛୁ।
ଅନ୍ୟପକ୍ଷରେ ଶରଦ ପାଓ୍ବାର ପୁଣି ଥରେ ଅଜିତ ପାୱାରଙ୍କୁ ଏକ ବଡ଼ ଝଟକା ଦେଇଛନ୍ତି। ସୂଚନାନୁସାରେ, ଅଜିତ ଦଳର ୨୮ବଡ ନେତା ଶରଦ ପାୱାରଙ୍କ ଦଳରେ ଯୋଗ ଦେଇଛନ୍ତି। ଲୋକ ସଭା ନିର୍ବାଚନରେ କେବଳ ଅଜିତ ପାୱାରଙ୍କ ଦଳର ପ୍ରାର୍ଥୀ ଜିତିଥିଲେ। କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମନ୍ତ୍ରୀ ପରିଷଦରେ ସେମାନଙ୍କୁ କୌଣସି ସ୍ଥାନ ମିଳି ନ ଥିଲା। ସେତେବେଳେ ଏନସିପିଙ୍କ ଅଜିତ ଗୋଷ୍ଠୀ କହିଥିଲେ ଯେ, ଦଳକୁ ରାଷ୍ଟ୍ରମନ୍ତ୍ରୀ ପାଇଁ ଅଫର ମିଳିଥିଲା କିନ୍ତୁ କ୍ୟାବିନେଟ ମନ୍ତ୍ରୀ ପାଇଁ ଦାବି କରାଯାଇଥିଲା। ଏଭଳି ପରିସ୍ଥିତିରେ ଦଳ କ୍ୟାବିନେଟର ସମ୍ପ୍ରସାରଣକୁ ଅପେକ୍ଷା କରିବାକୁ ନିଷ୍ପତ୍ତି ନେଇଛି।
