ନୂଆଦିଲ୍ଲୀ,୧୮ା୭: ଭାରତୀୟମାନେ ଏବେ ଆକାଶ ମାର୍ଗରେ ଯାତାୟାତ କରିବା ପାଇଁ ଅଧିକ ଆଗ୍ରହ ପ୍ରକାଶ କରୁଥିବା ଜଣା ପଡିଛି। ସିଭିଲ ଆଭିଏସନ ଡାଇରେକ୍ଟୋରେଟ ଜେନେରାଲ (ଡିଜିସିଏ) ରିପୋର୍ଟ ଅନୁଯାୟୀ ଚଳିତ ବର୍ଷ ପ୍ରଥମ ଭାଗରେ ଭାରତୀୟ ବିମାନ ଶିଳ୍ପରେ ଯାତ୍ରୀଙ୍କ ସଂଖ୍ୟା ବୃଦ୍ଧି ପାଇଛି। ୨୦୨୪ ଜାନୁୟାରୀରୁ ଜୁନ୍ ମଧ୍ୟରେ ୭୯.୩ ନିୟୁତ ଯାତ୍ରୀ ଯାତ୍ରା କରିଛନ୍ତି, ଯାହାକି ଏକ ବର୍ଷ ପୂର୍ବରୁ ସେହି ସମୟ ମଧ୍ୟରେ ୭୬ ନିୟୁତ ଥିଲା।
ରିପୋର୍ଟରୁ ଏହା ଜଣାପଡ଼ିଛ ଯେ, କରୋନା ମହାମାରୀ ପରେ ଭାରତୀୟ ବିମାନ ଶିଳ୍ପ ଏହାର ଶିଖର ଛୁଇଁଛି। ମହାମାରୀ ପୂର୍ବରୁ ଅଭିବୃଦ୍ଧି ହାର ୫.୭୭ ପ୍ରତିଶତ ଥିବା ବେଳେ ୨୦୨୪ରେ ଏହା ୧୨.୩ ପ୍ରତିଶତ ଅଧିକ ରହିଛି।
କରୋନା ପରେ ଖୁବଶୀଘ୍ର ସାଧାରଣ ସ୍ଥିତିକୁ ଫେରିଥିବା ଦେଶ ଗୁଡ଼ିକ ମଧ୍ୟରେ ଭାରତ ରହିଥିବା ବେଳେ ତୁରନ୍ତ ବିମାନ ଶିଳ୍ପରେ ପରିବର୍ତନ ଦେଖା ଯାଇଥିଲା। ତେବେ ନିକଟରେ ବିମାନ ଶିଳ୍ପରେ ଦେଖା ଦେଇଥିବା ସମସ୍ୟା ସତ୍ୱେ ଭାରତୀୟ ବିମାନ ଶିଳ୍ପ ଗତ କିଛି ବର୍ଷ ମଧ୍ୟରେ ଆଖି ଦୃଶିଆ ଅଭିବୃଦ୍ଧି ପରିଲକ୍ଷିତ ହୋଇଛି।
ତେବେ ମେ’ ମାସ ତୁଳନାରେ ଜୁନ ମାସରେ ବିମାନ ଯାତ୍ରୀଙ୍କ ସଂଖ୍ୟା ହ୍ରାସ ପାଇଥିଲା। ତେବେ ଗତ ବର୍ଷ ସହିତ ତୁଳନା କଲେ ଚଳିତ ବର୍ଷ ଜୁନ ମାସରେ ଘରୋଇ କ୍ଷେତ୍ରରେ ୧୩.୬ ହାରରେ ଯାତ୍ରୀଙ୍କ ସଂଖ୍ୟା ବୃଦ୍ଧି ପାଇଛି। ଗତ ବର୍ଷ ଜୁନ ମାସରେ ଯାତ୍ରୀଙ୍କ ସଂଖ୍ୟା ୧୨.୪ ମିଲିୟନ ଥିଲା।
ଭାରତୀୟ ବିମାନ ଶିଳ୍ପରେ ବିମାନର ଅଭାବ ଏକ ବଡ଼ ସମସ୍ୟାରେ ପରିଣତ ହୋଇଛି। ଇଣ୍ଡିଗୋ ୩୫୦ ନୂତନ ବିମାନ ପାଇଁ ଅର୍ଡର ଦେଇଥିବା ବେଳେ କମ୍ପାନୀର ୭୦-୮୦ ବିମାନ ଇଞ୍ଜିନ ତ୍ରୁଟି ପାଇଁ ଏବେ ଚାଲିବ ବନ୍ଦ ରହିଛି। ବିମାନ ଅଭାବ ଏବଂ ବର୍ଦ୍ଧିତ ଚାହିଦା କାରଣରୁ ଯାତ୍ରୀଙ୍କ ଭଡା ବୃଦ୍ଧି ପାଉଛି।
