ନୂଆଦିଲ୍ଲୀ,୨୦ା୯: ନୂଆ ମହିଳା ସଂରକ୍ଷଣ ବିଲ୍ ଭାରତୀୟ ଗଣତନ୍ତ୍ରକୁ ଆହୁରି ସୁଦୃଢ଼ କରିବ ବୋଲି ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରକାଶ କରିଛନ୍ତି। ନୂତନ ସଂସଦ ଭବନରେ ପ୍ରଥମ ଥର ପାଇଁ ନିଜ ବକ୍ତବ୍ୟ ରଖି ସେ କହିଛନ୍ତି, ନାରୀଶକ୍ତି ବନ୍ଦନ ଅଧିନିୟମ ଲୋକ ସଭା ଓ ରାଜ୍ୟ ବିଧାନସଭାଗୁଡ଼ିକରେ ମହିଳାଙ୍କ ଯୋଗଦାନ ବୃଦ୍ଧି କରିବ। ଏହି ବିଲ୍କୁ ସର୍ବସମ୍ମତିକ୍ରମେ ଗୃହୀତ କରାଇବା ପାଇଁ ସେ ସଂସଦର ଉଭୟ ଗୃହର ସଦସ୍ୟମାନଙ୍କୁ ଅନୁରୋଧ କରିଛନ୍ତି।
ସ୍ବତନ୍ତ୍ର ଅଧିବେଶନର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ଆହୁରି କହିଛନ୍ତି, ସମାଜରେ ପରିବର୍ତ୍ତନ ଆଣିବାରେ ରାଜନୀତିର ଭୂମିକା ଗୁରୁତ୍ୱପୂର୍ଣ୍ଣ। ମହାକାଶରୁ କ୍ରୀଡ଼ା ଏବଂ ଷ୍ଟାର୍ଟ-ଅପ୍ସଠାରୁ ନେଇ ସ୍ବୟଂ ସହାୟକ ଗୋଷ୍ଠୀ ପର୍ଯ୍ୟନ୍ତ ସବୁ କ୍ଷେତ୍ରରେ ଭାରତୀୟ ମହିଳାମାନଙ୍କ ଅବଦାନ ରହିଛି। ନାରୀଶକ୍ତି ବନ୍ଦନ ଅଧିନିୟମ ଗଣତନ୍ତ୍ରକୁ ଆହୁରି ସୁଦୃଢ଼ କରିବ। ଏହି ବିଲ୍କୁ ଆମେ ଆଇନରେ ପରିଣତ କରିବୁ। ଏନେଇ ଦେଶର ସମସ୍ତ ମା’, ଭଉଣୀ ଓ ଝିଅମାନଙ୍କୁ ମୁଁ ଆଶ୍ୱାସନା ଦେଉଛି। ଏଥିପାଇଁ ଏକ ବୃହତ୍ ସମ୍ବିଧାନ ସଂଶୋଧନ ବିଲ୍ ଆଗତ କରାଯାଇଛି, ଯାହାକି ଲୋକ ସଭା ଓ ବିଧାନସଭାଗୁଡ଼ିକରେ ମହିଳାଙ୍କ ଯୋଗଦାନକୁ ବ୍ୟାପକ କରିବ। ଆଜିର ଐତିହାସିକ ଦିବସରେ ମହିଳାଙ୍କ ସୁଯୋଗ ପାଇଁ ଦ୍ୱାର ଖୋଲିଦେବାକୁ ସମସ୍ତ ସଦସ୍ୟଙ୍କୁ ଅନୁରୋଧ। ପ୍ରଧାନମନ୍ତ୍ରୀ ଏପରି ବକ୍ତବ୍ୟ ଦେବାବେଳେ ଉଭୟ ଶାସକ ଓ ବିରୋଧୀ ସଦସ୍ୟମାନେ ଡେସ୍କ ବାଡ଼େଇ ସ୍ବାଗତ କରିଥିଲେ।
ପ୍ରଧାନମନ୍ତ୍ରୀ କହିଥିଲେ, ମହିଳା ସଂରକ୍ଷଣ ଉପରେ ପାର୍ଲାମେଣ୍ଟରେ ପୂର୍ବରୁ ମଧ୍ୟ ଅନେକ ପର୍ଯ୍ୟାୟରେ ବିତର୍କ ହୋଇଥିଲା। ୧୯୯୬ରେ ପ୍ରଥମେ ଏହି ବିଲ୍କୁ ଆଗତ କରାଯାଇଥିଲା। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଅମଳରେ ମହିଳା ସଂରକ୍ଷଣ ବିଲ୍କୁ ଅନେକ ଥର ଆଗତ କରାଯାଇଥିଲେ ମଧ୍ୟ ସଂଖ୍ୟାବଳ ନ ଥିବାରୁ ଏହି ସ୍ବପ୍ନ ପୂରଣ ହୋଇପାରି ନ ଥିଲା। ଏହି ମହାନ୍ କାର୍ଯ୍ୟ ସମ୍ପାଦନ ପାଇଁ ଭଗବାନ ମୋତେ ବାଛିଛନ୍ତି। ଆମ ସରକାର ପୁଣି ଥରେ ଏ ଦିଗରେ ପଦକ୍ଷେପ ନେଉଛନ୍ତି। ଆମ କ୍ୟାବିନେଟ୍ ସୋମବାର ମହିଳା ସଂରକ୍ଷଣ ବିଲ୍କୁ ଅନୁମୋଦନ କରିଛନ୍ତି। ଆଜିର ଦିନ ଇତିହାସରେ ଲିପିବଦ୍ଧ ହେବାକୁ ଯାଉଛି। ଦେଶର ବିକାଶ ଯାତ୍ରାରେ ଏକ ନୂଆ ଅଧ୍ୟାୟ ସୃଷ୍ଟି ହୋଇଛି ବୋଲି ମୋଦି କହିଥିଲେ।
