ନୂଆଦିଲ୍ଲୀ,୨୪।୧୨:ଉପରାଷ୍ଟ୍ରପତି ଜଗଦୀପ ଧନଖରଙ୍କ ମଜା ଉଡାଇ ବିବାଦରେ ଛନ୍ଦି ହୋଇପଡିଥିବା ଟିଏମସି ଏମ୍ପି କଲ୍ୟାଣ ବାନାର୍ଜୀ ପୁଣି ଥରେ ନିଜ ମତ ଦୋହରାଇଛନ୍ତି। ସେ କହିଛନ୍ତି, ଥରେ କି ଦୁଇଥର ନୁହେଁ ବରଂ ହଜାରେ ଥର ଉପରାଷ୍ଟ୍ରପତି ଜଗଦୀପ ଧନଖରଙ୍କ ମଜା ଉଡାଇବି। ଏଥିପାଇଁ ମୋତେ ଜେଲରେ ରଖିପାରିବ। ମୋତେ ମାରି ପାରିବେ, କିନ୍ତୁ ଲଢେଇ ବନ୍ଦ ହେବ ନାହିଁ । କଲ୍ୟାଣ ବାନାର୍ଜୀ ଶ୍ରୀରାମପୁରରେ ଏକ ବୈଠକରେ ଏହା କହିଛନ୍ତି।
କଲ୍ୟାଣ କହିଛନ୍ତି, ଶ୍ରୀରାମପୁରରେ ଅନେକ ଶିକ୍ଷିତ ଲୋକ ଅଛନ୍ତି। ପ୍ରକୃତରେ କଳା ଜାଣିଥିବା ଲୋକ ଥଟ୍ଟା କ’ଣ ଜାଣନ୍ତି। ଏହାକୁ ବୁଝିବାର ବିରୋଧୀ ଦଳର ନେତାଙ୍କର ସାମର୍ଥ୍ୟ ନାହିଁ।
ନିକଟରେ ସଂସଦର ଶୀତକାଳୀନ ଅଧିବେଶନରେ ବିରୋଧୀ ଏମ୍ପିମାନେ ସଂସଦର ସୁରକ୍ଷା କ୍ଷେତ୍ରରେ ଅବହେଳା ପ୍ରସଙ୍ଗରେ ଗୃହରେ ହଙ୍ଗାମା ସୃଷ୍ଟି କରିଥିଲେ। ଏଥିରେ ବିରୋଧୀ ଏମ୍ପିମାନେ ସଂସଦର ଉଭୟ ଗୃହରୁ ନିଲମ୍ବିତ ହୋଇଥିଲେ। ସଂସଦ ଗୃହ କମ୍ପ୍ଲେକ୍ସରେ ବିରୋଧୀ ଦଳର ନେତାମାନେ ଏହାକୁ ବିରୋଧ କରିଥିଲେ। ଏହି ପ୍ରତିବାଦ ସମୟରେ ଟିଏମସି ଏମ୍ପି କଲ୍ୟାଣ ବାନାର୍ଜୀ ଉପରାଷ୍ଟ୍ରପତି ଜଗଦୀପ ଧନଖରଙ୍କୁ ପରିହାସ କରିଥିଲେ ଏବଂ ତାଙ୍କୁ ଅନୁକରଣ କରିଥିଲେ। କଂଗ୍ରେସ ଏମ୍ପି ରାହୁଲ ଗାନ୍ଧୀ କଲ୍ୟାଣ ବାନାର୍ଜୀଙ୍କର ଏକ ଭିଡିଓ କରୁଥିବା ଦେଖିବାକୁ ମିଳିଥିଲା। ରାଜ୍ୟ ସଭା ଅଧ୍ୟକ୍ଷ ଜଗଦୀପ ଧନଖର ଏଥିରେ ଅସନ୍ତୋଷ ବ୍ୟକ୍ତ କରି ଏହାକୁ ବ୍ୟକ୍ତିଗତ ଆକ୍ରମଣ ବୋଲି କହିଛନ୍ତି।
