ଭୁବନେଶ୍ୱର,୭।୮(ରବିନାରାୟଣ ଜେନା):ଭୁବନେଶ୍ୱର ମହାନଗର ନିଗମ(ବିଏମ୍ସି) ଅଞ୍ଚଳରେ ଆବାସିକ ଘରେ ବେଆଇନ ଭାବେ ବ୍ୟବସାୟ କେନ୍ଦ୍ର ଖୋଲିବା ପ୍ରସଙ୍ଗ ଏବେ ରୋଚକ ମୋଡ଼ ନେଇଛି। ଏହି ପ୍ରସଙ୍ଗକୁ ନେଇ ବିଏମ୍ସି କାର୍ଯ୍ୟାଳୟ ସମେତ ଭୁବନେଶ୍ୱର-ଉତ୍ତର, ଦକ୍ଷିଣପୂର୍ବ ଏବଂ ଦକ୍ଷିଣ-ପଶ୍ଚିମ ଜୋନ୍ରେ ଏବେ ଭିଡ଼ ପରିଲକ୍ଷିତ ହେଉଛି। ବିଏମ୍ସି ପକ୍ଷରୁ କେତେକ କ୍ଷେତ୍ରରେ ଯାଞ୍ଚ କରା ନ ଯାଇ ନୋଟିସ୍ ଜାରି କରାଯାଇଥିବା ପରିଲକ୍ଷିତ ହୋଇଛି। ଏହାକୁ ନେଇ ସାଧାରଣ ଲୋକେ ମାନସିକସ୍ତରରେ ପୀଡ଼ା ପାଇବା ସହିତ ଆଇନଜୀବୀଙ୍କ ମାଧ୍ୟମରେ ଖର୍ଚ୍ଚାନ୍ତ ହେଉଥିବା ଅଭିଯୋଗ ହୋଇଛି।
ଏଭଳି ସ୍ଥିତିରେ ବିଏମ୍ସି କମିଶନର ଚଞ୍ଚଳ ରାଣା ଗଣମାଧ୍ୟମକୁ ଦେଇଥିବା ମନ୍ତବ୍ୟକୁ ନେଇ ଚର୍ଚ୍ଚା ଜୋର ଧରିଛି। ଗୋଟିଏ ପଟେ ରାଣା କହିଛନ୍ତି, ସେ ଏକ ପୋର୍ଟାଲର ତଥ୍ୟକୁ ନେଇ ନୋଟିସ ଜାରି କରିଛନ୍ତି। ଅନ୍ୟପକ୍ଷରେ ବିଏମ୍ସି ପକ୍ଷରୁ ସୁପ୍ରିମକୋର୍ଟରେ ଯେଉଁ ତଥ୍ୟ ରଖାଯାଇଛି, ସେଥିରେ ସ୍ପଷ୍ଟ ଭାବେ ଉଲ୍ଲେଖ ରହିଛି ଯେ, ବିଏମ୍ସି ପକ୍ଷରୁ ପ୍ରତ୍ୟେକ ଆବାସିକସ୍ଥଳ ଯାଞ୍ଚ କରାଯାଇଥିଲା। ନିର୍ମାଣରେ ଉଲ୍ଲଂଘନ ସହିତ ଆବାସିକ ଘରେ ବ୍ୟବସାୟ କେନ୍ଦ୍ର ଚାଲୁଥିବା ଘରକୁ ଓଡିଏ ନିୟମ ଅନୁଯାୟୀ ନୋଟିସ ଜାରି କରାଯାଇଛି। ତେବେ ବିଏମ୍ସି କମିଶନରଙ୍କ ମନ୍ତବ୍ୟ ଯଥା ପୋର୍ଟାଲରୁ ସଂଗୃହୀତ ତଥ୍ୟ ଠିକ୍ ନଁା ସୁପ୍ରିମକୋର୍ଟକୁ କ୍ଷେତ୍ରସ୍ଥଳ ଯାଞ୍ଚ କରି ବିଏମ୍ସି ଦେଇଥିବା ତଥ୍ୟ ଠିକ୍। ଏହାକୁ ନେଇ ଏବେ ବୁଦ୍ଧିଜୀବୀ ମହଲରେ ଆଲୋଚନା ଜୋର୍ ଧରିଛି।
ବିଏମ୍ସି କମିଶନର ରାଣା ଗଣମାଧ୍ୟମକୁ କହିଛନ୍ତି, ବିଏମ୍ସିରେ ପ୍ରାୟ ୫ହଜାର ବେଆଇନ ବ୍ୟବସାୟୀ କେନ୍ଦ୍ର ଚଳାଉଛନ୍ତି, ଉକ୍ତ ତଥ୍ୟ ହୋଲ୍ଡିଂ ଟ୍ୟାକ୍ସ ପ୍ଲାର୍ଟଫର୍ମରୁ ଗ୍ରହଣ କରାଯାଇଛି। ଏହାକୁ ନେଇ ନୋଟିସ ପ୍ରଦାନ କରାଯାଇଥିବାବେଳେ ପୋର୍ଟାଲରେ ପରିବର୍ତ୍ତନ କରାଯିବାକୁ ରହିଛି। ପୂର୍ବରୁ ଏନେଇ ବାଧ୍ୟତାମୂଳକ ନ ଥିବାବେଳେ ଏବେ ତାହାକୁ ରଖାଯିବ। ଯେଉଁମାନେ ବେଆଇନ ଭାବେ ବ୍ୟବସାୟ କାର୍ଯ୍ୟ କରୁଛନ୍ତି ତାକୁ ମଧ୍ୟ ପ୍ଲାନ୍ ଅନୁମୋଦନ କରିବାକୁ କୁହାଯାଇଛି। ତେବେ ସୁପ୍ରିମକୋର୍ଟଙ୍କ ପକ୍ଷରୁ ଯେଉଁ ନିର୍ଦ୍ଦେଶନାମା ମହାନଗର ନିଗମ କର୍ତ୍ତୃପକ୍ଷଙ୍କୁ ପାଳନ କରିବାକୁ କୁହାଯାଇଥିଲା ତାହାର ଅନୁପାଳନ କେତେଦୂର ହୋଇଛି, ତାକୁ ନେଇ ଏବେ ପ୍ରଶ୍ନ ଉଠିଛି।
ଏନେଇ ଆବେଦନକାରୀ ବିମଳେନ୍ଦୁ ପ୍ରଧାନ କହିଛନ୍ତି, ବିଏମ୍ସି କମିଶନରଙ୍କ ମନ୍ତବ୍ୟ ଏବଂ ସୁପ୍ରିମକୋର୍ଟରେ ପ୍ରଦତ୍ତ ତଥ୍ୟ ମଧ୍ୟରେ ଯଥେଷ୍ଟ ଫରକ ରହିଛି। ଏହାବାଦ୍ ବିଏମ୍ସି ପକ୍ଷରୁ ଇନ୍ଦ୍ରଧନୁ ମାର୍କେଟ କମ୍ପ୍ଲେକ୍ସ, ଲକ୍ଷ୍ମୀସାଗର ଥାନା, ଉତ୍କଳ ବିଶ୍ୱବିଦ୍ୟାଳୟ ଭଳି ବୃହତ୍ ଅନୁଷ୍ଠାନକୁ ଉଲ୍ଲଂଘନକାରୀ ତାଲିକାରେ ଯୋଡ଼ା ଯାଇଛି। ଯଦି ବିଏମ୍ସି କର୍ତ୍ତୃପକ୍ଷ କ୍ଷେତ୍ର ଯାଞ୍ଚ କରିଥାନ୍ତେ, ତେବେ ଏଭଳି ତ୍ରୁଟି ହୋଇ ନ ଥା’ନ୍ତା। ଏହାବାଦ୍ କେ-୫ ଅଞ୍ଚଳର ଜଣେ ସାଧାରଣ ଲୋକଙ୍କୁ ମଧ୍ୟ ନୋଟିସ ହେବା ଦ୍ୱାରା ସେ ମାନସିକସ୍ତରରେ ନିର୍ଯାତନା ପାଉଛନ୍ତି। ସୁପ୍ରିମକୋର୍ଟଙ୍କ ପକ୍ଷରୁ ପରବର୍ତ୍ତୀ ଶୁଣାଣି ବେଳେ ଏସବୁ ପ୍ରସଙ୍ଗ ରଖାଯିବ ବୋଲି ସେ କହିଛନ୍ତି।