ମେଲବୋର୍ନ, ୨୬।୧୨- ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଟେଷ୍ଟରେ ଭାରତୀୟ ଦଳର କାମଚଳା ଅଧିନାୟକ ଅଜିଙ୍କ୍ୟ ରାହାନେଙ୍କ ନେତୃତ୍ୱକୁ ବହୁ ପୂର୍ବତନ କ୍ରିକେଟର ପ୍ରଶଂସା କରିଛନ୍ତି। ଏହି ତାଲିକାରେ ଅଛନ୍ତି ପୂର୍ବତନ ଭାରତୀୟ ଅଧିନାୟକ ତଥା କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର। ହେଲେ ରାହାନେଙ୍କ ନେତୃତ୍ବରେ ତାଙ୍କ ମତ ସମ୍ପୂର୍ଣ୍ଣ ଭିନ୍ନ।
ନିୟମିତ ଅଧିନାୟକ ବିରାଟ କୋହଲିଙ୍କ ଅନୁସ୍ଥିତିରେ ଟିମ୍ ଇଣ୍ଡିଆର ନେତୃତ୍ୱ ଭାର ସମ୍ଭାଳୁଥିବା ରାହାନେ ଜବରଦସ୍ତ ଫିଲ୍ଡ ପୋଜିଶନ ଓ ବୋଲିଂ ଚେଞ୍ଜ କରି ଘରୋଇ ଅଷ୍ଟ୍ରେଲିଆ ଦଳକୁ ୭୨.୩ ଓଭରରେ ୧୯୫ ରନ୍ରେ ସୀମିତ ରଖିଥିଲେ। ରାହାନେଙ୍କ ନେତୃତ୍ୱ ସମ୍ପର୍କରେ ଗାଭାସ୍କରଙ୍କୁ ମତ ଲୋଡ଼ାଯିବା ପରେ ସେ କହିଥିଲେ, ଏତେ ଶୀଘ୍ର ସିଦ୍ଧାନ୍ତରେ ପହଞ୍ଚତ୍ବା ଉଚିତ ନୁହେଁ। ଯଦି ତାଙ୍କ ନେତୃତ୍ୱକୁ ମୁଁ ପ୍ରଶଂସା କରେ, ତେବେ ପୁଣି ଥରେ ମୁମ୍ବାଇ ଖେଳାଳିଙ୍କୁ ସମର୍ଥନ କରୁଥିବା ଟ୍ୟାଗ ମୋ ଉପରେ ଲଗାଯିବ। ରାହାନେ ନୂଆ ନୂଆ ନେତୃତ୍ୱ ସମ୍ଭାଳୁଥିବାରୁ ମୁଁ ଏତେ ଶୀଘ୍ର କିଛି କହିବା ଉଚିତ ହେବ ନାହିଁ ବୋଲି ଏହି କିମ୍ବଦନ୍ତୀ ବ୍ୟାଟ୍ସମ୍ୟାନ ଭାରତ ଓ ଅଷ୍ଟ୍ରେଲିଆ ଟେଷ୍ଟ ସିରିଜ୍ର ପ୍ରସାରଣକାରୀ ଚ୍ୟାନେଲ ସୋନୀ ସ୍ପୋଟର୍ସ ନେଟ୍ଓ୍ବର୍କରେ କହିଛନ୍ତି।
