ଭୁବନେଶ୍ୱର,୨୭।୫ (ବ୍ୟୁରୋ): ରାଜ୍ୟରେ ବନ୍ୟପ୍ରାଣୀ ଶିକାର ଓ ଚୋରା ଚାଲାଣ ଦିନକୁ ଦିନ ବଢିବାରେ ଲାଗିଛି। ଫଳରେ ବନ୍ୟପ୍ରାଣୀ ବିପଦରେ ପଡ଼ିଲେଣି। ବନ୍ୟପ୍ରାଣୀଙ୍କ ସୁରକ୍ଷା ଓ ଚୋରା ଚାଲାଣ ରୋକିବାକୁ କଡ଼ାକଡ଼ି ଆଇନ, ସଚେତନତା କାର୍ଯ୍ୟକ୍ରମ ଓ ରାଜ୍ୟ ସରକାରଙ୍କ ପଦକ୍ଷେପ ସତ୍ତ୍ୱେ ଆଶାଜନକ ସୁଫଳ ମିଳିପାରୁନାହିଁ। ଶିକାରୀମାନେ ଜଙ୍ଗଲରେ ବନ୍ୟପ୍ରାଣୀଙ୍କ ଗତିବିଧିକୁ ଲକ୍ଷ୍ୟ କରି ଫାଶ କିମ୍ବା ଯେକୌଣସି ମାରଣାସ୍ତ୍ର ସାହାଯ୍ୟରେ ଗୋଟିକ ପରେ ଗୋଟିଏ ପଶୁ ପକ୍ଷୀଙ୍କୁ ଶିକାର କରିଚାଲିଛନ୍ତି। ହତ୍ୟା ପରେ ସମ୍ପୃକ୍ତ ପଶୁପକ୍ଷୀଙ୍କ ଛାଲ, ନଖ, ଦାନ୍ତ, ଶିଙ୍ଗ ପ୍ରଭୃତି ବହୁ ମୂଲ୍ୟରେ ବିକ୍ରି କରୁଛନ୍ତି। ଏପରି କି ବଜ୍ରକାପ୍ତା, ହରିଣ, ଶମ୍ବର ପ୍ରଭୃତି ମାରି ମାଂସ ବିକୁଛନ୍ତି।
ଗଜପତି, କୋରାପୁଟ, ମୟୂରଭଞ୍ଜ, କନ୍ଧମାଳ, ସମ୍ବଲପୁର, ଦେବଗଡ଼ ପ୍ରଭୃତି ଜିଲାରେ ଶିକାରୀମାନେ ସକ୍ରିୟ ରହିଛନ୍ତି। କେଉଁଠି ଚମଡ଼ା ଓ ନଖ ପାଇଁ ବାଘ ତ ପୁଣି କେଉଁଠାରେ ଦାନ୍ତ ପାଇଁ ହାତୀ, ଆଉ କେଉଁଠି ଶିଙ୍ଗ ପାଇଁ ହରିଣଙ୍କୁ ଶିକାର କରି ବେଧଡକ ଭାବେ ଚୋରାଚାଲାଣ କରୁଛନ୍ତି। ସାପ ବିଷ, ବଜ୍ରକାପ୍ତା କାତି ପ୍ରଭୃତି ଜାତୀୟ ଓ ଅନ୍ତର୍ଜାତୀୟ ବଜାରରେ ବିକ୍ରି କରି ଲକ୍ଷ ଲକ୍ଷ ଟଙ୍କା କମାଉଛନ୍ତି। ଅନ୍ୟପକ୍ଷରେ ବନ କର୍ମଚାରୀ କାଁ ଭାଁ କ୍ଷେତ୍ରରେ ଶିକାରୀଙ୍କୁ ଧରୁଥିଲେ ମଧ୍ୟ ଶିକାର ଓ ଚୋରା ଚାଲାଣ ଉପରେ ରୋକ ଲଗାଇ ପାରୁନାହାନ୍ତି। ତେବେ ଏ ନେଇ ଗଠିତ କ୍ରାଇମବ୍ରାଞ୍ଚର ସ୍ବତନ୍ତ୍ର ଟାସ୍କ ଫୋର୍ସ (ଏସ୍ଟିଏଫ୍) କେତେକ କ୍ଷେତ୍ରରେ ସଫଳତା ପାଉଥିବା ଦେଖିବାକୁ ମିଳୁଛି। ଗତ ୨ ବର୍ଷ ମଧ୍ୟରେ ଏସ୍ଟିଏଫ୍ ୨୯ ବାଘଛାଲ, ୨୪ ହାତୀଦାନ୍ତ, ୭ ହରିଣ ଛାଲ, ୧୪ ଜୀବନ୍ତ ବଜ୍ରକାପ୍ତା, ୩୬ କେଜି ୪୦୦ ଗ୍ରାମ ବଜ୍ରକାପ୍ତା କାତି, ୨ ବାଘଦାନ୍ତ ଓ ୨୯ ବାଘନଖ, ୪୬ ଶୁଆ ଜବତ କରିଛି। ଏଥିସହ ଏସବୁ ଘଟଣାରେ ସଂପୃକ୍ତ ଥିବା ୭୦ ଜଣ ଶିକାରୀଙ୍କୁ ଗିରଫ କରିଛି। ପରିବେଶବିତ୍ ଓ ପ୍ରାଣୀପ୍ରେମୀଙ୍କ ମତରେ ଏହି କାର୍ଯ୍ୟାନୁଷ୍ଠାନ ପର୍ଯ୍ୟାପ୍ତ ନୁହେଁ। କଠୋର ଆଇନକାନୁନ, ବ୍ୟାପକ ସଚେତନତା କାର୍ଯ୍ୟକ୍ରମ ସହ ଅଧିକ ଚଢ଼ାଉର ଆବଶ୍ୟକତା ରହିଛି। ସେହିପରି ବେଧଡ଼କ ଶିକାର ଯୋଗୁ ବିରଳ ପଶୁପକ୍ଷୀଙ୍କ ସଂଖ୍ୟା କ୍ରମଶଃ ହ୍ରାସ ପାଇବାରେ ଲାଗିଛି।
ଦିନକୁ ଦିନ ବନ୍ୟପ୍ରାଣୀ ଶିକାର ବଢିବାକୁ ଲାଗିଛି, ଯାହା ଆଗାମୀ ଦିନ ପାଇଁ ବଡ଼ ସମସ୍ୟା। ଏହାକୁ ରୋକିବାକୁ ହେଲେ ପ୍ରଥମେ ଅଧିକ ସଂଖ୍ୟକ ବନ କର୍ମଚାରୀ ନିଯୁକ୍ତି ହେବା ଦରକାର। ପାଟ୍ରୋଲିଂ ବଢାଯିବା ଆବଶ୍ୟକ। ଏଥିସହ ଜଙ୍ଗଲ ପାଖରେ ବାସ କରୁଥିବା ଲୋକଙ୍କ ସହିତ ବନକର୍ମଚାରୀଙ୍କୁ ସୁସମ୍ପର୍କ ରଖିବାକୁ ପଡ଼ିବ। ଶିକାରୀଙ୍କ ଗତିବିଧି ସମ୍ପର୍କରେ ସେମାନେ ପ୍ରଥମେ ସୂଚନା ଦେଇପାରିବେ। ସେହିପରି ଖରାଦିନେ ଶିକାରୀମାନେ ଜଙ୍ଗଲରେ ଅଧିକ ସକ୍ରିୟ ରହୁଛନ୍ତି। ବନ୍ୟଜନ୍ତୁମାନେ ପାଣି ପିଇବାକୁ ଆସିବାବେଳେ ଶିକାରୀ ଲୁଚି ରହି ସେମାନଙ୍କୁ ଶିକାର କରିଥାନ୍ତି। ତେଣୁ ବନବିଭାଗ ଉକ୍ତ ଜାଗାରେ ସଜାଗ ରହିବା ଦରକାର।
– ହରି ଶଙ୍କର ଉପାଧ୍ୟାୟ, ପୂର୍ବତନ ପିସିସିଏଫ୍
ଆଇନ ଅନୁଯାୟୀ ବନ୍ୟଜନ୍ତୁ ଶିକାର କରିବା ଦଣ୍ଡନୀୟ ଅପରାଧ। ତଥାପି ଶିକାରୀମାନେ ଏହାକୁ ବେଖାତିର କରି ଲୁଚି ଛପି ବନ୍ୟଜନ୍ତୁ ଶିକାର କରି ଚାଲିଛନ୍ତି। ଏହା ଆଗାମୀ ଦିନ ପାଇଁ ବଡ଼ ବିପଦ ସୃଷ୍ଟି କରିବ। ବନ୍ୟଜନ୍ତୁ ସଂଖ୍ୟା କମିବା ଦ୍ୱାରା ଜୈବବିବିଧତା ହ୍ରାସ ପାଉଛି। ଏହାକୁ ପ୍ରତିହତ କରିବା ଲାଗି ପ୍ରଥମତଃ ବନ ବିଭାଗକୁ ତତ୍ପର ହେବାକୁ ପଡ଼ିବ।
-ଜୟକୃଷ୍ଣ ପାଣିଗ୍ରାହୀ, ପରିବେଶବିତ
