ନୂଆଦିଲ୍ଲୀ: ଏହା ସମସ୍ତେ ଜାଣନ୍ତି ଯେ, ଭାରତୀୟ କ୍ରିକେଟ୍ ଦଳର ପୂର୍ବତନ କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କୁ ସାଥୀ ଖେଳାଳିମାନେ ‘ପାଜି’ ଭାବରେ ସମ୍ବୋଧନ କରିଥାନ୍ତି। ଏହା କେବଳ ଯେ ପୂର୍ବତନ ଖେଳାଳିମାନେ ତା ନୁହେଁ ବରଂ ବର୍ତ୍ତମାନର ପିଢ଼ି ମଧ୍ୟ ତାଙ୍କୁ ସଚିନ ପାଜି ବୋଲି ଅଧିକାଂଶ ସମୟ ଡାକିଥାନ୍ତି। ଦୀର୍ଘ ବର୍ଷ ଧରି ସଚିନଙ୍କ ସହ ଏକାଠି ଡ୍ରେସିଂରୁମ୍ ଶେୟାର କରିଥିବା ଆଶିଷ ନେହେରା ଏହା ପଛରେ ରହିଥିବା କାରଣ ନିକଟରେ ପ୍ରକାଶ କରିଛନ୍ତି।
କହିଛନ୍ତି, ୨୦୦୩ ବିଶ୍ୱକପ୍ର ପାକିସ୍ତାନ ବିପକ୍ଷ ମ୍ୟାଚ୍ ପରେ ଆମେ ତାଙ୍କୁ ପାଜି ବୋଲି ଡାକିବା ଆରମ୍ଭ କରିଥିଲୁ। ଏହି ମ୍ୟାଚ୍ରେ ସଚିନ (୯୮ ରନ)ଙ୍କ ଆକର୍ଷଣୀୟ ଇନିଂସ ଯୋଗୁ ଭାରତ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ପରାସ୍ତ କରିଥିଲା। ମ୍ୟାଚ୍ ବିଜୟୀ ଇନିଂସ ପାଇଁ ସଚିନଙ୍କୁ ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଥିଲା। ମ୍ୟାଚ୍ ଜିତିସାରି ଆମେ ଯେତେବେଳେ ହୋଟେଲକୁ ଫେରୁଥିଲୁ, ହରଭଜନ ସିଂ ବସ୍ର ପଛ ସିଟ୍ରେ ବସି ‘ପାଜି ନମ୍ବର ୧’ ଗୀତ ଗାଇଥିଲେ। ଏହାପରେ ଆମେ ସମସ୍ତେ ତେନ୍ଦୁଲକରଙ୍କୁ ପାଜି ବୋଲି ଡାକିବା ଆରମ୍ଭ କଲୁ। ତାଙ୍କ ପୂର୍ବରୁ ଜଣେ ପାଜି ଥିଲେ, ଯିଏକି କପିଳ ପାଜି। ଏଠାରେ ଉଲ୍ଲେଖଯୋଗ୍ୟ, ଏହି ମ୍ୟାଚ୍ରେ ପାକିସ୍ତାନ ପ୍ରଥମେ ବ୍ୟାଟିଂ କରି ୨୭୩ ରନ କରିଥିଲା। ଜବାବରେ ସଚିନଙ୍କ ୯୮ ରନର ଇନିଂସ ବଳରେ ଭାରତ ୨୬ ବଲ ପୂର୍ବରୁ ଲକ୍ଷ୍ୟ ହାସଲ କରିନେଇଥିଲା। ସୋଏବ ଅଖତର୍ଙ୍କ ଏକ ବାଉନ୍ସର୍ ବଲ୍କୁ ଖେଳିବାକୁ ଯାଇ ସଚିନ ପଏଣ୍ଟ ଅଞ୍ଚଳରେ କ୍ୟାଚ୍ ହୋଇଥିଲେ। ଆଉଟ୍ ହେବା ପୂର୍ବରୁ କିନ୍ତୁ ସେ ଅଖତର୍ଙ୍କ ପଏଣ୍ଟ ଉପରେ ଏକ ଚମତ୍କାର ଛକା ମାରିଥିଲେ, ଯାହାକୁ ଆଜି ପର୍ଯ୍ୟନ୍ତ ଦର୍ଶକ ଭୁଲିପାରି ନାହାନ୍ତି।
