ନୂଆଦିଲ୍ଲୀ,୮।୧: ଦିଲ୍ଲୀରେ ବାଜି ସାରିଛି ନିର୍ବାଚନୀ ବିଗୁଲ। ବିଗୁଲ ବାଜିବାର କିଛିକ୍ଷଣ ମଧ୍ୟରେ ଦିଲ୍ଲୀର ସବୁଦଳ ଅଣ୍ଟା କଷି ସାରିଛନ୍ତି। ତେବେ କଂଗ୍ରେସ ସମେତ ଏଏପି ଓ ଭାଜପା ମଇଦାନକୁ ଓହ୍ଲାଇଛନ୍ତି। ହେଲେ ଏହାରି ଭିତରେ ଦିଲ୍ଲୀ ରାଜନୀତିକୁ ରୋଚକ କରାଉଛି ଇଣ୍ଡିଆ ମେଣ୍ଟରେ ଥିବା ନେତାଙ୍କ ବୟାନ। କଂଗ୍ରେସ ଓ ଏଏପି ଦୁହେଁ ଅଲଗା ଅଲଗା ନିର୍ବାଚନ ଲଢିବେ ବୋଲି ଘୋଷଣା କରିଛନ୍ତି। କିନ୍ତୁ ସବୁଠାରୁ ବଡ଼କଥା ହେଉଛି କଂଗ୍ରେସର ସବୁଠାରୁ ବଡ଼ ବନ୍ଧୁ ବୋଲାଇଥିବା ସମାଜବାଦୀ ପାର୍ଟି ଏବେ ତା’ର ହାତ ଛାଡିଦେଇଛି। ଏସପି ଏବେ ଏଏପିକୁ ସମର୍ଥନ କରିବ ବୋଲି କହିଛି। ସେହିପରି ଟିଏମସି ମଧ୍ୟ ଏଏପିକୁ ଖୋଲାଖୋଲି ସମର୍ଥନ ଜଣାଇଛି। ଯାହାକୁ ନେଇ ଦିଲ୍ଲୀ ରାଜନୀତି ସରଗରମ ହୋଇଛି।
ଏସପି ପାର୍ଟି ମୁଖ୍ୟ ଅଖିଳେଶ ଯାଦବ ଏଏପି ପାଇଁ ର୍ନିବାଚନ ପ୍ରଚାର କରୁଥିବାର ମଧ୍ୟ ଦେଖିବାକୁ ମିଳିଛି। ସେ କହିଛନ୍ତି ଦିଲ୍ଲୀରେ ଯଦି ଭାଜପାକୁ କେହି ହରାଇ ପାରିବ ସେ ହେଉଛି ଏଏପି। କଂଗ୍ରେସ ଏବେ ଭାଜପାକୁ ହରାଇବା ସ୍ଥିତିରେ ନାହିଁ। ଆଗକୁ ଆହୁରି ଏଏପି ପାଇଁ ର୍ନିବାଚନ ପ୍ରଚାର କରିବି ବୋଲି ଅଖିଳେଶ କହିଛନ୍ତି।
ଅନ୍ୟପଟେ ମମତାଙ୍କ ଦଳର ନେତା କୁର୍ଣ୍ଣାଲ ଘୋଷ ମଧ୍ୟ ଏଏପିକୁ ସମର୍ଥନ କରିଛନ୍ତି। ସେ କହିଛନ୍ତି ଆମେ ଚାହୁଁଛୁ ଆପ ପୁଣି ଥରେ ଦିଲ୍ଲୀରେ ସରକାର କରୁ। ଏଠାରେ ଭାଜପାକୁ ହରାଇବା ପାଇଁ ଆମ ଆଦମୀ ପାର୍ଟିକୁ ମଜବୁତ ହେବାକୁ ପଡ଼ିବ। ଆମେ ଚାହୁଁଛୁ ଦିଲ୍ଲୀରେ ପୁଣି ଥରେ କେଜରିୱାଲଙ୍କ ଦଳ କ୍ଷମତାକୁ ଆସୁ।
ସୂଚନାଥାଉକି, ଦିଲ୍ଲୀ ବିଧାନସଭା ର୍ନିବାଚନ ପାଇଁ ମଙ୍ଗଳବାର ତାରିଖ ଘୋଷଣା କରିଛନ୍ତି ମୁଖ୍ୟ ର୍ନିବାଚନ କମିଶନର । ଫେବୃଆରୀ ୫ରେ ଏକା ଥରକେ ସରିବ ସମସ୍ତ ୭୦ ବିଧାନସଭା ଆସନରେ ଭୋଟିଂ । ସେହିପରି ୮ ତାରିଖରେ ଗଣତି ସହ ସ୍ପଷ୍ଟ ହୋଇଯିବ, ଆଗାମୀ ୫ ବର୍ଷ ପାଇଁ ଦିଲ୍ଲୀ କାହାର ହେବ ।
