ନୂଆଦିଲ୍ଲୀ,୪।୧୧: ଜୟ ଶାହା ଆଇସିସିର ଚେୟାରମ୍ୟାନ ହୋଇଛନ୍ତି ଏବଂ ସେ ତାଙ୍କ କାର୍ଯ୍ୟକାଳ ଡିସେମ୍ବର ୨ ତାରିଖରୁ ଆରମ୍ଭ କରିବେ। ବର୍ତ୍ତମାନ ସୁଦ୍ଧା ଜୟ ଶାହା ବିସିସିଆଇର ସଚିବ ଭାବରେ କାର୍ଯ୍ୟ କରୁଛନ୍ତି, କିନ୍ତୁ ଡିସେମ୍ବର ୨ ପରେ ଜୟ ଶାହାଙ୍କ ପଦ କିଏ ଗ୍ରହଣ କରିବ? ଡିସେମ୍ବର ପାଖେଇ ଆସୁଥିବାରୁ ଏହି ପ୍ରଶ୍ନ ଅଧିକ ତୀବ୍ର ହେବାରେ ଲାଗିଛି। ଏହି ପ୍ରଶ୍ନକୁ ନେଇ ଆସିଥିବା ରିପୋର୍ଟରେ କୁହାଯାଇଛି ଯେ ଜୟ ଶାହାଙ୍କ ପରେ କାହାକୁ ବିସିସିଆଇ ସଚିବ ଦାୟିତ୍ୱ ଦିଆଯାଇପାରେ।
ଇଣ୍ଡିଆ ଟୁଡେରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଦିଲ୍ଲୀ ଏବଂ ଜିଲା କ୍ରିକେଟ ଆସୋସିଏଶନ (ଡିଡିସିଏ) ସଭାପତି ରୋହନ ଜେଟଲୀଙ୍କୁ ଜୟ ଶାହାଙ୍କ ପରେ ବିସିସିଆଇର ସଚିବ କରାଯାଇପାରେ। ରୋହନ ଜେଟଲୀଙ୍କ ବ୍ୟତୀତ ଗୁଜରାଟ କ୍ରିକେଟ ଆସୋସିଏଶନ ସଚିବ ଅନିଲ ପଟେଲଙ୍କ ନାମ ବିସିସିଆଇ ସଚିବ ଦୌଡ଼ରେ ଅଛି। ତେବେ ଏହି ପଦ ପାଇଁ ରୋହନ ଜେଟଲୀ ବେଶୀ ପସନ୍ଦ ବୋଲି ବିବେଚନା କରାଯାଉଛି।
ସୂଚନାଯୋଗ୍ୟ ଯେ ରୋହନ ଜେଟଲୀ ସ୍ବର୍ଗତ ରାଜନେତା ଅରୁଣ ଜେଟଲୀଙ୍କ ପୁଅ ଏବଂ ସେ ଦିଲ୍ଲୀ ଏବଂ ଜିଲା କ୍ରିକେଟ ଆସୋସିଏସନର ସଭାପତି ଭାବରେ କାର୍ଯ୍ୟ କରୁଛନ୍ତି। ଏହାପୂର୍ବରୁ ରୋହନ ଜେଟଲୀ ବିସିସିଆଇ ସଚିବ ହେବାର ଖବର ବାହାରକୁ ଆସିଥିଲା, ଯାହାକୁ ସେ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରିଥିଲେ। ତେବେ ଏହି ପ୍ରସଙ୍ଗରେ ସରକାରୀ ସୂଚନା ଏ ପର୍ଯ୍ୟନ୍ତ ପ୍ରକାଶ କରାଯାଇ ନାହିଁ।
