ଆବୁଧାବି,୭।୧୦: ରାତାରାତି ଖେଳାଳିଙ୍କ ଭାଗ୍ୟ ବଦଳାଇଥାଏ ଆଇପିଏଲ୍। ଏଥିରେ ତିଳେ ମାତ୍ର ସନ୍ଦେହ ନାହିଁ। ଅନେକ ଯୁବ କ୍ରିକେଟର ଏହି ପ୍ଲାଟଫର୍ମରୁ ନିଜର କ୍ୟାରିୟର ଆରମ୍ଭ କରି ଏବେ ଦୁନିଆର ଶ୍ରେଷ୍ଠ ଖେଳାଳି ଭାବେ ପରିଗଣିତ ହେଉଛନ୍ତି। ଏଭଳି କିଛି ଘଟିଛି ବୁଧବାର ଆବୁଧାବି ଗ୍ରାଉଣ୍ଡରେ। ସନରାଇଜର୍ସ ହାଇଦ୍ରାବାଦ ପାଇଁ ଖେଳୁଥିବା ଦ୍ରୁତ ବୋଲର୍ ଉମ୍ରାନ ମଲିକ ଚଳିତ ସଂସ୍କରଣର ସବୁଠାରୁ ଦ୍ରୁତ ବୋଲିଂ କରି ସମସ୍ତଙ୍କୁ ଚକିତ କରିଦେଇଛନ୍ତି।
ଗତ ମ୍ୟାଚ୍ରେ ପ୍ରଥମ ଥର ପାଇଁ ଆଇପିଏଲ୍ରେ ଖେଲିବାର ସୁଯୋଗ ପାଇଥିଲେ ଉମ୍ରାନ। ହେଲେ କୋଲକାତା ନାଇଟ୍ ରାଇଡର୍ସ ବିପକ୍ଷ ଉକ୍ତ ମ୍ୟାଚ୍ରେ ସେ କୌଣସି ଉଇକେଟ ନେଇ ପାରି ନ ଥିଲେ। କେବଳ ନିଜ ବୋଲିଂ ଗତିକୁ ନେଇ ସମସ୍ତଙ୍କ ହୃଦୟ ଜିତିଥିଲେ। ମ୍ୟାଚ୍ ପରେ ଅଧିନାୟକ କେନ୍ ଓ୍ବିଲିୟମସନ ମଧ୍ୟ ତାଙ୍କୁ ପ୍ରଶଂସା କରିଥିଲେ। ଉମ୍ରାନ୍ଙ୍କ ଉଲ୍ଲେଖନୀୟ ବୋଲିଂକୁ ଦୃଷ୍ଟିରେ ରଖି ତାଙ୍କୁ ବୁଧବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପ’ରେ ଖେଳାଯାଇଥିବା ମ୍ୟାଚ୍ରେ ସାମିଲ କରାଯାଇଥିଲା। ଏହି ମ୍ୟାଚ୍ରେ ସେ କିଛି ଭିନ୍ନ କରି ଦେଖାଇଛନ୍ତି।
ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ପ୍ରଥମ ଓଭରର ଚତୁର୍ଥ ବଲ୍ରେ ଉମ୍ରାନ ୧୫୨.୯୫ କିମି ବେଗରେ ବୋଲିଂ କରିଥିଲେ। ଏହା ଚଳିତ ଆଇପିଏଲ୍ ସିଜନର ଦ୍ରୁତତମ ବଲ୍ ପ୍ରମାଣିତ ହୋଇଛି। ବୋଲର୍ ଏହି ମ୍ୟାଚ୍ରେ କେଏସ୍ ଭରତଙ୍କ ରୂପେ ପ୍ରଥମ ଉଇକେଟ ନେଇଥିଲେ। ସେ ୪ ଓଭରରେ ୨୧ ରନ୍ ଦେଇ ୧ ଉଇକେଟ ନେଇଥିଲେ। ତେବେ ମ୍ୟାଚ୍ରେ ହାଇଦ୍ରାବାଦ ବାଙ୍ଗାଲୋରକୁ ୪ ରନ୍ରେ ପରାସ୍ତ କରିଥିଲା।
ଉମ୍ରାନ ମଲିକ କିଏ?
ଏହି ଯୁବ ବୋଲର୍ ୧୯୯୯ ନଭେମ୍ବର ୨୨ରେ ଶ୍ରୀନଗରରେ ଜନ୍ମଗ୍ରହଣ କରିଥଲେ। ଜମ୍ମୁ-କଶ୍ମୀର କ୍ରିକେଟ ଟିମ୍ ପାଇଁ ସେ ଘରୋଇ କ୍ରିକେଟ ଖେଳୁଛନ୍ତି।
ପ୍ରଶଂସାରେ ଶତମୁଖ ବିରାଟ:
ବାଙ୍ଗାଲୋର ବିପକ୍ଷରେ ପ୍ରଭାବୀ ବୋଲିଂ କରିବା ପରେ ଆର୍ସିବି ଏବଂ ଭାରତୀୟ କ୍ରିକେଟ ଟିମ୍ର ଅଧିନାୟକ ବିରାଟ କୋହଲି ମଧ୍ୟ ତାଙ୍କ ପ୍ରଶଂସା କରିଛନ୍ତି। ମ୍ୟାଚ୍ ପରେ ସେ ତାଙ୍କୁ ଭେଟିବା ସହ ଜର୍ସି ଏବଂ ଏକ ବଲ୍ରେ ଅଟୋଗ୍ରାଫ ମଧ୍ୟ ଦେଇଥିଲେ। ଏଥିସହ ଏଠାରେ ଜଣେ ବୋଲରଙ୍କୁ ୧୫୦ ବେଗରେ ବୋଲିଂ କରୁଥିବା ଦେଖି ଖୁସି ଲାଗିଲା ବୋଲି ବିରାଟ କହିଥିଲେ।
